Corsica (Santu Casanova)
Corsica hè una puesia di Santu Casanova. Hè stata scritta in Bastia d'aostu 1930 è pubblicata in l'Almanaccu populare di Corsica in u 1931.
Corsica
[mudificà | edità a fonte]- Curunata di boschi,
- Bagnata da lu mare,
- À i pedi d'un altare
- Inghjinuchjata.
- Sempre martirizata
- Da Turchi è da Cristiani
- In li monti, in li piani
- È pà le valle.
- Daretu à le to spalle,
- I Vittuli imbuscati
- Si sò sempre piattati
- À fà ti focu.
- Si spengne pocu à pocu
- U to core in lu dolu.
- È ùn ci hè mancu un figliolu
- Chì ti chjama !
- A natura chì t'ama
- Cunsola i to dulori,
- Dendu ti rose, fiori
- È dolce sole.
- Nascenu le viole
- À tutte le staghjone,
- Spengne lu nivaghjone
- U to clima.
- Ma ùn sè ancu à la cima
- Di tutti li to guai
- Ch'ùn finiscenu mai,
- O mamma cara !
- Intornu à la to bara
- Ùn ci hè cà rinnegati
- Cù l'ochji spalancati
- D'impustura.
- Bella la to statura,
- Celeste lu to visu,
- Ma ancu in Paradisu
- Sarò trista.
- Ùn si sarà mai vista
- Sorte cusì turbata,
- Povara, tribulata
- Mane è sera !
- Torna la primavera
- Cù tutti li so fiori,
- Rinascenu l'amori
- Di u passatu.
- U cuccu s'hè spartatu,
- Cantanu i rusignoli,
- Ma piegnenu li doli
- È la sciagura.
- Finchì lu mondu dura,
- Rinasce ogni billezza
- È torna l'aligrezza
- In tutti i cori.
- Ma per tè li duttori
- Ùn anu medicine,
- Chi sè ghjunta à la fine
- Di e to noie.
- Sò finite le gioie
- Di li tempi passati,
- I to figlioli ingrati
- Sò à la festa.
- Fà scuppià la timpesta
- Di u ventu populare,
- Ch'ella li porti in mare,
- È cusì sìa !
Riferimenti
[mudificà | edità a fonte]- [https://web.archive.org/web/20160307015914/http://www.musee-corse.com/var/ezflow_site/storage/original/application/ab176479cd986b312f476aad8284e811.pdf Archiviu 2016-03-07 at the Wayback Machine Almanaccu populare di Corsica]]