Sicilia

Sicilia
Nome ufficiale:	Sicilia
Statu:	Italia
Capilocu:	Palermu
Superficia:	25.708 km²
Pupulazione:	{{{pupulazione}}} ab.
Densità:	{{{densita}}} ab./km²
Pruvincie:	Agrigentu Caltanissetta Catania Enna Messina Palermu Ragusa Siracusa Trapani
Cumune:	390
Situ ufficiale

A Sicilia vista da u spaziu

A Sicilia (o Cicilia) (IPA: [siˈʧiːlja], Sicìlia in sicilianu, Siçillja in arbëreshë, Σικελία in grecu), ufficialamenti Regione Siciliana, hè una rigioni taliana autonoma à statutu spiciali di 5 089 386 abitanti, u capilocu essendu Palermu.

U territoriu di a rigioni hè custituitu guasi cumplittamenti da l'isula umonima, a più isula maiori di l'Italia è di u Mediterraniu, è ancu a 45ª isula più stesa in u mondu. A parti rimanenti hè custituita da l'arcipelaghi di l'Isuli Eolii, di l' Egadi è di l'Isuli Pelagii è da l'isuli di l'Isula d'Ustica è Pantellaria. Hè a rigioni più stesa di Italia è u so tarritoriu hè ripartitu in 390 cumuni chi sò custituiti in novi pruvinci. Hè l'unica rigioni taliana à cumpurtà dui cità frà i deci più pupulati d'Italia: Palermu è Catania. Hè bagnata à u nordu da u Mar' Tirrenu, à punenti da u Canali di Sicilia, à u sudu da u Mari di Sicilia, à livanti da u Mari Ioniu è à nordu-livanti da u strettu di Missina chì a sipara da a Calabria.

I più antichi tracci umani in l'isula ricoddani à u 12.000 a.C. circa. Duranti l'era protustorica si sò sviluppati i culturi ditti di Thapsos, di Castelluccio, di Stentinello. Populi pruvinenti da u cuntinenti talianu o da u Mediterraniu ci si stalletini dopu: trà eddi i Sicani, i Siciliani è l'Elimi. L'VIII seculu a.C. vedi a Sicilia culunizata da i Fenici è da i Grechi è in i 600 anni successivi divintà campu di battaglia di i guerri grecu-punichi è rumanu-punichi. L'isula fù cusì cunquistata da i Rumani è fù parti di l'imperu finu à a so caduta in u V seculu d.C..

A Sicilia fù cusì terra di cunquista è, duranti l'Altu Medievu, cunquistata da i Vandali, da l'Ostrogoti, da i Bizantini, da l'Arabi è da i Nurmani. Sottu quist'ultimi nascì u Regnu di Sicilia chì durò da u 1130 à u 1816, chì fù suburdinatu dopu à l'Aragunesu, à u Sacru Rumanu Imperu è, infini, à i Burboni sottu i quali si trasfurmò in Regnu di i Dui Sicilii. A Sicilia fù unita à u Regnu d'Italia in u 1860 incù un referendu, in seguitu à a spidizioni di i Milla vidata da Ghjaseppu Garibaldi duranti u Risurgimentu. In u 1946 a Sicilia, custituita in rigioni autonoma à statutu spiciali, hà di novu un parlamentu probbiu, sempri prima di a nascita di a Ripublica taliana.

Giugrafia fisica

Graficu incù l'altimitrìi di a Sicilia

A Sicilia hè a più isula grandi di u mari tarraniu. S'affaccia à u nordu annantu à u mar' Tirrenu. À nordu-livanti hè divisa da a penisula da u strettu di Missina ed hè bagnata à livanti da u mari Ioniu, à sudu-punenti hè divisa da l'Africa da u canali di Sicilia. L'isula hà una forma chì ricorda apprussimativamenti quidda d'un triangulu incù i trè siguenti vertici:

• Capu Peloro (o Punta di u faru) à Missina, à u vertici nordu-uriintali
• Capu Boeo (o Lilibeo) à Marsala, à u vertici nordu-uccidintali
• Capu Passero à Portopalo, à u vertici sudu-uriintali.

Capu Peloro, inoltri, rapprisenta l'estremità uriintali di a rigioni; l'isuli di Strombolicchio, Pantellaria è Lampedusa, inveci, rapprisentani rispittivamenti l'estremità sittintriunali, uccidintali è miridiunali.

Giulugia

Eruzione di u Strombuli

A Sicilia apparteni à a placca Siciliana Iblea, chì faci parti di a placca africana, eccituatu a parti nordu-uriintali chì apparteni à a placca euruasiatica. U muvimentu di a placca africana chì par subduzioni s'immerghji sottu à quidda euruasiatica hà ditarminatu a criazioni di i rilievi muntosi di a rigioni, è ancu a prisenza di friquenti attività sismichi tantu d'urigini tettonica ch'è vulcanica.

