Danubiu
U Danubiu (in tedescu: Donau; in ungrese: Duna; in rumenu: Dunărea; in sluvaccu: Dunaj; in cruatu, serbu è bulgaru: Dunav; in ucrainu: Дунай) hè un fiume di l’Europa centru-orientale. Cù i so 2.860 chilometri, hè u sicondu fiume u più longu di u cuntinente (dopu à u Volga), è u più longu trà i fiumi navigabili di l'Unione europea.
E so surgente si trovanu in a Foresta Nera in Germania, induve dui chjuchi fiumi, u Brigach è u Breg, si riuniscenu à Donaueschingen. Hè da stu puntu chì u fiume piglia u nome di Danubiu, ancu s’ellu si pensa spessu chì u Brigach hè ellu stessu un affluente di u Breg; dunque, questu ultimu saria digià u Danubiu.
Da e so surgente, u fiume corre versu l’oriente, è attraversa parechje capitale di l’Europa cintrale è orientale (Vienna, Bratislava, Budapest è Belgradu). À a fine di u so percorsu, si ghjette in u Mari Neru per mezu d’un largu delta à u cunfini trà a Rumenia è l’Ucraina. U delta di u Danubiu hè iscrittu in a lista di u patrimoniu mundiale di l’UNESCO.