Guglielmu di Massa
Guglielmu di Massa (Guglielmu I Salusiu IV, 1160-1214) hè statu un nobili talianu chì fù Ghjudici di Cagliari da u 1190 à u 1214 è cuntrullaia in parti l'isula di Sardegna. [1]
Urighjini[mudificà | edità a fonte]
Guglielmu marchesi di Massa hè u nipoti par allianza d'un Ghjudici pricidenti di Cagliari Pietro Torchitorio III. A so mamma hè difatti Giorgia di Lacon-Gunale una fiddola minori di Custantinu II Salusio III, mentri chì u so patri hè un nobili urighjinariu di Liguria di a famidda di l'Obertenghi, Oberto marchesi di Massa in Tuscana è di Corsica. Hè à l'urighjini d'una nova dinastia sarda ditta i " Lacon-Massa " chì si spignarà incù i so bisfiddoli[2].
U cunquistadori[mudificà | edità a fonte]
U regnu di Guglielmu di Massa hè carattarizatu da una pulitica d'aggrissioni cuntinui contru à l'altri Regni sardi chì li parmetti di duminà una parti maiò di a Sardegna.
Da u 1188 incù u so patri Oberto s'impatrunisci di u Regnu di Cagliari è ni spussessa u so ziu maternu par allianza Pietro Torchitorio III di Lacon-Gunale. Dopu à a morti di u so patri Oberto di ghjinnaghju di u 1190 si pruclama Ghjudici sottu à u nomu di " Guglielmu Ier Salusio V ". Cuntinuighja i so cunquisti incù a presa di cuntrollu in u 1194 di u Regnu di Torres, dirighjitu à l'ebbica da Custantinu II di Torres, accupa u casteddu di u Goceano induv'iddu imprighjunighja Prusininda, a cunsorti catalana di u Ghjudici è chì malgradu i prissioni di u papa Celestinu III chì intarcidia par a so libarazioni, mori di fami in cattività l'annu dopu in Sant'Igia (1195). Ni cunserva u cuntrollu di u Regnu dendu una di i so ziteddi Agnesi, com'è cunsorti à u futuru Marianu II di Torres.
Di frivaghju di u 1196 s'impatrunisci di u Regnu d'Arburea dopu à avè vintu in un cumbattimentu u Ghjudici Pietro Ia di Lacon-Serra, codirighjenti d'Arburea dapoi u 1192 incù u so nipoti. Incù Ugone Ia di Bassu, pidda a cità d'Oristanu, capitala di u Regnu, ch'iddu incendia cù u fini d'ubbligà u cleru è u populu à ricunnoscia lu com'è u so suvranu. Petru Ia è u so fiddolu Barisone sò catturati è imprighjunati mentri chì Ugone si rifughja à Genuva induv'iddu ferma alminu insin'à 1198. Guglielmu di Massa diventa cussì par un tempu u Ghjudici di Cagliari, è d'Arburea unifichendu cussì difatti i dui Regni.
Quand'iddu mori u Ghjudici Barisone II di Gaddura in u 1203, lascendu com'è sola eredi una zitedda Elena, Guglielmu prova à fà li spusà u so probbiu cugnatu Guglielmu Malaspina. 'Ssu prugettu fiasca è Elena s'unisci à un nobili Pisanu, Lamberto Visconti. Guglielmu di Massa neguziighja à listessu tempu un accordu incù Ugone Ia di Bassu è li pruponi a so zitedda minori Precioza com'è sposa. Ugone accetta, ritrova u so Regnu è l'unioni hè cunsumata in u 1206.
In u 1213 Guglielmu di Massa devi fà fronti à l'oppusizioni di i so novi rivali, a fazzioni di a Visconti di Pisa ed hè scunfittu vicinu à a vadina Frigido in u circondu di Massa, in Tuscana. 'Ssa dirrotta metti difinitivamenti fini à i so ambizioni di cunsulidà a so duminazioni annantu à a Sardegna è di mantena u so cuntrollu annantu à i pussidimenti cuntinintali riditati da u so patri. Guglielmu mori in u 1214 è a so zitedda maiori Benedetta di Cagliari li succedi incù u so maritu Barisone Torchitorio IV d'Arburea.
Unioni è pusterità[mudificà | edità a fonte]
Guglielmu di Massa si marita dui volti incù:
1) Adelaide, fiddola di Moruello Malaspina chì n'avarà dui fiddoli femini ch'iddu improda par cunsulidà i so allianzi:
- Benedetta di Cagliari (morta in 1232), a so fiddola maiori è eredi chì in u 1214 si marita incù Barisone III d'Arburea (mortu 1217), u fiddolu di u vintu Pietro Ia po incù Lamberto Visconti di Eldizio è infini incù Enrico di Ceola è Rinaldo Gualandi.
- Agnese (morta dopu à 1256), futura regenti, chì sposa prima Marianu II di Torres, sò i parenti d'Adelasia di Torres, po Ranieri della Gherardesca (mortu in 1248).
2) Guisiana Burgundione, fiddola di Guido Burgundione, conti di Capraia. N'avarà una fiddola:
- Preziosa (morta versu u 1230) ch'iddu dà com'è cunsorti in u 1206 à Ugone Ia di Bassu, Ghjudici d'Arburea (mortu in 1217).
Noti[mudificà | edità a fonte]
- ↑ 'Ss'articulu pruveni in parti da l'articulu currispundenti di a wikipedia in francesu.
- ↑ in Situ d'I. Mladjov Medieval Sardinia (Sardegna).
Bibliugrafia[mudificà | edità a fonte]
- Francesco Cesare Casula, A Storia di Sardegna, Sassari, 1994. (in talianu)
- Raimondo Pinna, Sant' Igia, a città del giudice Guglielmo, Roma, 2010. (in talianu)
- Gian Giacomo Ortu La Sardegna dei giudici, Regione autonoma della Sardegna, 2005, ISBN|8889801026 "L'avventure di Guglielmo" p.126-133. (in talianu)