Carulu Magnu
Carulu, chjamatu Carulu Magnu, o Carlu Magnu (in latinu Carolus Magnus; 2 d'aprile di u 742 – Aquisgrana, 28 di ghjennaghju di u 814), fù rè di i Franchi da u 768, rè di i Longubardi da u 774 è fundatore di l’imperu carulingiu; u ghjornu di Natale di l’annu 800, in l’antica basilica di San Petru in Vaticanu, hè statu incurunatu Imperatore di i Rumani da u papa Lione III.
L’appellativu Magnu li fù attribuitu da u so biografu Eginardu, chì hà intitulatu a so opera Vita et gesta Caroli Magni.
Figliolu di Pipinu u Breve è Bertrada di Laon, Carulu diventò rè in u 768, à a morte di u so babbu. Inizialmente, regnò à tempu cù u so fratellu Carlumannu. A morte subitana di quest'ultimu, accaduta in u 771 in circustanze misteriose, fece di Carulu u solu suvranu di u regnu francu. Stu regnu fù da ellu allargatu, grazia à una seria di campagni militari vitturiose, chì anu inclusu a cunquista di u Regnu longubardu, finu à cumprendi ne una vasta parte di l’Europa occidentale.
U ghjornu di Natale di l’800, u papa Lione III l’incurunò Imperator Augustus, tìtulu chì à l’epica designava l’imperatore di i Rumani. Cù l’incurunazione da imperatore, ci fù a fundazione ufficiale di l’Imperu carulingiu, cunsideratu da certi storichi com’è a prima fase di a storia di u Sacru Rumanu Imperu. Sottu u regnu di Carulu Magnu, si assistì dunqua à a fine in l’Europa occidentale di u mudellu giuridicufurmale di i Regni rumanugermanichi in favore d’un novu mudellu d’Imperu. In più, cù u so guvernu, deti un impulsu à a Rinascita carulingia, un periodu di rifiurimentu di i studii pulitichi, teulogichi è umanistici in Europa cuntinentale.
L’imperu resistite in a forma chì l'era stata data da Carulu Magnu finu à ch’è u so figliolu Ludovicu u Piu fù vivu. À a morte di Ludovicu, l’imperu fù divisu trà i so trè eredi: Lotariu I, Carulu u Calvu è Ludovicu II u Germanicu. Eppuru, l’impurtanza di e rifurme appurtate da Carulu Magnu, cum’è u valore sacrale di a so persona, anu influenzatu radicalmente tutta a vita è a pulitica di u cuntinente europeu in i seculi dopu. Per stu mutivu, certi storichi u definiscenu rè, babbu di l’Europa (Rex Pater Europae).
Attraversu u so figliolu Ludovicu u Piu, Carulu Magnu hè l’antenatu di tutte e Case Riale Europee, frà e quale i Windsor (Rè di u Regnu Unitu), i Sassonia-Coburgu-Gotha (Rè di u Belgicu), i Borboni di Spagna (Rè di Spagna), u rè di Svezia Carulu XVI Gustavu (essendu discendente di i Sassonia-Coburgu-Gotha, ma a casa riale svedesa ùn hè micca carulingia), a Famiglia Granducale di u Lussemburgu, è ancu di numerose case riale chì ùn sò oghje più regnante, cum’è i Romanov, i Savoia, i Borboni di Francia è parechje altre.
Cuntestu storicu
[mudificà | edità a fonte]U successu di Carulu Magnu in a fundazione di u so imperu si spiega cunsiderendu certi prucessi storichi è suciali in corsu dighjà à quellu tempu: in i dicennii prima di a so ascesa, l’Avari si eranu stabiliti in u bacinu di u Volga è ùn custituivanu più una minaccia, e migrazione di i populi germanichi urientali è di i Slavi s'eranu quasi piantate; à punente, a forza espansiva di l’Arabi era stata fiaccata da e battaglie cumbattute da Carlu Martellu. In più, per causa di rivalità persunale è cuntrasti religiosi, a Spagna musulmana era divisa da lotte intestine.
Sicondu una tesi famosa (ma ridimensiunata da studii più ricenti) di u storicu belga Henri Pirenne, ci era statu un spustamentu di u baricentru di u mondu uccidentale ver’di u nordu dopu à a perdita d’impurtanza di i scambii in u Mediterraniu, incausata da a cunquista musulmana di l’Africa di u Nordu è di l'Oriente Vicinu, è l’irruzzione di i Magiari in Europa urientale.
