Isuli Lavezzi
L'isuli Lavezzi sò un arcipelagu di Corsica, fattu d'isulotti è di scoddi granitichi. Hè situatu à 10 chilomitri à u sudestu di Bonifaziu.[1]
Giugrafia
[mudificà | edità a fonte]
L'arcipelagu di i Lavezzi, d'una superficia emersa di circa 200 ettari è d'un'altitudina massima di 39 metri, hè situatu in i bucchi di Bonifaziu. Hè unu di i posti i più priculosu di u Mari Tarraniu par a navigazioni, par via di i scoddi chì sò numarosi in un strittonu di poca larghezza parcorsa da forti currenti, venti putenti è friquenti marighjati.
L'arcipelagu cumprendi, da u nordu à u sudu, i siguenti isulotti :
- l'isula Purraghja ;
- l'isula Ratinu ;
- l'isula Piana ;
- l'isula Spirdutu è u scoddu di Spirdutu, u più à livanti di l'arcipelagu ;
- l'isula di Cavaddu, a sola chì hè abitata, incù i so dui isulotti : San Bainzu è Camaru Cantu ;
- l'isula Lavezzu, annantu à a quali hè situatu u fanali custruitu in u 1874[2].
Storia
[mudificà | edità a fonte]
Sò stati scuparti in l'isuli Lavezzi i tracci umani datendu di l'ebbica preistorica, in particulari parichji sapari ricuddendu à u Niuliticu. I vistighi d'un portu rumanu è d'una cappedda di u seculu VII sò stati dinò ritruvati.
L'isuli Lavezzi funi in u 1855 u tiatru di u naufraghju di a fregata A Sémillante[3]. Quiddu fù unu di i più grevi in perditi umani in a storia di a marina francesa. Quandu a fregata chittò u portu di Tulò, u 14 frivaghju di u 1855, ci era à bordu 380 marinari è 393 suldati in partenza par a guerra di Crimea. Hè in i circondi di i bucchi di Bonifaziu ch'è a navi di guerra fù piddata in una timpesta trimenti. Sciappata annantu à unu scoddu, affundò in a notti di u 15 à u 16 frivaghju. Tuttu l'equipaghju, ma dinò tutti i fantaccini, perìni in 'ssa tragedia.
Solu 560 corpi funi vultati annantu à i costi da i currenti. L'affundati riposani in dui cimiterii marini di l'isula Lavezzu. Un altari l'hè dinò didicatu.
L'isuli Lavezzi è u casu Savoia
[mudificà | edità a fonte]U 18 austu di u 1978, à trè ori di mattina, in u trattu di mari chì sipara l'Isula di Cavaddu da l'isula Lavezzu, Vittoriu Emanuele di Savoia si rendi prutagunistu d'una tragedia[4]: u principi, suttu l'effettu di l'alcollu, hè annantu à u yacht di u miliardariu Nicky Pende.
Hà in manu una carabina Winchester M1 par a caccia à l'elefanti incù 31 baddi in u carcadori. Par spavintà à Pende, Vittoriu Emanuele spara dui colpi in a dirizzioni di u miliardariu. Daretu, à poca distanza, in a cabina d'una barca ancurata, stà durmindu Dirk Geerd Hamer, studianti tedescu di 19 anni, fiddolu di Ryke Geerd Hamer (medicu è tiolugu tedescu, fundatori di a "nova medicina germanica").
Unu di i colpa sparati tocca u ghjovanu à una coscia dopu à avè trapassatu a fiancata di a barca, è u ghjuvanottu si ni murarà dopu à una agunia di 111 ghjorna mentri u mesi di dicembri succissivu. A battaglia legali trà i dui famiddi finisci in u 1991. A curti francesa assolvi Vittoriu Emanuele da l'accusi d'umicidiu è d'omissione di succorsu, ma u cundanna à sei mesa attimpati par portu abusivu d'arma da focu.
Eculugia
[mudificà | edità a fonte]L'isuli Lavezzi sò stati istituiti in Riserva naturali à parta di u 1982. Dapoi 1999, facini parti di a Riserva naturali di i Bucchi di Bonifaziu è sarani intigrati in u futuru Parcu Marinu Internaziunali Corsu-Sardu.
Eppuri, l'isula Cavaddu, chì hè abitata, hè sempri firmata fora di l'ariali di riserva.
Noti
[mudificà | edità a fonte]- ↑ 'Ss'articulu pruveni in parti da l'articuli currispundenti di i wikipedii in talianu è in francesu.
- ↑ Fanali di i Lavezzi.
- ↑ A Sémillante.
- ↑ A spararia di l'isula di Cavaddu:U principi assoltu da l'accusa d'umicidiu
Da veda dinò
[mudificà | edità a fonte]Liamu esternu
[mudificà | edità a fonte]