Ghjustificazione di a rivoluzione di Corsica
A Giustificazione della rivoluzione di Corsica, e della ferma risoluzione presa da' Corsi, di non sottomettersi mai più al dominio di Genova chjamata a Ghjustificazione, hè un opera apparsa in tuscanu, in Napuli in u 1758, senza nome d'autore, scritta da Gregoriu Salvini, un amicu intimu di Pasquale Paoli, forse in Corti. 'Ss'opera ricensa 160 casi d'inghjustizia di a republica ghjenuvese riguardu à a Corsica.
Serà ripublicata in u 1764 A Ghjustificazione, in Corti, incù parechje modifiche, cumpurtendu una dedica à Pasquale Paoli è per appuntu l'argumenti di u vescu genuvese Pier Maria Giustiniani incù e risposte à quelli argumenti di un antru cumpagnu di Paoli: Bonfigliu Guelfucci (1721-1813) di Bargudè.
Assai lestru, a Ghjustificazione diventa a basa annantu à a quale si sviloppa a duttrina naziunalista insulare in i primi anni 1760 per a fasa cunclusiva di a lotta contru à a Ripublica di Genuva. Pier Maria Giustiniani, Vescu di Savone è Vintimiglia ci oppone una contradizzione inspirata da u principu ch'è « ùn hè mai lecitu di rivultà si contru à u so suvranu, qualsiasi a raghjone ». Scrive cusì e Riflessioni intorno ad un libro intitolato Giustificazione della rivoluzione di Corsica, e della ferma risoluzione presa da’ corsi di mai più sottomettersi al dominio di Genova. È principia tandu una longa litica annantu à u drittu di i Corsi di rivultà si, soprattuttu in casu d'inghjustizia palesa.
In a so prisintazione, Salvini scrive: « Di tutti i populi d'Europa l'isulani di Corsica sò i soli ch'è sianu nati per esse di cuntinuu infelici. Si trascorrenu tutti i seculi è si viderà u dispotismu è l'anarchia opprime unu appressu à l'altru quelli populi svinturati ». Ùn ci era più spiranza tandu ch'è in u Senatu Genuvese esistessi « una manu maestra chì avariste l'abilità di rimette in ordine quella macchina scumposta ».
A Stamperia di a Verità[mudificà | edità a fonte]
In u 1758, hè stata creata da Pasquale Paoli una stamperia naziunale, a « Stamperia di a Verità » in u cunventu San Francescu d'Oletta. Ci seranu stampati parechje tese teulogiche è filusofiche, testi storichi è in particulare a Ghjustificazione di a Rivoluzione di Corsica di Salvini.
Simbulu mudernu[mudificà | edità a fonte]
A Ghjustificazione hè diventata à i ghjorni d'oghje un simbulu di a lotta di i corsi per a so libertà. U ghjuramentu di i membri di l'esecutivu, dopu à l'elezzione di u 13 di dicembre 2015 à di u Cullettività Territuriale di Corsica, s'hè fattu annantu à un esimplare autenticu di a Ghjustificazione.
A dedica[mudificà | edità a fonte]
Eccu a dedica di l'edizione di 1764:
À a so eccellenza u Signore Pasquale De Paoli, Generale di u Regnu è capu di u supremu magistratu di Corsica
A quale hà cusì bè presu à serve si ne, ch'è a Patria ùn hà mai vistu tanta prossima l'intiera libertà soia quantu sottu à u vostru Guvernu! A Corsica vi adora, l'Europa vi ammira, tuttu u Mondu vi stima, è eiu, ch'è à nome di tutti vi auguru lunghissimi anni di vita, vi pregu à accittà u tributu ch'è ghjustamente vi offru, è sò
Di V. E.
Corti 20 Dicembre 1764.
Riferimenti[mudificà | edità a fonte]
- A Ghjustificazione di a Rivoluzione di Corsica è di a ferma risoluzione presa da' Corsi di mai più sottumette si à u duminiu di Genuva, Napuli, 1758.
- A Ghjustificazione di a Rivoluzione di Corsica cumbattuta da e riflessione d'un Genuvese è difesa da l'ossirvazione d'un Corsu, Corti, 1764.
Ligami[mudificà | edità a fonte]
- Ghjuramentu di l'eletti di Corsica dopu à l'elezzione di u 13 di dicembre 2015
- Bon ma allora, chì hè sta "Giustificazione" ?, articulu in A Piazzetta