Frassetu
From Wikipedia
Frassetu hè una cumuna di u dipartimentu di a Corsica suttana.
Frassetu
 |
|
|---|---|
| Statu | Francia |
| Rigioni | Corsica |
| Dipartimentu | Corsica suttana |
| Circundariu | |
| Cantonu | |
| Codici INSEE | 2A119 |
| Codici pustali | 20157 |
| Merri | Paulu Antona |
| Intercumunalità | |
| Longitudina | |
| Latitudina | |
| Altitudina | |
| Superficia | ettari |
| Pupulazioni | 82 |
| Dinsità | ab./km² |
I poghji di u paesi sò: a Vaddi, a Cuddetta, Casamattonu (chì in i tempi era Calabrà), Casanova, u Piazzili, Busgiulacciu, Riccineddu, a Vignaccia.
Cuntenutu |
[mudificà] A Cuddetta
U nomu "Cuddetta" veni da u fattu chì 'ssu poghju hè annantu à una cuddicciola. In i tempi, era u poghju u più pupulatu. Ci sò parechji casi antichi in a Cuddetta: a Casa di i Maestri, a Casa di i Lavichi. In a Casa di i Maestri, ci hè a carciara sottu, si poni veda i branchetti, parechji archeri, è daretu ci hè sempri l'acquaghjolu. Annantu à a Casa di i Lavichi, ci hè zuccatu: "1751 LF" (ciò chì significheghja: "Lavicu Fecit", a feci Lavicu). Ci hè dinò u so forru in a Cuddetta. Hè statu custruitu in 1868. È da sottu, ci hè a so funtana: a funtana di l'Arbaghju.
 A Casa di I Maestri |
 U forru di A Cuddetta |
 Un'archera annantu à a facciata di a Casa di I Maestri |
 Un acquaghjolu daretu una casa antica |
[mudificà] Casamattonu
Casamattonu si trova di punta à A Cuddetta, da quand'è u stradonu. 'Ssu poghju hè statu chjamatu cusì parchì hè statu u prima poghju di u paesi ind'eddu ci hè statu una casa incù i mattona, una "casa à mattonu". Ma in i tempi, u poghju si chjamava "Calabrà". Ci hè sempri una rangata di casi custruiti da u XVIimu à u XIXimu seculu.
[mudificà] Riccineddu
 A Funtana di Centuliri |
 U purtonu di a Casa di Lari |
[mudificà] U Piazzili
U Piazzili hè un poghju anticu di u paesi, i casi i più vechji essendu da a fini di u seculu XVI. Annantu à u sopraporta d'un vechju muru, si vedi: "1557 A 8 IHS M F R". IHS vol'dì: "Iesus Hominum Salvator" è "M F R" significheghja: "Maestru Fecit Aedificare" (u Maestru - di muru - feci edificà).
Sient'è Petru Paulu Peretti (1966), a Leccia di Mal'Cunsigliu era situata à una trintina di metri di a funtana di Centuliri. 'Ssa leccia era in u Piazzili, ma hè stata tagliata in 1947. Era una leccia maiori ind'eddi s'erani riuniti quiddi chì ani dicisu di brusgià u casteddu di Campu in 1615.
 Facciata d'una casa antica in u Piazzili |
 Facciata incù u sopraporta è l'acquaghjolu |
 L'acquaghjolu |
 A casa di i Bozi, in u Piazzili |
I casati più cumuni in Frassetu sò: Antona, Casanova, Franceschi, Giuliani, Lanfranchi, Leonardi, Mariani, Miliani, Murzi, Pierlovisi, Pietrini, Sanviti, Stefani, Susini, Tramini, Vincenti. Altri casati, urighjinarii d'altri paesi, sò: Bartoli, Buresi, Canavaggio, Ceccaldi, Coti, Ferracci, Geronimi, Lovichi, Mondoloni, Nivaggioni, Picchetti, Quilichini, Quilici, Tomi.
[mudificà] Giugrafia
[mudificà] Storia
[mudificà] Merri
U merri attuali hè Paulu Antona.
[mudificà] Lingua
A lingua parlatu in Frassetu faci parti di a variità taravesa di a lingua corsa.
