Chironu

À prupositu di Wikipedia
Chironu incù Achilli

Chironu (in grecu Χείρων), parsunaghju di a mitulugia greca era un centauru. Nacqui da Filira (veni à dì tigliu in grecu, pianta da i puteri calmanti), figlia d'Oceanu, è da u Titanu Cronu, chì par siducia la si trasformò in cavaddu. Quissa spiega a so immurtalità è u fattu ch'eddu avissi par appuntu l'aspettu di un centauru, mità omu è mità cavaddu. Cunsidaratu u più savviu è benivulenti di i centauri, spertu in l'arti, in i scenzi è in medicina ebbi par addevi numarosi eroi: Aiaci, Achilli, Aristeu, Asclepiu, Atteoni, Ceneu, Enea, Erculu, Fenici, Ghjasonu, Oileu, Palamedi, Peleu, Telamoni, Teseiu, è, sicondu certi lighjendi, ancu Dionisu. Era u babbu di Ociroi, nata da l'unioni incù a ninfa Cariclu, è vissi annantu à u monti Pelion.

Chironu in a Mitulugia[mudificà | edità a fonte]

Chironu, in quantu medicu, fù chjamatu a curà Achilli quandu quist'ultimu, in seguitu à a magia praticata da a so matri Teti par renda lu immurtali, ebbi a cavichja brusgiata. Chironu a di sustituì incù quidda di un Ghjiganti mortu, Damisu, particularamenti dutatu in a corsa (quissa avaristi resu Achilli più veloci).

Fini di Chironu[mudificà | edità a fonte]

Essendu Erculu vinutu à cumbatta incù i Centauri ni uccisi parechji è i sopravviventi si rifughjoni vicinu à a sapara induva vivia Chironu, chì frà altru era amicu di l'eroi. In u corsu di a battaglia una freccia, scagliata da Erculu, culpì à u ghjinochju Chironu. Sta ferita, incausata da una freccia avvilanata, ùn pudia variscia ma nemmenu pudia purtà à morti Chironu, natu immurtali, è cusì l'incausava indicibili suffrenzi chì u purtoni à l'addispirazioni. Disidarendu a morti, Chironu riiscì à ottena la scambiendu a so immurtalità incù Prumeteu chì era divintatu murtali parvia di i so cuntrasti incù Zeus. U patri di i Dei, à u quali u centauru era particularamenti caru, u volsi quantunqua vicinu à eddu in celi, dendu urighjina à a custiddazioni di u Centauru.

Carattaristichi[mudificà | edità a fonte]

À diffarenza di l'altri centauri, chì com'è i satiri erani ignuranti è dedicati à a viulenza, Chironu si distinguiscia par a grandi buntà d'animu, par a savviezza, par a cunniscenza di i scenzi, in particulari quidda medica. Fù par via di cunsiquenza cunsidaratu u ceppu di quidd'arti in quantu maestru di quiddu chì a mitulugia greca cunsidarava u diu di a medicina: Asclepiu.

Da veda[mudificà | edità a fonte]