Gravitonu
U gravitonu hè una particula elementaria iputetica rispunsevuli di a trasmissioni di a forza di gravitàin diversi mudeddi tiorichi visendu à unificà i finomini gravitaziunali incù i finomini quantichi, in ciò ch'è a parsona chjama a gravità quantica. Ùn esisti attualmenti nisciuna data sperimintali à favori di a so esistenza.[1]
Tiuria[mudificà | edità a fonte]
Datu u grandi successu di i quanta in a discrizzioni di i forzi fundamintali, paria naturali ch'è listessu metudu funziuneghji bè annantu à a gravità. Siont'è certi tiurii, u muvimentu di un corpu pruduciaria un signali d'infurmazioni chì impiigaria un tempu mori rapitu, ma non nullu, par aghjunghja l'altra massa in interazzioni (siont'è a rilatività ristrinta, 'ssu tempu saria uguali à a vilucità di a luci) è aghjustà a forza di gravità à a nova distanza trà i dui corpi. Siont'è altri punti di vista, tali u tiurema di nonlucalità di Bell, un liamu pirmanenti esistaria trà dui massi è i so gravitoni à l'infora di u continuum spaziutempu.
In i diffarenti tiurii, i gravitoni devini sempri asercità una forza d'attrazzioni è agiscia à n'importa chì distanza cunfurmamenti à i carattaristichi di a gravità. Di u puntu di vista quantica, 'ssi carattaristichi difiniscini un busonu di spin 2 è di massa à u riposu nulla chì difinisci un campu tinsuriali. In a gravità quantica, i gravitoni ghjucariani listessu rollu chì i futoni, i quanta di u campu elettrumagneticu, in u cuntestu di l'eluttrudinamica quantica, induva sò cuntinuamenti criati è distrutti da tutti i particuli carchi è, intaragiscendu incun eddi, pruducini a forza elettrumagnetica famigliari. Numarosi tentativi sò stati fatti par intraducia u gravitonu, bench'è a furmalisazioni matematica ùn fussi micca senza ostaculi. Una certa tiuria esighjaria chì u gravitonu funziuneghji à listessu modu chì u futonu, ma in cuntrariu di l'eluttrudinamica, induva i futoni ùn agiscini dirittamenti ch'è annantu à i particuli carchi, i gravitoni divariani intaragiscia trà eddi è ancu incù tutti l'altri particuli. Sinu ad avà, tutti i tentativi di crià una tiuria quantica cuerenti pà a gravitazioni si sò avvirati prublematichi.