Trà 5,96 è 5,3 milioni d'anni, duranti u Messinianu (ultima fasa di u periodu Miocenu), u Mediterraniu firmò isulatu da l'uceanu Atlanticu prubabilamenti par via d'una crescita di l'attività tettonica. Quissa purtò à a crisa di salinità: u mari Tarraniu cuminciò à svapurà più lestru è a cuncintrazioni di u sali aumintò. Carbunati è sulfati funi dipusitati in grandi quantità annantu à i fundali è n'hè firmatu sempri traccia in i minieri di sali gemma è di ghjessu chì si poni truvà sempri in i pruvinci d'Agrigentu, Caltanissetta è Enna.

Un finominu giulogicu particulari hè u vulcanesimu sidimintariu, chì si scontra in i siti di i macalubi d'Aragona, in a pruvincia d'Agrigentu, è di i maccalubi di Terrapelata, à Caltanissetta. Stu raru finominu rendi l'aria vicina torbida, di culori bianchicciu è pupulata da una seria di vulcaneddi di fanga, alti circa un metru. U finominu hè liatu à a prisenza di tarreni arzillosi pocu cunsistenti, intercalati da liveddi d'acqua salmastra, chì stani sopra à boddi di gasu metanu sottupostu à una certa prissioni. U gasu, à traversu i discuntinuità di u terrenu, affiora in suparficia, trascinendu incun eddu sedimenti arzillosi è acqua, chì danu locu à un conu di fanga, chì a so summità hè tuttu à fattu simuli à un crateru vulcanicu. U finominu assumi un caratteru splusivu, incù spulsioni di materiali arzillosu mischiatu incèu gasu è acqua chi zirla à una certa altezza.

Vulcani

Par via di a so pusizioni, a rigioni è l'isuli circustanti sò tocchi da un'intensa attività vulcanica. I vulcani più impurtanti sò: Etna, Strombuli è Vulcanu. Ani a singularità d'appartena à trè tipulugii diffarenti: eruzioni di lavi basaltichi altirnendu incù periodi di calma par u prima; eruzioni cuntinui è funtani di lava, par u sicondu, chì i so carattaristichi sò stati presi com'è mudeddu tipulogicu da i scentifichi di u sittori, chì ani criatu u terminu tipu strumbulianu par disignà l'attività similari di i vulcani terrestri; infini di tipu splusivu o plinianu par u terzu, carattarizatu da longhi periodi d'apparenti calma è eruzioni viulenti.

Infini si ricorda l'attività eruttiva chì in u seculu XIX, in l'ariali di u canali di Sicilia oghji dinuminata bancu di Graham, hà inghjinaratu a nascita di l'effimera isula Ferdinandea.

Isuli minori

Una via tipica di l'isula di Panarea, incù abitazioni in stilu meditarraniu

A Sicilia hè una rigioni cumplittamenti insulari: hè custituita, più ch'è da un'isula principali, da un insemu d'arcipelaghi è d'isuli minori chì formani circa 1,11% di tutta a superficia rigiunali (circa 285,4 km² annantu à 25.711 km² tutali). Cumpresa l'isula di Sicilia, ci sò 19 isuli abitati (33.172 abitanti in i soli isuli minori).

I principali gruppi d'isuli di u grandi arcipelagu di a Sicilia sò l'Eolii, l'Egadi è i Pelagii; l'isuli di u Stagnonu è l'isuli Ciclopi, inveci, custituiscini dui picculi arcipelaghi rispittivamenti à punenti è à livanti di l'isula siciliana, di fronti à i costi di Marsala, in u trapanesu, è di Aci Casteddu, in u catanesu.

Ustica è Pantillaria, in u mar' Tirrenu è in u canali di Sicilia, formani dui cumuni distinti di i pruvinci di Palermu è Trapani. I centri storichi di Siracusa è Augusta, in u siracusanu, sò situati annantu à dui isuli culligati à a terraferma.

Monti di Sicilia

Rocca Novara ditta ancu Rocca Salvatesta, monti Peloritani

A Sicilia hè una rigione per u più cullinare (per u 61,4% di u territoriu), mentre per u 24,5% hè muntosa è per u ristante 14,1% hè para (a pianura più grande hè quella di Catania). U rilievu hè variu è, mentre in a Sicilia orientale si pò ricunnosce in l'Appinninu sicilianu, a cuntinuazione di l'Appinninu calabru, a Sicilia cintrale è occidentale ospiteghjanu parechji massicci isulati. Si trova in e Madonie a siconda vetta più alta di l'isula: u pizzu Carbunara (1979 metri).

