Don Gregoriu Salvini
Don Gregoriu Salvini (Nesce, 1696 - Nesce, 24 dicembre 1789)[1] hè statu un puliticante, prete è scrittore corsu. Hè statu un amicu intimu di Pasquale Paoli. Incù i preti Erasmu Orticoni è Bonfigliu Guelfucci fù unu di i prutagunisti di a rivolta di a Balagna contru à a Ripublica di Genuva[2].
Biografia
[mudificà | edità a fonte]
Natu in u 1696 in u paese di Nesce in Corsica, chì tandu a Ripublica di Genuva si n'era impussissata, riceve a prima educazione da u ziu maternu Petru Murati, autore di Practica Manuale.
In u 1728 dopu à a morte di a so sposa, parte per Roma induv'ellu studieghja ancu à l'università di A Sapienza, eppoi diventa duttore in drittu civile è drittu canonicu. À Roma diventa cusì prete è scontra in u 1730 u so puetanu è canonicu Erasmu Orticoni di Santa Riparata di Balagna, aderendu tandu à l'idee di l'independintismu corsu contru à i dominatori genuvesi.
In seguitu Salvini si culloca à Napuli è di marzu 1736 sbarca in l'Isula Rossa induv'ellu cuntribuisce à a nascita di l'effimeru Regnu di Corsica sustinendu u "rè di Corsica" Tiadoru di Neuhoff. Don Salvini s'occupa di purtà e munizione da Livornu è di fà le sbarcà in l'Isula Rossa. U 6 aostu riceve un impurtante incaricu da u generale Luiggi Giafferi, Ghjuvanni Ghjacumu Ambrosi, Paulu Maria Paoli è Ghjuvanni Tommasu Giuliani per una missione sicreta in e cità tuscane per l'indipendentisti isulani. Firmarà dopu in Livornu per sei anni finu à u 1740.
Di sittembre di u 1737 da Livornu incù impurtanti persunaghji isulani scappati da l'isula scrive una lettera à u Rè Sole è à u so ministru, u cardinale André Hercule de Fleury per ghjustificà a lotta di i corsi contru à a Ripublica di Ghjenuva è evità cusì un qualunque aiutu francese à a Superba. Ma per disgrazia 'ssu desideriu falarà in u biotu è a storia anderà da tutt'altra parte.
U 13 nuvembre scrive à Pignon, consulu francese à Tunisi per chere un aiutu à u ministru di l'esteru francese Jean-Jacques Amelot de Chaillou è pruvà à fà una ricunciliazione trà francesi è corsi.
In u 1738 scrive à Orticoni di chere à i corsi di sottumette si à i francesi in funzione anti-genuvese, ma spiega Orticoni chì sò propriu i francesi chì aiutani i genuvesi.
In u 1740 lascia Livornu è và à Napuli induv'ellu s'uniscerà à altri esiliati corsi. In u 1742 si sposta à Gaeta induv'ellu scontra à Pasquale Paoli, cadettu di u righjimentu corsu. Incù Paoli ci serà una lunghissima amicizia è tremindui unisceranu e so forze per circà di liberà a Corsica.
In u 1750 volta in Corsica dopu à avè la lasciata quattordici anni prima è cerca di ristabilisce a pace in Balagna. In seguitu hè ancu numinatu diputatu di a Balagna occidentale dopu à a Cunsulta generale di a Corsica di Corti. D'uttrove di u 1753 dopu à l'assassiniu di Ghjuvan Petru Gaffori diventerà diputatu di a Balagna sana.
In u 1753 s'occupa ancu di i travagli per finisce a custruzzione di a Chjesa di San Ghjaseppu di Nesce, u so paese nativu.
In u 1755 participeghja attivamente à u ritornu di Pasquale Paoli in l'isula grazia à l'aiutu di u babbu Ghjacintu, datu ch'è tremindui avianu espressu a contrarietà per a cuntinuazione di l'esiliu in u Regnu di Napuli.
In u 1758 scrive a so opera principale, A Ghjustificazione di a rivoluzione di Corsica è di a ferma risoluzione presa da Corsi di mai più sottumette si à u duminiu di Genuva chì hè stampata à Napuli. In u 1764 publicheghja in Corti a terza edizione de A Ghjustificazione di a Rivoluzione di Corsica... mudifichendu ne u titulu in A Ghjustificazione di a Rivoluzione di Corsica cumbattuta da e riflessione d'un Genuvese è difesa da l'ossirvazione d'un Corsu.
In u 1765 hè elettu oratore di a Cunsulta Generale di Corte, mantene e cariche publiche finu à a caduta di a Ripublica Corsa guidata da u so amicu Pasquale Paoli, in u 1769 incù i novi patroni francesi si ritira in u so paese nativu induv'ellu assiste i travagli per a custruzzione per a paruchjale chì serà cunclusa in u 1784.
Murì in u 1789 in u so paese nativu à l'età di 93 anni, à l'alba di u crollu di l'Ancien Régime dopu à avè vissutu guasi un seculu di vita. Hè statu sipoltu incù a so surella Prassede Saladini-Salvini in a chjesa di Nesce.
Note
[mudificà | edità a fonte]- ↑ 'Ss'articulu pruvene in parte o in tutalità da l'articulu currispundente di a wikipedia in talianu.
- ↑ Trois prêtres balanins au coeur de a révolution corse : Erasmu Orticoni, Gregoriu Salvini, Bonfigliolu Guelfucci
Opere
[mudificà | edità a fonte]- A Ghjustificazione di a Rivoluzione di Corsica è di a ferma risoluzione presa da' Corsi di mai più sottumette si à u duminiu di Genuva, Napuli, 1758.
- A Ghjustificazione di a Rivoluzione di Corsica cumbattuta da e riflessione d'un Genuvese è difesa da l'ossirvazione d'un Corsu, Corti, 1764.
Riferenze
[mudificà | edità a fonte]- Anton' Dumenicu Monti, Adecec, Cronache 1, 1992