Regnu di Logudoru

I Regni di Sardegna

U regnu di Logudoru o di Torres hè un di i quattru regni chì nascini in Sardegna à u VIIIu seculu par rimpiazzà un Imperu rumanu divintatu troppu luntanu (quiddu di Bisanza) è par pruteghja si in particulari di i razzii arabi.

U Logudoru si sviluppeti in a parti nordu uccidintali di a Sardegna cumpridindu i rigioni di Sassari, Nurra, Romangia, Anglona, Marghine, Planargia, Montiferru, Goceano è una parti di a Barbagia, oghji inglubati in i pruvincii di Sassari, Olbia è Tempiu, Nuoru è Oristanu.

U Regnu di Logudoru, com'è d'altrondi l'altri trè Regni era un riamu suvranu siont'è u principu ghjuridicu Superiorem micca recognoscens, incù un tarritoriu suddivisu in 20 Curatorii, i distritti dirighjiti da un curatori è cumprindindu centri abitati chjamati Cità. U Regnu avia u so parlamentu probbiu, a Curona di Logu, cumpostu da i rapprisintanti di i Curatorii. Pussidia u so probbiu duminiu publicu, u Rennu, vutaia i leghji, avia i fruntieri è stampaia a muneta.

U so capu era u Judex ius dicens (quiddu chì dici a leghji), in sardu, u Ghjudici. U Ghjudici tiraia a so auturità non solu da l'eredità ma dinò da u ricunniscimentu di u so Imperium da a Curona di Logu.

Storia

Nascita di u Regnu

Blasonu di u Regnu

À u seculu IX, l'arabi è i berberi ani suvitatu una pulitica aggrissiva d'espansioni è di pirataria in u Mari Tarraniu cumpiindu incù a cunquista di a Cicilia in u 827 par taddà a Sardegna da u guvernu cintrali di l'Imperu bizantinu. In l'assenza di struzzioni i rispunsevuli pruvinciali Bizantini sardi, chjamati "ghjudici" ani cuminciatu à guvirnà di manera autunoma.

À u seculu X, l'isula hè stata divisa in quattru " ghjudicati ", frà i quali dui, Logudoru è Arburea sò stati ragruppati à u principiu di u XIu seculu. Versu u 900, 'ssi tarritorii sò divintati difatti Stati indipindenti, i so principi à u puteri essendu " ghjudici " succidindu à i so pridicissori, funziunarii imperiali.

A prima capitala di u Regnu di Logudoru era Torres (avali Porto Torres). Com'è Torres da a so lucalisazioni à u cantu di mari era esposta à l'attacchi arabi, u sediu di a magistratura hè statu trasfiritu à l'internu di i tarri prima à Ardara è dopu à Sassari.

U Regnu di u Logudoru s'hè fattu cunnoscia sottu à u regnu di Barisone (1038 à u 1073) chì hà impurtatu u munachismu uccidentali annantu à l'isula chirindu i frati à Desiderius abati di u Monti Cassinu, sustinutu da papa Lisandru II è Godfroy u Barbutu, Margrave di Tuscana, malgradu l'oppusizioni di l'arcidiocesi di Pisa, chì asercitaia una forti influenza riligiosa annantu à l'isula.

À a morti di Barisone, l'Arburea hà sceltu u so probbiu ghjudici in a parsona di Marianus di Zori, mentri chì u Loguduresu hà sceltu à Andrea Tanca.

Fini di u regnu

U regnu di Logudoru hà avutu fini in u 1259, quandu a " ghjudicessa " Adelasia murì senza eredi. Dopu à quissa, u Logudoru era difatti dirighjitu da a famidda ghjinuvesa di i Doria è Malaspina è a famidda rignanti d'Arburea, Sassari divintendu in u frattempu una cità-Statu autunoma.

Ghjudici di Torres (mità anni 1000 -1259 circa)

Marianu II di Torres

Numaru	Titulu	Nomu	Da u	À u	Cunghjuntu è noti
1	Ghjudici	Custantinu I di Torres, di Lacon-Gunale	mità XIu seculu
2	Ghjudici	Andrea Tanca	mità XIu seculu
3	Ghjudici	Comita I di Torres	fini XIu seculu
4	Ghjudici	Gonnario Comita di Lacon-Gunale	XIu seculu
5	Ghjudici	Torchitorio Barisone I di Lacon-Gunale	1038	1060	Maria di Strignì
6	Ghjudici	Barisone I di Torres	1060	1073
7	Ghjudici	Marianu I di Torres	fini 1100		Susanna di Zori
8	Ghjudici	Pietro I	XIu seculu		Giorgia di Zori, Anna di Zori
9	Ghjudici	Custantinu II di Torres	XIu seculu
10	Ghjudici	Pietro II	XIu seculu
11	Ghjudici	Custantinu III	1113	1125	Marcusa di Gunale, Maria d'Arrubu, Maria di Zori
12	Ghjudici	Gonario II di Torres	1127	1154	Maria di Parlascio Ebriaco
13	Ghjudici	Barisone II di Torres	1154	1190	Preziosa d'Orrubu
14	Ghjudici	Custantinu IV		1210	Druda di Catalogna, Prunisinda di Catalogna
15	Ghjudici	Comita II	1210	1218	Sinispella d'Arborea (mamma di Marianu II), Agnese di Saluzzo
16	Ghjudici	Marianu II di Torres	1218	1233	Agnese di Massa-Cagliari
17	Ghjudici	Barisone III di Torres	1233	1236	righjenza di u so ziu Orzocco
18	Ghjudicessa	Adelasia	1236	1259	Ubaldo Visconti di Gaddura, Enzio di Sardegna
19	Ghjudici o Rè	Enzio di Sardegna	1238	1243	Adelasia di Torres; titulari 1243-1272

Dopu à a morti d'Adelasia di Torres, versu u 1259, senza eredi, u Regnu hè spartutu trà l'Arburea è i famiddi Doria è Malaspina.

Bibliugrafia

• Gian Giacomo Ortu La Sardegna dei giudici, Regione autonoma della Sardegna, 2005 (in talianu)

Da veda dinò

• u Regnu di Gaddura
• u Regnu d'Arburea
• u Regnu di Cagliari
• Logudoru