[mudificà] Grammatica
- Articuli ditarminativi (singulari/plurali): u/i, a/i. Più raramenti, s'usa lu/li, la/li, ma solu in certi casi: par asempiu, in puisia; o in i formi: "Oh lu bruttu !", "Oh lu latru!"; o ancu in certi casi particulari: "la ghjenti"
- Articuli inditarminativi: unu, una
- Prunomi parsunali sughjettu: eiu/ié, tù, eddu/ieddu edda/iedda, no, vo, eddi/ieddi
- Prunomi parsunali cumplementu: mi, ti, li, ci, vi, li
- Prunomi è aghjettivi pussessivi: meiu/mè, toiu/tù, soiu/sò, nosciu, vosciu, soiu/so
- Prunomi è aghjettivi dimustrativi: quistu-quisti, quissu-quissi, quiddu-quiddi
- Verbi:
I verbi ani trè formi di cunghjugazioni principali (-à, -a, -iscia).
Verbu essa:
- Indicativu prisenti: socu, sè, hè, semu, seti, sò;
- Indicativu imparfettu: era/eru, eri, era, irami, irati, irani;
- Indicativu passatu rimotu: futi, fusti, fù, fumi, futi, funi;
- Indicativu futuru: saraghju, sarè, sarà, saremu, sareti, sarani;
- Cunghjuntivu prisenti: ch'è sii, ch'è tù sii, ch'eddu (edda) sii, ch'è noi siimi, ch'è vo siiti, ch'eddi siini;
- Cunghjuntivu imparfettu: ch'è fussi, ch'è tù fussi, ch'eddu (edda) fussi, ch'è no fùssimi, ch'è vo fùssiti, ch'eddi fùssini;
- Cundiziunali: saria/sariu, saristi, saria, sariami, sariati, sariani;
- Ghjerundiu prisenti: essendu;
- Ghjerundiu passatu: essendu statu;
Verbu avè:
- Indicativu prisenti: aghju, ha, hà, avemu/emu, aveti/eti, ani;
- Indicativu imparfettu: avia/aviu, avii, avia, aviami, aviati, aviani;
- Indicativu passatu rimotu: ebbi, avisti, ebbi, ebbimi, avisti, ebbini;
- Indicativu futuru: avaraghju, avarè, avarà, avaremu, avareti, avarani;
- Cunghjuntivu prisenti: ch'e aghji, ch'è tù aghji, ch'eddu aghji, ch'è no aghjimi, ch'è vo aghjiti, ch'eddi aghjini;
- Cunghjuntivu inparfettu: ch'e avissi, ch'è tù avissi, ch'eddu (edda) avissi, ch'è no avissimi, ch'è vo avissiti, cheddi avissini;
- Cundiziunali: eu avarìa, tu avarìsti/avarii, iddu avarìa, noi avarìami, voi avarìati, iddi avarìani;
- Ghjirundiu prisenti: avendu;
- Ghjirundiu passatu: avendu avutu;
Cunghjugazioni in -à - Verbu amà:
- Indicativu prisenti: amu, ami, ama, amemu, ameti, amani;
- Indicativu imparfettu: amava/amaia, amavi/amaii, amava/amaia, amavami/amaiami, amavati/amaiati, amavani/amaiani;
- Indicativu passatu rimotu: ameti, amesti, ameti, ametimi, ametiti, ametini;
- Indicativu futuru: amaraghju, amarè, amarà, amaremu, amareti, amarani;
- Cunghjuntivu prisenti: ch'e ami, ch'è tù ami, ch'eddu (edda) ami, ch'è no amimi, chi voi amiti, ch'eddi amini;
- Cunghjuntivu inparfettu: ch'e amessi, ch'è tù amessi, ch'eddu (edda) amessi, ch'è no amessimi, ch'è vo amessiti, ch'eddi amessini;
- Cundiziunali: amaria, amaristi, amaria, amariami, amariati, amariani;
- Ghjirundiu prisenti: amendu;
- Ghjirundiu passatu: avendu amatu;
Cunghjugazioni in -a - Verbu veda:
- Indicativu prisenti: vecu, vedi, vedi, vidimu, viditi, vedini;
- Indicativu imparfettu: vidia, vidii, vidia, vidiami, vidiati, vidiani;
- Indicativu passatu rimotu: vidìsi, vidisti, vidisi, vidìsimi, vidìstiti, vidìsini;
