Vociaru di una ghjuvanetta di Tassu
U Vociaru di una ghjuvanetta di Tassu (o Voceru di una ghjuvanetta di Tassu) hè un vociaru di Corsica. Una ghuvanetta, di u paesi di Tassu, piegni u so frateddu, chì si n'hè mortu luntanu da u so paesi. A causa di a so morti hè u fretu, duranti un inguernu moltu duru. U frateddu, fà chi, era maestru di scola.
U voceru
[mudificà | edità a fonte]- Quandu ghjunsi la nuvedda
- Chì par nostra mala sorti
- O caru di la suredda
- Ti dicia speditu a morti
- Ghjà la nevi à la muntagna
- Chjusu avia tutti li porti.
- La suredda appassiunata
- Nun pò mora di dulori:
- Nun ti hà pudutu abbraccià
- È si senti andà lu cori;
- Scatinossi ancu stamani
- Quist' invernu traditori.
- È nun pudia almenu
- Essa mortu à u to paesi
- In bracciu à la to suredda?
- Oh morti cusì scurtesi!
- Tù l'onori di la pievi
- Rispettu di li parenti
- Sempri arrubavi lu cori
- Di l'amichi è cunnuscenti.
- Quista mani u me frateddu
- Ci lasci tutti scuntenti.
- Parchì stai cusì mutu
- D'arricà ci dispiaceri?
- Leva ti, lu me frateddu
- Adempi à lu to duveri:
- Nun ti mancani sprissioni
- Lu me degnu cavaglieri.
- Lu me fiori di primavera
- Chì spuntava à la campagna
- Lu fiori di li zitiddoni
- Ch'adurnavi la muntagna
- Di la to morti, o frateddu
- Lu paesi hè tuttu in lagna.
- Quiddu ghjornu chì spirasti
- Adunisti i to sculari:
- Andu allora l'ammunisti
- Cù li to cunsigli rari:
- Par la via di u Paradisu
- Li sapisti indirizzàri.
- Qual' sarà stata la frebba
- Chì hà truncatu la to vita?
- O caru di la suredda
- La me amandula fiurita
- Lu me impastatu di meli
- Fattu cù la calamita.
- T'avia fattu la natura
- À lu tornu, à lu pinneddu;
- È la latra di la morti
- Ti pigliò cusì ziteddu.
- Nun ci era coppia sì cara
- Com'è eiu è lu me frateddu.
- Ghjenti di quistu paesi
- Or prigheti quì di cori
- Par lu me caru frateddu
- Par ch'à tutti stava à cori
- Ch'eddu godi in l'altra vita
- Cù li santi è lu signori.