Barbada

A Barbada hè un Statu isulanu indipindente, fendu parte di e Piccule Antiglie, geugraficamente situatu in America di u Nordu, à a fruntiera trà u mare di i Caraibi è l'oceanu Atlanticu. L'isula occupa una superficia di 430 km², è hè per u più piana, incù une poche di piccule culline indrentu à e terre. A capitale hè Bridgetown è a lingua officiale hè l'inglese.

Etimologia

L'origine di u nome "Barbada" hè appena contruversa. I Portughesi, in istrada ver' di u Brasile, o i Spagnoli, sò cunsiderati cum'è i primi Europei à avè sceltu u nome di l'isula.

Pare ch'è u nome Barbada sia derivatu da u termine portughese os barbados (i barbuti), datu à l'isula in u 1536 da l'espluratore portughese Pedro A. Campos perchè e longhe radiche aerie chì pendianu da e fiche barbute (Ficus citrifolia), originarie di l'isula, s'assumigliavanu à "barbe". U nome datu à l'isula da u populu indigenu Arawak era Ichirouganaim.

Storia

Nanzu à a ghjunta di l'Europei, a Barbada era pupulata da l'Amerindiani Caribi è Arawak. In u 1536, l'espluratore portughese Pedro Campos hè ghjuntu annantu à l'isula. Uni pochi di anni dopu, i cunquistadori spagnoli anu aghjuntu l'isula di i Caraibi è anu riduttu in schiavitù numerosi indigeni. Menu di un seculu dopu, in u 1625, l'Inglese Henry Powell sbarca annantu à l'isula ignurata da i Portughesi è i Spagnoli perchè ùn dispone micca di risorse minerale impurtante è l'occupa à nome di a curona inglese. Impressiunatu da a vegetazione in fiorisi è a ricchezza di a terra, hè partutu, lascendu daretu ad ellu 80 culoni è uni pochi di schiavi per cumincià i travagli di culunisazione in a rigione di Holetown, per vultà in u 1627, quandu Powell hè diventatu u prima guvernadore di a Barbada. I rari abitanti autoctoni rimanenti, l'Arawak, sò morti è a Barbada hè dunque stata ripupulata incù i schiavi africani impiigati in e piantazione di zuccheru insin'à 1834, data a a quale a schiavitù hè statu abulita.

Statua di Bussa, Bridgetown. Bussa hè statu u capimachja di a più grande ribellione di schiavi di a storia di a Barbada.

À parte si da l'epica Cromwelliana, un grande percentu di a pupulazione di travagliadori bianchi era custituitu di servi sottu à cuntrattu è di persone traspurtate involuntariamente d'Irlanda. A riduzione di l'attraenza di l'impiegu à a Barbada, cumbinata à l'enorma dumanda di manu d'opera cagiunata da a cultura di u zuccheru hà cunduttu à l'usu di u trasportu furzatu ver' di a Barbada per punisce i criminali o i prigiuneri pulitichi, ma ancu à a cacciatura di travagliadori mandati à a Barbada contru a so vulintà. I servi sottu à cuntrattu irlandese, cunnisciuti sottu u nome di "Redlegs", anu custituitu una parte impurtante di a pupulazione mentre tutta u periodu induve i servi sottu à cuntrattu bianchi eranu imprudati per i travagli di piantazione. Un flussu custante di servi sottu à cuntrattu irlandese, pruvucatu da i sforzi di Cromwell per impone a pace in Irlanda, hè entrutu à a Barbada tuttu à longu à u XVIIu seculu.

In cuntrariu di a maiò parte di l'isule di i Caraibi, chì u so cuntrollu hà cambiatu parechje volte di mane trà e differente putenze culoniale, a Barbada hè sempre firmata sottu à cuntrollu britannicu. Sient'è certi, a raghjone di 'ssa situazione hè ancu geugrafica. Difatti, quandu l'isule di Antiglie formanu un arcu chì a so cunvessità hè girata ver' di l'oceanu Atlanticu, a Barbada hè a sola à esse cullucata ver' di u steriore di 'ss'arcu, è, contu tenutu di u rigimu supranante di i venti atlantichi, in una direzzione à u ventu. I navigatori chì vulianu attaccà la eranu dunque custretti di navigà à u ventu, incù grande difficultà. Quessa hà lasciatu e tracce annantu à l'isula è annantu à u modu di campà di a so pupulazione, ancu s'è quessa hè oghje largamente cumposta da persone d'origine inglese.