- Indicativu futuru: vidaraghju, vidarè, vidarà, vidaremu, vidareti, vidarani;
- Cunghjuntivu prisenti: ch'e veghi, ch'è tù veghi, ch'eddu (edda)veghi, ch'è no veghimi, ch'è vo veghiti, ch'eddi veghini;
- Cunghjuntivu inparfettu: ch'e vidissi, ch'è tù vidissi, ch'eddu (edda) vidissi, ch'è no vidissimi, ch'è vo vidissiti, ch'eddi vidissini;
- Cundiziunali: vidarìa, vidarìsti, vidarìa, vidarìami, vidarìati, vidarìani;
- Ghjirundiu prisenti: videndu;
- Ghjirundiu passatu: avendu vistu;
Cunghjugazioni in -iscia o ì - Verbu finiscia o finì:
- Indicativu prisenti: finiscu, finisci, finisci, finiscimu, finisciti, finiscini;
- Indicativu imparfettu: finiscia, finiscii, finiscia, finisciami, finisciati, finisciani;
- Indicativu passatu rimotu: finiti, finisti, finiti, finitimi, finistiti, finitini;
- Indicativu futuru: finisciaraghju, finisciarè, finisciarà, finisciaremu, finisciareti, finisciarani;
- Conghjuntivu prisenti: ch'e finischi, ch'è tù finischi, ch'eddu (edda) finischi, ch'è no finischimi, ch'è vo finischiti, ch'eddi finischini;
- Conghjuntivu inparfettu: ch'e finissi, ch'è tù finissi, ch'eddu (edda) finissi, ch'è no finissimi, ch'è vo finissiti, ch'eddi finissini;
- Cundiziunali: finisciaria, finisciaristi/finisciarii, finisciaria, finisciariami, finisciariati, finisciariani;
- Ghjirundiu prisenti: finiscendu;
- Ghjirundiu passatu: avendu finitu;
- Numari : unu, dui, trè, quattru, cinqui, sei, setti, ottu, novi, deci, ondici, dodici, tredici, quattordici, quindici, sedici, dicessetti/diciossetti, diciottu, dicennovi, vinti, ..., trenta, quaranta, cinquanta, ..., centu, dui centu, ..., middi, dui milla, ...;
- Ghjorna : luni, marti, marcuri, ghjovi, vennari, sabatu, dumenica;
- Mesa : ghjinnaghju, frivaghju, marzu, aprili, maghju, ghjugnu, sittembri, uttrovi, nuvembri, dicembri;
- Staghjoni : branu, istati, vaghjimu, inguernu;
- Culori : biancu, neru, rossu], giaddu, turchinu, verdi, grisgiu, purpurinu, aranciu, castagnu.
[mudificà] Sopranomi
Eccu uni pochi di sopranomi frassitani:
- Armuracci, Bachjolu, Baffetta, Balanzinu, Balisgionu, Ballò, Ballunceddu, Bambineddu, Barbinu, Bavetta, Berrarè, Bibì, Bicorsu, Biduvà, Biondu, Bisèculu, Buggiani, Bula, Bulapani, Burgumanu, Bussi, Canfarrà, Capata, Capurali, Carbù, Carghjaca, Càrsini, Casetta, Casgiola, Cecconu, Chjalà, Chjalameddu, Chjirchjolu, Ciolla, Coda d'Agneddu, Cudonu, Culinu, Culumbonu, Cùpidu, Curcineddu, Currintinu, Custì, Femineddu, Framassonu, Frisgionu, Furchetta, Furtunedda, Gallonu, Ghjattinu, Ghjisè, Grisgionu, Grisgiu, Lamaghjonu, Lucciafocu, Macanettu, Maccareddu, Macconu, Macheddu, Maffronu, Manzolu, Masgera, Mescia, Muvronu, Muzzolu, Nasini, Pachjineddu, Paladini, Pantalinu, Piccatu, Pichjonu, Pidiolu, Pilinu, Pilucca, Pinzutu, Pironu, Pulvareddu, Pumpò, Purrinu, Rampinu, Rarrà, Rè, Ribugliu, Rinchjolu, Sannicà, Scaglinu, Scalonu, Sciambagliò, Sciambrì, Sfratatu, Sgribbu, Sparapetu, Sticchitu, Strinchettu, Suppironu, Tartarolu, Tinenti, Tiruddu, Tunduleddu.
