Scalinata Rinesi-Romieu

A Scalinata Rinesi-Romieu, chjamata in francese Escalier Romieu hè una scalinata munumentale situata in a cità di Bastia. Face a leia trà i dui quartieri storichi di A Citatella (Terranova) è di u Vechju Portu (Terravechja).

A scalinata Rinesi-Romieu hè stata fatta da l'architettu bastiacciu Paul-Augustin Viale à u XIXmu seculu ^[1] .

L'inseme chì cuntene A Scalinata Rinesi-Romieu, cù a ricciata San Carlu Vechju hè stata classificata munumentu storicu in u 2017 ^[2].

Origine di u nome

A Scalinata si chjamava prima « Scala Rinesi », di u nome di a famiglia Rinesi, una ricca famiglia di cummercianti bastiacci, chì fecenu custruisce a so casa famigliale, u Palazzu Rinesi, nant'à u latu sud di u Vechju Portu ^[3], in u quartieru di U Puntettu.

U giardinu è a scala Rinesi-Romieu è u Palazzu Rinesi

Una figliola Rinesi s'hè maritata cù un certu M. Romieu, cultellaghju di Langres, chì fece a ringhera di a scala ^[1] .

Pocu à pocu, u nome Rinesi hè statu sguassatu à prò di quellu di Romieu, nome datu à u giardinu, à a scala è à a casa Rinesi.

In u 2008, a cumuna di Bastia sott'à a mandatura d’Emile Zuccarelli hà iniziatu un travagliu nant’à i nomi di lochi, carrughji è piazze. Parechje lastre bislingue sò state messe à partesi da u 2014 . Da tandu, a scalinata ripigliò u so nome originale è fù chjamata ufficialmente « Scalinata Romieu, Scalinata Rinesi »^[4].

Storicu

A scalinata munumentale fù custruita trà l'anni 1871 è 1873 da l'architettu bastiacciu Paul-Augustin Viale. Include una funtana, una nichja cù una statua, vasi cù pedestali.

U cunsigliu municipale di l'epica hà vutatu « chì a scala Rinesi chì si trova nant'à u portu è chì s'offre à i primi sguardi di i stranieri chì venenu da u cuntinente deve esse fatta da a manera a più suntuosa ch'ellu si pò » ^[3] .

In u 1874 è u 1875, hè statu accunciatu u giardinu à cantu, chì hà pigliatu u nome di Giardinu Romieu ^[1] .