Filosofia
A parolla filosofia vene da u grecu anticu φίλος (filos) = amore è σοφία (sofìa) = sapienza è significheghja l'amore di a sapienza. Ma a definizione di a filosofia ferma in sè stessu un prublema filosoficu. Esistenu dunque parechje definizione di a filosofia.
Storia
[mudificà | edità a fonte]I filosofi dividenu a longa storia di a filosofia occidentale in filosofia antica, filosofia medievale, filosofia moderna è filosofia contemporanea.
A filosofia antica hè dominata da trè filosofi: Socrate, Platone è Aristotele.
A Filosofia medievale custituisce un impurtantu ripensamentu di tutta a tradizione classica, sottu à l'influenza di i trè grandi monoteisimi. I nomi più importanti d'issu periodu sò: Avicenna è Averroè in u mondu islamicu, Mosè Maimonide in u mondu ebraicu, Abelardu, Tumasgiu d'Aquinu è Duns Scotus in u mondu cristianu.
A Filosofia moderna si stende da 1400 sin'à circa 1800; i più importanti pensatori muderni funu tandu René Descartes, Baruch Spinoza, Thomas Hobbes, John Locke, David Hume è Immanuel Kant.
A Filosofia di u XIX seculu hè stata dominata da a filosofia post-kantiana di l'idealisimu tedescu è da filosofi idealisti cum'è Georg Wilhelm Friedrich Hegel, F. H. Bradley, o da filosofi cum'è Karl Marx. Altri importanti pensatori d'issa perioda sò stati John Stuart Mill, Ralph Waldo Emerson, Søren Kierkegaard è Friedrich Nietzsche.
In a Filosofia di u XX seculu i filosofi europei è americani hanu pigliatu diverse strade. A Filosofia analitica, incù Bertrand Russell, G. E. Moore, è Ludwig Wittgenstein, si sviluppa soprattuttu à Oxford è Cambridge, induve si riuniscenu ancu l'empiristi logichi emigrati da a Germania è da l'Austria (per esempiu Rudolf Carnap) è altri americani (cum'è W. V. O. Quine, Donald Davidson, è Saul Kripke), o filosofi di lingua inglese (per esempiu A. J. Ayer).
In Europa (specialmente in Germania è in Francia), u fenomenologu tedescu d'origine ebraica Edmund Husserl è u so discepulu Martin Heidegger aprenu a strada, prestu suvitati da Jean-Paul Sartre è altri esistenzialisti, à una varietà di discipline filosofiche.
Discipline filosofiche
[mudificà | edità a fonte]
Cum'è ogni campu di studiu accademicu, a filosofia si sparte in numerose sottudiscipline. Pare chì a filosofia cimmporti un numeru particularmente impurtantu di discipline, in maiò parte à causa di u fattu ch'ellu esiste una tendenza à sviluppà una "filosofia di", per guasi tuttu ciò chì pò esse studiatu. Frà mezu à e sottudiscipline di a filosofia, si pò mintuvà particularmente: a logica, a metafisica, a filosofia di a mente, a filosofia di u linguaghju, l'epistemologia, a filosofia di a scenza, l'etica è a filosofia pulitica, chì ponu esse cunsiderate cum'è sottudiscipline centrale di a filosofia.
- l'Epistemologia: u concettu di epistemologia pussede dui significati differenti. Da un latu, soprattuttu in u mondu anglusassone, hè usatu per riferisce si à a disciplina filosofica chì si occupa di a natura, di e limite è di a validità di a cunniscenza. Da l'altru latu, in u mondu europeu, hè usatu per riferisce si à a riflessione filosofica annantu à a scenza è in issu casu hè sinonimu di filosofia di a scenza.
- l'Estetica: u studiu di e questione filosofiche cuncernendu l'arte è a bellezza.
- l'Etica: u studiu di ciò che rende una azzione ghjusta o mala, in rapportu incù i problemi morali.
- a Logica: u studiu di e convenzione per furmà una argumentazione curretta. Include a logica furmale, cum'è i sillogisimi aristotelici è a logica proposizionale.
- a Filosofia di u linguaghju: u studiu di i concetti di significatu è di verità.
- a Filosofia di a mente: u studiu filosoficu di a natura di a mente, è a so relazione incù u restu di u corpu è u restu di u mondu.
- a Filosofia di a religione: u studiu di u sensu di u concettu di Diu è a raziunalità di a credenza in l'esistenza di Diu.
- a Filosofia di a scenza: include, oltre e "filosofie di" parechje scenze particulare (fisica, biologia, ecc.), e questione relative à l'induzione, a metodologia scentifica, u progressu scentificu, ecc.
- a Filosofia di a biologia: u studiu filosoficu di parechji concetti impurtanti di a biologia, cum'è a nozione di spezia.
- a Filosofia di a fisica: u studiu filosoficu di parechji concetti fondamentali di a fisica, trà i quali si pò mintuvà: u spaziu, u tempu è a forza.
- a Filosofia di a matematica: u studiu di e questione filosofiche in relazione incù a matematica.
- a Filosofia di a psicologia: u studiu di parechje questione fundamentale cuncernendu i metodi è i concetti di a psicologia e di a psichiatria.
- a Filosofia di e scenze sociale: u studiu filosoficu di parechji cuncetti è metodi di e scenze sociale cum'è a sociologia è l'economia.
- a Filosofia di a storia: u studiu di i metodi cù i quali a storia hè interpretata è accettata.
- a Filosofia pulitica: u studiu di ciò chì cuncerna u guvernu, u scopu di u statu, a ghjustizia pulitica, a libertà pulitica, a natura di u drittu è a ghjustificazione di a punizione.
- a Filosofia di a tennica: u studiu di l'origine, di u sensu è di e conseguenze di l'arte, di e tenniche è di a tennologia cuncernendu l'essere umanu.
- a Metafisica (chì cumprende l'ontologia): u studiu di e categurie fondamentale di e cose, cum'è l'esistenza, e proprietà di l'ogetti, a causalità.
- a Storia di a filosofia: u studiu di i scritti di i filosofi di u passatu, è a so interpretazione.
- a Teoria di a cunniscenza.
Filosofia applicata
[mudificà | edità a fonte]A filosofia hà dinù applicazione pratiche. Frà quessi, si pò mintuvà: l'etica è a filosofia politica. E filosofie politiche di John Locke, Jean-Jacques Rousseau, Karl Marx, John Stuart Mill, è John Rawls hanu datu forma (o sò state usate per ghjustificà) à i guverni e à e so azzione. A filosofia di l'educazione merita ancu ella attenzione; l'educazione progressiva prumossa da John Dewey hà avutu un impattu prufondu annatu à e pratiche educative di u XX seculu.
Altre applicazione importante, ma menu immediate, si ponu truvà in epistemologia, chì aiuta à definisce e nozione di cunniscenza, di prova è di credenza ghjustificata. A filosofia di a scenza discute i fundamenti di a metodologia scientifica. L'estetica pò aiutà à interpretà l'arte. Ancu l'ontologia, sicuramente a più astratta è prima facie a menu pratica trà e branche di a filosofia, hà avutu consequenze importante per a logica è l'informatica. In generale, e varie "filosofie di", come la filosofia di u drittu, ponu furnisce à i specialisti di i campi rispettivi una cunniscenza più prufonda di e base teoriche è concettuali di a so propria disciplina.