[mudificà] Nomi
Eccu dinò i nomi cumuni in Frassetu:
- Agata, Andria, Angnula (Angnuledda), Angnula Francesca, Angnula Maria, Angnulinu, Angnulu, Angnul'Antonu, Angnulu Felici, Angnulu Francescu, Angnulu Maria, Anna Maria, Anton'Dumenicu, Anton'Ghjirolmu, Anton'Maria, Anton'Niculau, Anton'Paulu, Anton'Santu, Antonu (Antuneddu, Antunareddu), Antonu Ghjuvanni, Antonia (Antunietta, Antuniola), Austinu, Bartolu, Bastiana, Bastianu, Battisti, Battistina, Bianca, Bianca Maria, Cameddu, Chjara, Cristina, Carulu, Catalina, Cesaru, Cosima, Culomba, Dariu, Diana (Dianedda), Dumenicu (Duminiconu), Dumenicu Antonu Faustina, Felici, Felici Ghjuvanni (Felicianu), Filici (Filiciola), Filippu, Francesca (Cicchetta, Francischina), Francescu (Ceccu, Cicconu, Ciccaglionu), Francescu Antonu, Francesu Maria, Ghjacintu, Ghjacumu, Ghjacumina (Ghjacuminetta), Ghjaseppu, Ghjasepp'Antonu, Ghjaseppu Maria, Ghjasippina, Ghjirolma (Ghjirulmina), Ghjirolmu, Ghjudita, Ghjulia, Ghjuliu, Ghjuvanna, Ghjuvanni (Ghjuvanneddu), Ghjuvan'Antonu, Ghjuvan'Battisti, Ghjuvan'Francescu, Ghjuvan'Ghjacumu, Ghjuvan'Ghjaseppu, Ghjuvan'Lucca, Ghjuvan'Maria, Ghjuvan'Natali, Ghjuvan'Paulu, Ghjuvan'Petru, Ghjuvan'Santu, Graziosa, Larenzu, Laura, Lavisa, Lavisu, Lisandru, Livia, Lucca, Lucia, Lucianu, Lunardu, Marcu (Marcareddu, Marcateddu, Marcaghjolu), Marc'Antonu, Maria (Mariola), Maria Angnula, Maria Antonia, Maria Dumenica (Mineca, Minichedda), Maria Francesca (Mancecca), Maria Sanata, Mariana (Marianina), Marianu (Marianeddu), Marta, Martinu, Matalena, Matteiu, Micheli, Natali, Niculau, Niculina, Nunzia, Nunziu, Pancrazia, Pancraziu, Paduva (Padivedda), Paduv'Antonu, Pasquali, Paula, Paula Maria, Paulina, Paulu (Pulareddu, Pulanchjinu), Paul'Andria, Paul'Antonu, Paulu Austinu, Paulu Battisti, Petru (Petranchjinu, Pitrareddu), Petru Antonu, Petru Paulu, Petru Santu, Pitrunedda, Pitrina, Polu, Pumpeiu, Rosa, Rusina, Sabatina, Sabedda, Sabetta, Sagra, Santa, Santu, Saveria, Saveriu (Savirionu), Scenziu, Silvestru, Simonu, Sanvitu, Stefanu, Tavia, Taviu, Tiresa, Tumasgiu, Vintura, Vittoria.
[mudificà] Tuponimi
Uni pochi di tuponimi frassitani sò:
- l'Angnuli Filici, l'Arbaghju, Arghja Cillata, Arghja di Suppa, Arghja Vechja, Arusula, a Barrabedda, a Barrunciasca, Beddafiora, a Bocca di l'Era, a Bocca di u Manganu, i Botti, Busgiulacciu, a Caduta, a Cunsora, a Cuddetta, a Cuntegna, a Curia, a Fraulaccia, a Fuatedda, a Ghjalghetta Bughjosa, a Lama, a Muntagnola, a Saloppa, Caldaramodda, Campucavu, Casamattonu, Casanova, Centuliri, Chjudinu, Dossu Maiori, Forca d'Olmu, Funtana Secca, i Botti, i Cadiceddi, i Carabona, i Cruciati, i Cuddeddi, Malvezza, Mattacugnà, Peru, u Canapaghjolu, u Carponu, u Ciocciu, u Coddu di Furciolu, u Coddu di Vacchi, u Cucinaghju, u Cusaracciu, u Farraghjinali, u Forciu, u Frassu, u Griddu, u Lavunieddu, u Manganu, u Nivalonu, Petra di Cuccu, a Petra Quatrata, u Piazzili, u Pintali, u Pisinaghjolu, u Pozzu, a Ribba, a Rissalmaccia, u Riccineddu, u Rinàghjulu, i Sceniglietti, u Schincu, i Surbeddi, Taddonu, i Tardivi, Tassu, a Trifugliccia, l'Urbala, a Vaddi, i Vagantivi, a Valchera, Valeriu, a Vetta.
