Voceru
U voceru (o vociaru, o baddata) face parte di i canti funebri corsi. Hè un cantu prufanu. Hè un tipu specificu di lamentu chì hè cantatu da una donna, in presenza di a persona morta chì si trova annantu à a tola o u lettu. A donna chì canta hè a voceratrice. U voceru caratterizeghja a manera di i corsi pà pienghje i morti. U vòceru hè fundatu nant'à zerga, a tristezza è u dolu.
L'usu di u voceru in Corsica hè statu mintuvatu da Petru Cirneu di Felce d'Alesani in u 1506 in u so De Rebus Corsicis. Sicondu Petru Cirneu, l'usu vinia da i Rumani. Ma si facia tandu in a chjesa (Thiers 1999).
I Canti populari corsi di Salvatore Viale (1855) cumportanu bon'parechji voceri. Uni pochi di voceri celebri sò:
In certi casi, quandu u mortu hà persa a vita di manera viulente, essendu statu assassinatu, u voceru finisce incù una chjama à a vindetta. Per esempiu, in u voceru di Maria Felice di Calacuccia:
- D'una razza cusì grande
- Lasci solu una surella
- Senza cugini carnali
- Povera, orfana, è zitella.
- Ma per fà la to vindetta
- Stà sicuru, basta anch'ella.
è in voceru per Caninu:
- Cani cor' di la suredda
- Vogliu fà la tò vindetta.
Ma in certi voceri, u mortu hè statu tombu per accidente, da un animale, cum'è in u voceru di una talavese.
In u sartinese, u fattu di cantà u voceru hè chjamatu l'abaddatera (u fattu di cantà a baddata).
Parechji voceri celebri
[mudificà | edità a fonte]
Eccu uni pochi di voceri celebri, parte è più sò mintuvati in Viale (1855) è Tommaseo (1841).
- u voceru di Maria Felice di Calacuccia
- u voceru per Pieru è Oraziu
- u voceru di una Zuccarelli
- u voceru di una ghjovana veduva
- u voceru di a mamma d'un banditu
- u voceru di una ghjuvanetta di Tassu
- u voceru per Caninu
- u voceru per Larione
- u vociaru di Nunziola
- u voceru per Matteiu
- u voceru di Cesariu è di Cappatu
- u voceru di Carlu Dumenicu
Referenze
[mudificà | edità a fonte]- Salvatore Viale, Canti popolari corsi, 1855, Fabiani:Bastia
- N. Tommaseo, 1841, Canti popolari - Canti toscani, corsi, illirici, greci, Venezia
- A. L. A. Fée, Voceri, Canti pupulari di a Corsica, 1850, Derivaux
- Galletti, Storia illustrata di a Corsica - Histoire illustrée de la Corse, 1863
Ligami
[mudificà | edità a fonte]- I canti di a morte www.lecyrnaute.com Archiviu 2007-03-20 at the Wayback Machine
- Thiers, Ghjacumu, 1999, U gestu è a parola in u voceru corsu - Le geste et la parole dans le voceru corse