Di più, ci vole à cunsiderà l’opara fundamentale d'evangelizazione in i territorii di a Germania urientale è miridiunale, cundutta da i monachi benedittini venuti da l’Inghilterra è guidati da San Bonifaziu trà u 720 è u 750 circa. St'evanzelizazione avia datu una prima struttura è urganizazione à i territorii cuntrollati da tribù sempre barbare è pagane.
Ghjuvantù
[mudificà | edità a fonte]Genealogia
[mudificà | edità a fonte]Un oggettu di ricerca impurtante per i studiosi tantu antichi ch'è muderni hè a genealogia di Carulu Magnu. Questu perchè truvà l’antenatu di l’imperatore significheghja truvà l’antenatu di tutta a nobiltà europea è, per via di cunsiguenza, di tutta a pupulazione europea è americana. Hè per quessa difficile di ricustruisce precisamente a linea di i so antenati, per via di a mancanza di fonti pervenute insin’à noi, è ancu perchè, longu à a storia, sò state divulgate varie legende pà glurificà l’imperatore. Dunque, ci vole à ricurdà chì a maiò parte di ciò chì hè ripurtatu quì sottu hè custituitu d’ipotesi.
Carulu era un membru di a famiglia di i Carolinghi: era figliolu di Pipinu u Breve, figliolu di Carlu Martellu, figliolu di Pipinu d’Herstal. Quest’ultimu, da parte di u babbu, era membru di l’Arnolfinghi, mentre da parte di a mamma di i Pipinidi. I più antichi antenati storicamente attestati di Carulu Magnu sò dunque Sant’Arnulfu di Metz (capustipite di l’Arnolfinghi) è Pipinu di Landen (capustipite di i Pipinidi).
Nascita
[mudificà | edità a fonte]Carulu era u primu figliolu di Pipinu u Breve (714-768), u primu di i rè Carolingi, è di Bertrada di Laon. A data di nascita tramandata da a tradizione hè u 2 d’aprile di u 742. L’annu di a data tradiziunale vene da l’opera di Eginardu, Vita et gesta Caroli Magni, chì afferma chì Carulu murì à 72 anni. Eppuru, postu chì e diverse fonte sò discurdanti è pruponanu anni diversi, ùn hè micca pussibule di stabilisce cun precisione a data di nascita. Difatti, l’Annali Regi riportanu chì Carulu murì à 71 anni, dunque seria natu in u 743, mentre chì l’iscrizzione (oghje persa) posta sopra a tomba in Aquisgrana u definia circa settantannincu.
Un altru manuscrittu cuntempuraneu situeghja a nascita di Carulu u 2 d’aprile, data chì hè cumunemente accittata. S’è l’età di a morte indicata da Eginardu hè curretta, Carulu seria natu prima di u matrimoniu trà Pipinu è Bertrada, chì e fonte dicenu ch'ellu occorse in u 744. Stu fattu seria in ogni casu cumpatibile cù i custumi di i Franchi, chì ùn si oppunianu micca à u cuncubinatu è à i figlioli natu prima di u matrimoniu.
In a seconda parte di u Novecentu, l’attenzione hè stata data à l’Annale Petaviani, chì riportanu chì l’annu di nascita di Carulu seria u 747. In particulare, i medievisti Karl Ferdinand Werner è Matthias Becher anu difesu l’affidabilità di sta fonte. Eppuru, à l’epoca u calculu di u tempu ùn seguia micca e regule precise è uniforme ch'è noi cunnoscimu oghje. Per esempiu, l’opere annale di u VIII seculu ci dicenu chì à quellu tempu l’annu principiava cù u ghjornu di Pasqua, chì in u 748 cascava u 21 d’aprile. Postu ch'ellu hè accertatu chì Carulu nascì u 2 d’aprile, per i so cuntempuranei, quellu ghjornu seria sempre statu in u 747, mentre chì cù u nostru sistema attuale seria in u 748.
Un altru indiziu à favore di u 748 si trova in un testu relativu à a traslazione di u corpu di San Germanu di Parighji in l’abbazia di Saint-Germain-des-Prés, avvenuta u 25 di lugliu di u 755. Carulu era presente à a cerimonia è subite un picculu incidente, avendu, cum’ellu stessu dichjara, 7 anni. S’è a data di nascita pò esse sugetta à cungetture, e fonte ùn furniscenu invece nisunu indiziu chì possa aiutà à identificà u locu di nascita di Carulu.