[mudificà] Pruverbii
Eccu una manata di pruverbii frassitani:
- À bocca chjusa, nè pani nè bonbucconi.
- A casa piglia, a casa rendi.
- A cavaddu dunatu, ùn fidià denti.
- A chì campa n'hà da veda.
- À chì l'attempa a perdi.
- À chì l'hà in culu l'hà in casa.
- À chì t'hà dui casi, in una ci piovi.
- À chì troppu si cala, u culu vi mostra.
- À chì ùn arrisica, ùn arrùzzica.
- À chì ùn sà piantà, pianta di nuvembri.
- A forza d'impittà, s'impara à marchjà.
- A ghjara cresci ma a forza manca.
- A ghjastema s'arrivolta.
- A ghjatta magra, a donna grassa, sò a vargogna di a casa.
- A lingua ossu ùn hà è ossu tronca.
- A machja, ochji ùn hà ma ochji teni.
- A tola è à lettu, alcunu rispettu.
- À un bon' cani li si dà un bon ossu.
- A vita hè una affaccata di balconu.
- A volpi perdi u pelu ma micca u viziu.
- Accantu u focu, a paglia ci stà mali.
- Aceddu in cabbia, s'eddu ùn canta d'amori, canta di rabbia.
- Ancu l'anori sò castighi.
- Andendu videndu.
- Aprili, desfa purcili.
- Acqua minuta, ghjugni à l'ossu, è ùn hè criduta.
- Carti ghjocani è ghjucadori si vanta.
- Casi frà li casi è vigni frà li vigni.
- Cavaddu di trenta, mai piu ch'eddi ci n'entri.
- Cavaddu vechju, zecchi è moschi.
- Ch'è lu mal' vicinu ùn durghi ch'è quant'è a nevi marzulina.
- Chì campa spirendu mori caghendu.
- Chi causa hà la gatta si a patrona hè matta.
- Chì di piombu tomba di piombu mori.
- Chì disprezza, compra.
- Chì muta, muga.
- Chì si chjina incù i ziteddi, s'arrizza camisgimerdosu.
- Chì ùn invechja, hè pena di vita.
- Chì va pianu va sanu E chi va sanu va luntanu.
- Chì vadagna in prima mani Si ni va à calzi in mani.
- Ciò chi hè scrittu in celi segui in terra.
- Cosa fatta, loda la !
- Fatti di notti, risa di ghjornu.
- Fora u denti Fora a pena.
- Ghjumenti pudditrata un bii mai aqua linda.
- Hè l'ochji di u patronu chì ingrassa u cavaddu.
- Hè megliu à stà accantu un cacadori Cà accantu un zuccadori.
- Hè megliu pocu chè micca.
- I guai di a pignatta Un i sà cà u cuchjaronu.
- I parenti Sò i denti.
- I più beddi peri i màngnani i porchi.
- I porchi si bàsgiani Annata di ghjandi.
- In cumpagnia, u frati presi moglia.
- In ogni lettu, ci hè pulgi.
- Indù l'àsinu mori, u pelu ci resta.
- Isciuta vindèmia, appicca a sporta.
- Laga u buddenti E succorri l'appartenti.
- L'ànima à Diu, e a ropa à chi si devi.
- L'ottu d'aprili U cuccu si devi sentire S'eddu un si senti Hè mortu o per murire.
- Mariteddu tamant'è un ditu Ièddu voli essa rivaritu.
- Matrimonii e viduvali So dal celi distinati.
- Mori più capretti chè capri vechji.
- Innanzi chè micca, maritu vechju.
- Nanzi ghjunta la so ora Nè si nasci nè si mori.
- Natu a parsona, natu u distinu.
- Nè in vènnari nè in luni Un dà principiu à a to funi.
- Nè ziteddi nè cateddi Un avvizzà à u to scudeddu.
- Ogni cecu piegni i so ochji.
- Ogni tontu t'hà u so filu.
- Ognunu sa ciò chi boddi in a so pignatta.
- Ora vivu ora mortu.
- Par cunnoscia la ghjenti, ci voli à mangnà una somma di sali insemu.
- Par maghju o par maghjonu Un ti caccià u to pilonu.
