Aragna
| |||||
|---|---|---|---|---|---|
| |||||
| Trachinus draco | |||||
| Classificazione scentifica | |||||
| Regnu | Animalia | ||||
| Divisione | Chordata | ||||
| Classa | Actinopterygii | ||||
| Ordine | Perciformes | ||||
| Famiglia | Trachinidae | ||||
| Generu | Trachinus | ||||
| Nomu binuminale | |||||
| Trachinus draco Linnaeus, 1758 | |||||
| |||||
L' Aragna (Trachinus draco) o aragna cumuna hè un pesciu di mare chì face parte di a famiglia di i Trachinidae.[1] L'aragna hè largamente sparta longu à a costa atlantica orientale, da a Nurvegia à u Maroccu, passendu per u mare Terraniu, u mare Egeu è u mare neru. Hè statu dimustratu ch'è l'aragna si scontra à e prufundità andendu da l'acque poche prufonde sinu à - 150 metri induve ella stà per u più in e terre fangose o rinose. L'aragna hè soprattuttu cunnisciuta per e so spine vilenose chì ponu incausà i ferite grave à l'umani da pugniture accidentale. Per causa di 'sse spine è di u so vilenu putente, hè classificata cum'è unu di i più pesci vilenosi di u mare Terraniu.
Descrizzione
[mudificà | edità a fonte]L'aragna hè un pesciu lungarinu è sciacciatu annantu à u latu incù l'ochji dritti è una bocca superiore nettamente inclinata ver' di l'altu. A mansella inferiore hè più longa ch'è a mansella superiore. A testa hè cumpatta, para è abbastanza grande è l'ochji sò guasi posti sopra. U bordu superiore di l'ochju hà duie o trè piccule spine, davanti à ogni ochju. E cinque à sette nutaghjole zimbrunute di a so prima nutaghjola dursale è e spine di ognuna di e fuciale anu in a so basa e ghjandule da vilenu.
Culurazione
[mudificà | edità a fonte]Annantu à a faccia dursale, l'aragna hè culurata in brunu verdicciu incù un numeru varievule di marche scure annantu à a faccia superiore di a testa. U fiancu hè tintu di un brunu giallastru incù e fasce discuntinue turchinu vivu è giallu chì correnu di traversu ver' di l'avanti di u pesciu. Di più, e fasce nere sbieche ponu esse truvate annantu à u latu. Horst Müller qualificheghja 'ssu mudellu di sumigliante à quellu di u tigru.
Dimensione di u corpu
[mudificà | edità a fonte].jpg)
E dimensione corpurale di l'aragna sò discritte assai differentamente da parechji autori è parenu dissumiglià sicondu a lucalisazione geugrafica induve u studiu hè statu fattu. In u livante di u mare neru, a distribuzione di a lunghezza di i pesci adulti varieghja da 10 cm à 25,8 cm massimu per e femine è di 9,5 cm à 22,5 cm per i masci. U pesu varieghja da 6,96 g à 131,76 g per e femine è da 5,34 g à 75,84 g per i masci quandu a più grande femina rigistrata in u livante di u mare Neru misurava 25,8 cm di longu, i risultati di altri studii parenu indicà ch'è l'aragna hà una taglia assai più stesa ch'è quella ossirvata in 'ssu studiu. Annantu à a costa di l'Algarve, à u sudu di u Portugallu, a più grande femina truvata da Santos è al. avia una lunghezza massima tutale di 39,6 cm, ma omu hà dinù ossirvatu in u mare Neru i campioni chì varcanu a più grande femina truvata da Ak Genç in u 2013. A più grande femina truvata da Ak è al. in u mare Neru avia una lunghezza massima tutale di 35 cm. Per Ak Genç, pare evidenti ch'è un grande numeru di fattori differenti cuntribuiscenu à a varietà di a taglia di l'aragna cum'è " a timperatura, a salinità, u nutrimentu (quantità, qualità è taglia), u sessu, u mumentu di l'annu è a maturità ".
Tussicità
[mudificà | edità a fonte]
L'apparechju vilenosu di l'aragna si cumpone di una spina annantu à ogni operculu è da u cinque à ottu spine dursale. E spine di l'operculu sò diretti ver' di a coda, è sò appena piigate à l'inghjò. E spine opercularie emergenu da u bordu superiore di l'operculu è sò culligate à l'operculu da un terzu di a so lunghezza tutale. L'altri dui terzi di a so lunghezza sò liberi longu à l'operculu. A lunghezza tutale di e spine opercularie hè di circa 27 mm. U filu di u spinu stessu hè " ricupertu di una guaina tegumentaria ". S'è 'ssa guaina si rompe sottu à l'effettu di a forza appiicata à u filu di u spinu, permette à u vilenu di scappà da e cellule glandularie di u vilenu è di passà da una prufonda scanalatura longu à a culonna è in a ferita cagiunata da u dardu. Ognuna di e spine dursale hè ricuperta di una cascia tegumentaria individuale. E spine anu lunghezze differente è sò dunque disposte in curva di listessa manera. E spine ossirvate da Russel Emery (1960) avianu e lunghezze minime di 5 mm è quelle massime di 29 mm. Eranu abbastanza eterogene in a so apparenza à u livellu microscopicu. E spine dursale sò tutte appena appena incurvate ver' di a coda di u pesciu.
In Corsica
[mudificà | edità a fonte]L'aragna hè cumuna in u mare di Corsica.
Note
[mudificà | edità a fonte]- ↑ 'Ss'articulu pruvene in parte da l'articulu currispundente di a wikipedia in inglese.
Referenze
[mudificà | edità a fonte]- Miniconi R., Molinier R., Nouhen D., Pimort M.-J. (1980) Pesci di Corsica è di u Mediterraniu, Parcu Naturale Regiunale di Corsica (in francese)
Ligami
[mudificà | edità a fonte]- [https://web.archive.org/web/20070813031827/http://www.matinalatina.com/lingua/lingua_pdf.php?num=3 Archiviu 2007-08-13 at the Wayback Machine Vucabulariu aiaccinu di a pesca, Matina latina]