In u 1833, a Barbada hè stata intigrata à l'isule britanniche di u Ventu è u guvernadore di a Barbada era ancu u guvernadore di 'ssa entità amministrativa. A Barbada hè stata spiccata da l'isule britanniche di u Ventu in u 1885, data a a quale ella hè stata stabilita cum'è una culonia distinta. In u 1958, hà fattu parte di a Federazione di l'Antiglie, chì hè stata sciolta in u 1962, è in u 1966, a Barbada hè diventata un riame indipindente di u Commonwealth

Dopu à un'intruduzione prugrissiva di riforme pulitiche è suciale in l'anni 1940 è 1950, u turismu è l'artigianatu anu varcatu l'industria di u zuccheru in impurtanza ecunomica in l'anni 1990.

A Barbada hè diventata indipindente in seguitu à l'Attu d'indipendenza di a Barbada di 1966.

U 30 di nuvembre 2021, data di u 55 e anniversariu di l'indipendenza rispettu à u Regnu Unitu, a Barbada hà abbandunatu a munarchia parlamintare cum'è forma di guvernu per diventà una ripublica parlamintare. Sandra Mason, chì era prima guvernadore generale, hè diventata a prima presidente di a nuvella ripublica.

Geugrafia

A Barbada hè cumposta per u più di calcariu. Hè un'isula trupicale, custantemente scuzzulata da i venti equaturiali. Una parte di l'internu di l'isula hè cuperta di grande piantazione di canna da zuccheru. A Barbada face parte di e Piccule Antiglie. Si trova à livante di a catena principale d'isule, è i paesi i più vicini sò Santa Lucia è San Vincenzu è e Grenadine. A più alta muntagna hè u Monte Hillaby chì aghjunghje un'altezza di solu 350 metri sopra à u livellu di u mare. Hè situata à 13° N 59° W, vene à dì à l'incirca 434,5 km à u nordestu di u Venezuela.

Ùn ci sèo micca bacini lacustri significativi. Une poche di fiumi scorrenu da e parte e più alte di l'isula ver' di u mare ma, essendu datu a distanza mudesta di u mare, ùn facenu ch'è uni pochi di chilomitri è anu un rigimu turrenziale.

Clima

U clima hè trupicale, altirnendu trà una staghjone secca (da dicembre à maghju) è una staghjone di e piuvite (da ghjugnu à nuvembre) ; e pricipitazione sò più impurtante indrentu à u paese. E timperature varieghjanu trà una media di 22 °C mentre i mesi i più freschi è 30 °C mentre i mesi i più caldi.

Sucità

Gruppi etnichi

Circa 80 à 90 % di l'abitanti di a Barbada (in modu familiare chjamati Bajan) sò d'origine africana : sò per u più i discendenti di schiavi impiigati in e piantazione di zuccheru. U restu di a pupulazione hè cumpostu di Asiatichi è di Europei, frà i quali si trovanu i " redlegs ".

Lingua

E lingue officiale sò l'inglese è u bajanu, a lingua creola di l'isula.

Riligione

A riligione a più sparta hè u prutistantismu anglicanu. E minuranze di cattolichi, di musulmani sò prisenti.

Econumia

A Barbada hè u 51imu paese u più riccu di u mondu in termini di PIB (produttu internu rozu) per abitante. Pussede difatti un'econumia mista bella sviluppata è un livellu di vita muderatamente elevatu.

U Parlamentu di a Barbada in Bridgetown

Sturicamente, l'econumia di a Barbada dipendia di a cultura di a canna da zuccheru è di l'attività cunnesse, ma à parte si da u 1970 è di a fine di l'anni 1980, s'hè diversificata in i sittori tali l'industria manufatturiera è u turismu. Dapoi l'anni 1990, a Barbada hè cunsiderata cum'è un paese favurevule à l'affari è ecunumicamente sanu. L'isula hà cunnisciutu un boom di a custruzzione, incù u sviluppu è u reaccunciamentu d'alberghi, di cumplessi di scagni è di lughjamenti. L'amministrazione ricente anu cuntinuatu i so sforzi per riduce u disimpiegu, incuragisce l'invistimenti stranieri è privatizà l'imprese publiche rimanente. U disimpiegu hè statu riduttu à l'incirca da 14 % à menu di 10 %.

I partenarii cummerciali tradiziunali di a Barbada sò u Canada, a Cumunità di i Caraibi (in particulare Trinidad è Tobagu), u Regnu Unitu è i Stati Uniti.

A Barbada occupa a terza piazza per a più grande borsa di a rigione di i Caraibi. Attualmente, i irispunsevuli di i scambii studieghjanu a pussibilità di aumintà i scambii lucali.