- Par via di u patronu si rispeta u ghjàgaru.
- Par viaghju s'acconcia a somma.
- Pècura nera e pècura bianca A chi mori mori, à chi campa campa.
- Più hè parenti E più ghjentri.
- Poni in terra e spera in Diu.
- Quand'è tù credi d'essa à cavaddu un sè mancu à pedi.
- Quandu a pràscula fiurisci e matura I ghjorni e i notti sò d'una misura.
- Quandu u ghjàcaru invechja, a volpi li piscia addossu.
- Quandu u porcu hè tecchju si volta a trova.
- Quandu u soli tramonta U pultronu s'appronta.
- Ronchi samirini un còddani in celi.
- Ropa chi un hè vista, un po essa stimata.
- Russura à la marina Bon' tempu la matina. Russura à la muntagna Aqua e ventu à li calcagna.
- Sé Bastèlica t'avia u portu Aiacciu saria l'ortu.
- Sè u ghjòvanu vulissi e u vechju pudissi.
- S'eddu suniteghja in Capu di Staghju Lascia puri u granu in arghja. S'eddu suniteghja in Capu di Muru Mettilu à u sicuru.
- Soldu di pòvaru omu e cuglia di ghjàcaru, un si ni poti mai piattà.
- Spezza u tempu in San' Bartolu.
- Tira più un pelu di muzza in cuddata Cà dui paghji di boia in falata.
- Tuttu lacatu hè persu.
- U boiu chi un vo bia Hè un gattivu zifulà.
- U cavaddu ghjastimatu, u pelu li luci.
- U celi à volta di pani S'eddu un piovi oghji, piovi dumani.
- U celi ùn si pò appuntiddà.
- U discorsu porta l'omu à a forca.
- U fretu di marzu ghjentri in u corru di u boiu.
- U lucchesu un hè sicuru Ca incu u so uncinu à u culu.
- U megliu oru hè quiddu chi piega.
- U mondu hè fattu à scala A chi codda e à chi fala.
- U peghju calciu hè quiddu di u cavaddu mansu.
- U Signori dà u biscottu à quiddu chi t'hà i denti.
- U Signori dà u fretu sicondu i panni.
- U soli marzulinu Di i donni fà strascinu.
- U troppu bè s'arrivolta.
- Un ci hè sàbatu senza soli Comu donna senza amori.
- Un disòrdini Faci un òrdini.
- Un fà mali chi hè piccatu. Ma un fà bè chi hè ghjittatu. Variante * ...chi hè mancatu.)
- Un ghjudicà a to vita Fin à l'òpara finita.
- Un hè bellu quel' chi hè bellu, quantu hè bellu quel' chi piaci.
- Un si po fà u passu più longu chè l'infurcatura.
- Un si po tena i dui pedi in u scarpu.
- Un ti rida di u mè dolu Quandu u meiu hè vechju, u toiu hè novu.
- Vali più un tontu à fattu soiu cà centu astuti à quiddi di l'altri.
[mudificà] Citazioni
Frassetu hè mintuvatu qualchì volta in a litteratura corsa. Par asempiu:
- in u pruverbiu: I muntona frassitani.
- in u pruverbiu: Aqua ruza di Cuzzà, fala in Frassetu è si ni và. (si dici cusì in Pila).
- in a Discrizzioni di a pievi d'Urnanu di i Poesie giocose di Monsignori di la Foata:
- Eccu à Frassetu, lu rè di la muntagna !
- La tramuntana, oh ! Com'edda lu tagna !
- Chì funtana à Centuliri !
- S'hè allargatu in piaghja è monti
- Ed hà buscu lu stradonu ;
- Ghjà divisu po da Coti
- Oghji hà persu molti voti.
[mudificà] Rifarenzi
- Della Foata, Paulu Matteiu, 1973, "Poesie Giocose in lingua vernacula della pieve d'Ornano"
- Franceschi, R. Combats et souffrances d'un village corse: Frasseto - Cumbatti è suffrenzi d'un paesi corsu: Frassetu - 1770-1850, 2001, Polyprint
- Poncin, L. Vida di u Taravu - Guide du Taravo, Alanu Piazzola, 2004 (in francesu)
- Peretti, Petru Paulu, Campu, 1966
[mudificà] Da veda dinò
'Ssu articulu hè in custruzzioni. Pudeti cuntribuiscia à a so redazzioni.
