Voceru per Caninu

À prupositu di Wikipedia

U Voceru per Caninu hè un voceru di Corsica. Hè uriginariu di u Fiumorbu. Una surella piegne u so fratellu, banditu, chì hè statu tombu cun i soii (8 patriotti). Saria statu dinunciatu da unu di i so cumpagni ch fù arristatu poi liberatu subitu.

U voceru[mudificà | edità a fonte]

Eu vurria ch'è la me voci
Fussi tamant'é lu tonu
ch'ella franchessi le foce
di san Petru e Vizzavona
Per chi soni in ogni locu
Le gran' prove di Gallonu.
Tutti à lu Lugu di Nazza
Tutti s'eranu aduniti
inCun la barbara razza
Li sullati è li banditi
cun a timpesta d'ari mani
Tutti insemi son' partiti.
Sonu subitu partiti
tutti i lupi cun l'agneddi
e marchjavanu adduniti
À lu son' di cialambeddi ;
quandu ghjunsenu in la sarra
ti taglionu i garganeddi
:
Quandu n'intesi li brioni
M'affaccai à lu purteddu
dumandendu chì nova ci hè ?
Hannu tombu u to frateddu :
L'anu presu in la sarra ;
N'hanu fattu lu maceddu.
Nun ti valse lu curragju
nun ti valse la sciuppetta
Nun ti valse lu pugnali
Nun ti valse la terzetta ;
Nun fi valse ingermatura
Nè orazione binadetta.
À guardà le to ferite
Mi s'accresci lu dulori.
Perchè più nun mi rispondi ?
Forse ti manca lu cori ?
Cani cor di la suredda
hai cambiatu di culori.
Lu me largu di spaddera !
Lu me minutu di vita !
Cume tè ni nun ci n'era
Parii una mazza flurita.
solu u pinsere di te
or sustene la mio vita
À lu paese di Nazza
ci vogliu piantà un prunu
Perchè di la nostra razza
Ùn ci passi più nisunu :
Perchè ùn funu nè dui ne tre
Ma cinqu' omini contr'unu.
À lu ped' di stu puddonu
vogliu piantà lu me lettu
Parchi quì u me frateddonu
Ti tironu à mezu pettu.
Vogliu lacà lu bunetru
Vogliu armà schioppu è stilettu
Vogliu cinghje la carchera
Vogliu cinghje la tarzetta.
Cani cor' di la suredda
Vogliu fà la tò vindetta.

Una virsioni più cumpletta, intitulata 'Baddatu di Saveria di l'Isulacciu, pà a morti di u so frateddu caninu'[mudificà | edità a fonte]

Eccu ciò ch'iddu publicheti in u 1986 Carlu Santoni, in a so "Liata Fiumurbaccia di 500 buccati corsi". U cantu hè chjamatu "Baddatu di Saveria di l'Isulacciu, pà a morti di u so frateddu caninu" (in parichji parlati suttanacci, a parolla baddatu / baddata / abbaddatera pidda sensu di Voceru)


Santissimu Sacramentu,

Dolcia Vergini Maria,

Detimi grazia è favori

Ch’eu dica ciò chè vurria,

Perch’eu canti lu mo dolu

La so pena aciarba è ria.

L’annu di sessanta setti

D’uttrovi, la mischinedda

Fudi privata di teni

Canì cor di la suredda.

Hè lu più chì mi dà pena,

Hè lu più chì mi martedda.

Tutti à lu Lucu di Nazza

Tutti s’eranu aduniti

Cun quidda barbara razza,

Li suldati è li banditi.

Cù a timpesta d’arimani

Tutti insemi sò partiti.

Partisti da lu paesi

À lu son d’i cialambeddi,

Ghjuntu chì funu à la sarra

I lupi sopr’à l’agneddi,

Ti tallonu i garganeddi

À lu toccu d’i campaneddi.

In fondu di lu rioni

Si sintia ruzà lu ventu

Chì purtava da Ghisoni

La malora è lu spaventu.

Si vidia chì par aria

V’era accidiu è tradimendu.

Quandu intesi lu brioni

M’affaccò à lu purteddu

È dissi : - Chì nova c’eni ?

Hè mortu lu to frateddu.

L’anu tombu in la sarra

N’anu fattu lu maceddu.

Nun ti valsi l’archibusgiu

Nun ti valsi la schiuppetta

Nun ti valsi lu pugnali

Nun ti valsi la tarzetta

Nun ti valsi l’ingermatura

Cun quidda pessima setta.

À vedda li to ferriti

Mi s’accresci lu dulori.

Parchì più nun si rispondi ?

Forsi ti manca lu cori.

O Canì, cor di suredda,

Tù cambiatu ai di culori.

U mo largu di spaddera,

U mo minutu di vita,

Com’è teni n’ùn ci n’era,

Parii una mazza fiurita.

Canì, cor di la suredda,

L’anu privatu di vita.

Eu vurria chì la mo voci

Fussi tamant’è lu tonu

Ch’edda pudissi trapassà

La foci di Vizzavonu

Par chì soni in ogni locu

La gran prova di Gallonu.

À lu paesi di Nazza

Eu ci vollu piantà un prunu

Par chì di la nostra razza

Ùn ci passi più nisunu.

Par ch’ùn funu nè dui nè treni

Ma cinqui omini contr’unu.

À lu pè d’issu puddoni

Ci vollu piantà lu mo lettu

Par chì quì u mo fratiddoni

Ti tironu à mezu pettu,

Vollu lacà lu buneddu

Vollu armà schioppu è stilettu.

Vollu cinghja la carchera

Vollu cinghja la tarzetta

O Canì, cor di suredda,

Vollu fà la to vindetta,

Contr’à quiddi chì ti tumbonu

O crudel’è pessima setta

Referenze[mudificà | edità a fonte]