Media

CBC TV 8 hè una stazione di televisione naziunale gistita da u guvernu.

Cultura

Siti di u patrimoniu mundiale

Un situ di a Barbada hè statu iscrittu annantu à a lista di u patrimoniu mundiale di l'UNESCO: si tratta di a cità storica di Bridgetown è di e so annesse (2011).

Produzzione litteraria

Frà i pueti barbadiani impurtanti di i XXu è XXIu seculi, si ponu cità Kamau Brathwaite, chì hà vintu parechji premii|prezzi è ricumpense.

Musica

A Barbada hè u locu di nascita di a canterina Rihanna, chì hè stata numinata eruina naziunale di a Barbada, è di u DJ Grandmaster Flash.

Una forma di musica populare hè u Tuk Band.

Sporti

A Barbada hà ottenutu grandi risultati in atletismu incù Ryan Brathwaite, campione di u mondu di u 110 metri sepe à Berlinu 2009. A Barbada à i Ghjochi olimpichi hà sin'à avà vintu una midaglia di bronzu in atletismu incù u sprinter Obadele Thompson à Sydney 2000. Inoltre, a squadra naziunale di ballò di a Barbada hà terminatu sicondu di a Cuppa di i Caraibi in u 1985.

Organisazione di u Statu

Divisione amministrative

L'11 parochje di a Barbada sò:

1. Christ Church
2. Saint Andrew
3. Saint George
4. Saint James
5. Saint John
6. Saint Joseph
7. Saint Lucy
8. Saint Michael
9. Saint Peter
10. Saint Philip
11. Saint Thomas

U territoriu di a Barbada hè divisu in 11 parochje. 'Ssa dinuminazione scelta vene da a prisenza storica di a riligione anglicana annantu à l'isula. A taglia è e limite di e parochje sò state diterminate partendu da e limite di e piantazione di cutone, di canna da zuccheru è di tabaccu prisente mentre u periodu culoniale annantu à l'isula.

Pulitica

Pulitica interna

A Barbada era una munarchia parlamintare di 1966, data a a quale u paese hè diventatu indipindente da u Regnu Unitu, sinu à u 30 di nuvembre 2021, data a a quale ella hè diventata una ripublica parlamintare ; Sandra Mason, presidente eletta da e duie camere di u Parlamentu, hà fattu u so ghjuramentu à mezanotte. Sin'à tandu, u capu di u Statu era a rigina Elizabeth II (incù u titulu di "rigina di a Barbada"), riprisintata annantu à l'isula da un guvernadore generale. In u casu di a Barbada, Elizabeth II era in particulare rigina di a Barbada è di i so altri riami è territorii, capu di u Commonwealth per grazia di Diu. Incù a transizione ver' di a Ripublica, e funzione di u guvernadore generale sò passate à u presidente. A Custituzione di a Barbada data di u 30 di nuvembre 1966.

U putere legislativu hè esercitatu da un parlamentu bicamerale cumpostu da a Camera d'assemblea (30 membri eletti ogni cinque anni) è di u Senatu (21 membri numinati da u guvernadore generale). I citatini anu u drittu di vutà da l'età di 18 anni. L'elezzione generale di quest'ultime dicennii sò stati supranate da dui grandi partiti : u Barbados Aratura Party (BLP) è u Democratic Aratura Party (DLP).

U putere esecutivu appartene à u prima ministru è à u so guvernu. U Prima ministru hè di regula u capu di u partitu chì hà vintu l'elezzione à a Camera d'assemblea, a camera bassa di u Parlamentu.

U putere ghjudiziariu hè indipindente di l'esecutivu è di u parlamentu. U sistemu di i tribunali lucali di a Barbada hè u siguente :

• Magistrates' Court: affari penale, civile, dumestichi, di viulenza dumestica è di minadori. Pò ancu occupà si d'affari relative à a medicina legale, à e licenzie d'alcollu è à i matrimonii civili. Inoltre, a Magistrates' Court tratta i cuntratti è di u drittu di i dilitti, e dumande chèi ùn varcanu micca 100 00$.
• Corte suprema: si cumpone l'Alta Corte è di a Corte d'appellu.
• High Court: hè cumpetente per e divisione di drittu civile, penale è famigliale.

Pulitica straniera

A Barbada hè membru di e Nazione Unite, di u Commonwealth di e Nazione, di l'OPAC, di l'Organisazione mundiale di u cummerciu, di u Fondu munetariu internaziunale, di l'Organisazione di i Stati americani è di u CARICOM (a Cumunità di i Caraibi).