Listincu

U listincu
File:Listincu.jpg
Pistacia lentiscus
Classificazioni scentifica
Regnu	Plantae
Divisioni	Magnoliophyta
Classa	Magnoliopsida
Ordini	Sapindales
Famiglia	Rosaceae
Genaru	Pistacia
Nomu binuminali
Pistacia lentiscus Linnaeus, 1753

U listincu (o lustincu) (Pistacia lentiscus) hè un arburettu chì faci parti di a famiglia di l'Anacardiaceae.

Discrizzioni

U listincu hè altu trè o quattru metri. Fiurisci da marzu à aprili.

In Corsica

U listincu, com'è a scopa, l'arbitru o a ghjinestra, hè una pianta cumuna è tipica di a machja corsa.

Tassunumia

Parechji sinonimi di Pistacia lentiscus sò:

• Pistacia brevifolia
• Pistacia chia
• Pistacia gummifera
• Pistacia narbonensis

Usi

L'oliu

L'oliu hè sempri statu ottinutu in i rigioni di u Mediterraniu, à parta da l'ugliastru, eppo dopu, à parta da a variità cultivata: l'alivu. Ma in i tempi, si facia dinò, in Corsica com'è in Sardegna, un oliu di listincu. Si cugliia i picculi bachi di u listincu è si mittiani in una sporta. Dopu à a racolta, 'ssi bacareddi sò missi, beddi sparti, in un locu apartu duranti trè o quattru ghjorna. À u capu di qualchì ghjornu, i baghi perdini un pocu di a so acqua è diventani vizzi. Dopu si cacciani i vetti è i casci. Si caccia dinò a pula chì hè attaccata à i bachi. Dopu i bachi chì fermani si mettini in acqua è si facini bodda in una paghjola duranti una meza ora. Tandu si pò veda un dipositu niricciu annantu à i lati di a paghjola. È i graneddi diventani giaddi chjari. Si caccia dopu a sciuma da i graneddi chì sò diventati gonfii. Eppo i graneddi sò sfracicati.À la fini, s'otteni un oliu di culori verdi. 'Ssu oliu si pò cunsirvà duranti parechji anni, è ancu sin'à un dicenniu.

In u Maroccu, 'ssu oliu di listincu s'usava contra i brusgiaturi o par calmà u mal' di spinu. In casa, 'ssu oliu ghjuvava dinò par fà si u lumu. In parechji paesi di l'Africa di u Nordu è di l'urienti, l'oliu di listincu era mischiatu incù a pasta d'amanduli è a farina, par fabbricà speziu di buttirulu. In Sardegna, l'oliu di listincu si manghjava annantu à u pani biscottu.

L'oliu escinziali

À i ghjorna d'oghji, incù u listincu, si faci un oliu escinziali. Hà un' azzioni annantu à a circulazione sanguigna è linfatica.

Legnu

U lignamu di u listincu hè apprizziatu par travagli d'intarsiatura grazia à u beddu culori rossu vinatu. In i tempi era imprudatu par pruducia carbonu vigitali è ancu oghji hè apprizziatu par alimintà i forra à legna di i pizzarii chì a so cumbustioni parmetti di righjunghja in tempi rapiti alti tampiraturi.

U listincu era usatu à spessu in Corsica par fà i sporti, com'è a murta o a vetriccia. Si taglia à luna nova.

Resina

U masticu, vali à dì a resina di u listincu.

A resina di u listincu hè ditta masticu di Chio è in parechji lingui hè disignata incù u terminu di masticu. Di culori giaddu, era usata in i tempi com'è chewing gum ancu par a so azzioni benefica annantu à u cavu urali (purificanti di l'alitu).

In Chio, chì hè u locu di pruduzzioni di a resina d'ottima qualità, hè pruduttu un licori arumaticu dirivatu da a resina, incù funzioni dighjistivi, moltu apprizziatu: u "Mastika".

A resina si pò ottena pratichendu incisioni annantu à u fustu è annantu à i rami in cori d'istatina. Dopu si lava par eliminà l'impurità è si cunserva dopu à assiccamentu in cuntinidori di legnu.

Lessicu

U listincu hè ancu chjamatu u lustincu o a lustinca, è sundaru in Capicorsu.

Bibliugrafia

• Paulu Simonpoli, E piante salvatiche - Cunniscenze è usi, 1982, Parcu Naturale di Corsica
• Mai, B.T., Girard M., De Lanfranchi, F. (2005), U listincu: un "alivu" sminticatu ?, Stantari, pagine 41-46 (in francesu)

Da veda dinò

• l'arburetti di Corsica
• Amandulu
• Amarascu
• Baracucca

Liami

• U listincu (in talianu) Archiviu 2006-05-09 at the Wayback Machine
• U listincu