À u centru di a Sicilia ci sò i Monti Erei annantu à i quali si trova, à 948 metri d'altezza, a cità d'Enna; mentre in a fascia sudu-orientale trà a pruvincia ragusana è quella siracusana si trovanu i monti Iblei di i quali a cima più alta, u monte Lauro, ghjunghje à un'altezza di 986 m. À punente sorghjenu altri monti d'altezza variabile, com'è i Sicani, di i quali a cima più alta hè u monte Cammarata (1578 metri), è i monti chì circondanu a Conca d'Oru, a pianura induve, affacciata annantu à u mare, si stende Palermu, a cità chì hè u capilocu di 'ssa rigione. À livante cumparisce, visibule da u Strettu di Missina, è ancu da a cima calabresa di l'Aspromonte, a cima annivata di l'Etna, altu 3.343 metri. Incù e so frequente eruzione, l'Etna hà cupertu u territoriu di u circondu di a so lava nera. Cuntrariamente à ciò chì si pudaria pinsà, però, a piana vicina di Catania ùn hè micca d'origine vulcanica, bensì d'origine alluviunale, essendu stata criata da i l'alluvioni traspurtati in i seculi da i fiumi Dittaino, Gornalunga è Simeto.

I gruppi muntosi in Sicilia.

Gruppu muntosu	Cima più alta	Altezza
Madonie	Pizzo Carbonara	1.979 m
Nebrodi	Monte Soro	1.847 m
Monti Sicani	Rocca Busambra	1.613 m
Peloritani	Muntagna Grande	1.347 m
Monti di Palermu	Monte Cuccio	1.050 m
Monti Erei	Monte Altesina	1.142 m
Monti di Trapani	Monte Sparagio	1.110 m
Monti Iblei	Monte Lauro	986 m

Fiuma è lava

U papiru di u fiumu Ciane

I fiuma siciliani sò tutti di purtata è estinsioni limitata. Quiddi di l'Appinninu à u nordu sò chjamati fiumare, è ani una natura di turrenti chi d'istati sò guasi sempri secchi. L'unichi corsi d'acqua chì t'ani diminsioni impurtanti sò l'Imera Miridiunali, u più longu di l'isula, è u Simeto, quiddu incù u bacinu idrugraficu u più ampiu. Sfocianu in u Mari Ioniu u Simeto, l'Alcantara, l'Agrò, u Ciane è l'Anapo, in u Mari Tirrenu l'Imera Sittintriunali è u Torto, mentri in u canali di Sicilia u Platani, l'Imera Miridiunali (o Salso) è u Belice.

Par ciò chì riguarda i lava naturali, eccituatu u Lavu di Pergusa è quiddu mezu artificiali di u Lavu Biviere di Lentini, a Sicilia ni hè guasi priva. U lavu di Pergusa, d'urighjini paleuvulcanica, hè celebru par l'antichissimi miti è lighjendi chì u cuncernani è par a fauna è par a flora chì u circonda. Tuttu intornu ad eddu corri un autudromu, chì era in i tempi sediu d'un Gran'Premiu di formula 3000. U lavu hè oramai à risicu d'assiccamentu, chì ùn hà micca immissarii, par via di u custanti prilivamentu d'acqua par usu civili. A custruzzioni di dighi hà criatu grandi lava artificiali, com'è u lavu di l'Ancipa è u lavu Pozzillo (u più maiò di l'isula). Da mintuvà sò dinò u lavu Aranciu, u lavu di Piana di l'Albanesi è u lavu d'Ogliastro.

Fiumu	Lungh.	Prov.
Imera miridiunali	144 km	AG - CL - EN - PA
Simeto	113 km	CT - ME
Belice	107 km	AG - PA - TP
Dittaino	105 km	EN - CT
Platani	103 km	AG - CL - PA
Gornalunga	81 km	CT - EN - SR
Gela	74 km	CL - EN
Salso Cimarosa	72 km	EN
Torto	58 km	PA
Irminio	57 km	RG

Cultura

Scrittori siciliani

• Giuseppi Tomasi di Lampedusa
• Liunardu Sciascia
• Gesualdo Bufalino
• Giuvanni Verga
• Lucio Piccolo
• Luiggi Pirandellu
• Eliu Vittorini
• Vitalianu Brancati
• Andrea Camilleri
• Salvaturi Quasimodo

Cucina è Gastrunumìa

Viditi puri Cucina siciliana.

• Alici crudi a lumìa
• Nvultini di pisci spata
• Capunata
• Parmiggiana Siciliana
• Pasta chî sardi
• Maccu di favi
• Macchiruna à a Siciliana
• Paneddi di cici
• Purpetti di nannatu
• Salmurigghiu
• Arancini
• Piscistoccu à a Missinisi
• Pizza fritta à a Siciliana
• Mustazzuli Siciliani
• Cannoli
• Pasta riali
• Zeppuli di risu
• Granita
• Cassata
• Frutta Marturana
• Sfinciuna di risu
• Torta di mennuli
• Torta di pistacchiu
• Pignuccata

Noti

Da veda dinò

• Munarchi di Sicilia
• Rigioni d'Italia.
• Vulcanulugia
• Trisceli
• Folklori
• lingua siciliana
• pruverbii siciliani
• Agrigentu
• Caltanissetta
• Catania
• Enna
• Messina
• Palermu
• Ragusa
• Siracusa
• Tràpani