Rè di i Franchi (768-800)
[mudificà | edità a fonte]Spartimentu è primi anni di regnu
[mudificà | edità a fonte]Quandu u babbu di Carulu, Pipinu u Breve, morse u 24 di sittembre di u 768, avia dighjà disignatu cum’è erede è successore, cù l’apruvazione di a nubiltà è di u vescuvatu, i dui figlioli sempre in vita: Carulu è Carlumannu. In u 768, Carulu avia trà i 20 è i 26 anni. Finu à tandu, a litteratura è i ducumenti ufficiali facenu riferimentu à pocu nutizie impurtante, vale à dì ch’è in u 761 è in u 762 participò cù u babbu è u fratellu à spidizione militare in Aquitania è più tardi cuminciò à amministrà a ghjustizia in l’abbazia di Saint-Calais.
Pipinu avia spartu u regnu trà i dui figlioli, cum’è in u 742 u so babbu Carlu Martellu avia fattu cun ellu è u so fratellu. Assignò dunqua à Carulu l’Austrasia, a maiò parte di a Neustria è a mità nordu-uccidentale di l’Aquitania, è tutti i territorii in u frattempu cunquistati in a parte urientale fin’à a Turingia. Invece, à Carlumannu assignò a Burgogna, a Pruvenza, a Gotia, l’Alsazia, l’Alamagna è a parte suduriintale di l’Aquitania. L’Aquitania, dunque, ancora micca interamente suttumessa, era riservata à un guvernu cumunu.
Stu spartimentu, à parte l’estensione giugrafica, demugrafica è ecunomica assai cumparabile, impunia però à i dui suvrani una gistione pulitica tutalamente differente, in tuttu sfavore di Carlumannu. Da una parte, Carulu avia cunfini tranquilli chì li permettianu di dedicà si à una pulitica d’espansione versu i terri germanichi. Da l’altra parte, Carlumannu ereditò un regnu chì l’avaria ingaghjatu cuntinualmente in una pulitica difensiva: versu i Pirenei cù l’Arabi di al-Andalus, è versu l’Alpe cù i Longubardi d’Italia. Stu fattu prubabilmente ùn cuntribuì micca pocu à tende i rapporti trà i dui fratelli. L’incurunazione ebbe locu per tremindui u 9 d’uttrovi di u 768, ma in lochi sparti è luntani trà elli.
Unu di i primi prublemi à risolve era a quistione di l’Aquitania, ch’è però Carulu duvete affruntà da solu, postu chì u fratellu, forse mal cunsigliatu, li nicò l’aiutu nicissariu. Ùn esiste micca una virsione di sti fatti sicondu u puntu di vista di Carlumannu, dunque ùn hè micca pussibile di cunfirmà e vere mutivazione di u rifiutu d’intervene. Grazia à un accordu cù u principe bascu Lupu, Carulu si face cunsignà Unaldu, figliolu di u duca d’Aquitania è a so moglia, chì s’eranu rifugiati vicinu à ellu. A risistenza aquitana si truvò dunqua senza un capu impurtante è cidì à Carulu, ch’è però solu in u 781 insirì difinitivamente a rigioni in u regnu.
A mamma di Carulu, Bertrada, fù una cunvinta sustinitrice di a pulitica di distensione trà i Franchi è i Longubardi. Mentre l’istate di u 770, a rigina urganizò una missione in Italia, riescendu à tesse un’intesa trà i so dui figlioli è u re longubardu Desideriu, ch’è dighjà avia datu una figliola in moglia à Tassilone, duca di Baviera. U primugenitu di Desideriu, Adelchi, divintò u sposu prummessu di a principessa Ghjisella, mentri Carulu, ch’è era dighjà statu spusatu cù Imiltrude, spusò a figliola di Desideriu, Desiderata. Hè evidentissima a purtata pulitica di sta unioni, ch’è però tinia fora Carlumannu è, sopra à tuttu, u papa.
St’ultimu si infurió par u piriculu ch’è una allianza francu-longubarda puderia custituisce per l’interessi rumani, è Carlumannu si spicciò di mette si da a so parte. Carulu ùn si face intimidà da i rimustranze di u pontefice, ch’è anzi duvete accittà una situazione di fattu è adattà si à a nova linia pulitica franca, cunvintu ancu da u donu di certe cità di l’Italia cintrale ch’è Bertrada è u re longubardu li fecenu per rassicurà lu. Ancu u papa, dunque, cambiò linia pulitica, ricunciliendu si cù u rè Desideriu è allintendu mumentaniamente i rapporti cù i dui rè franchi.
Bellu prestu, Carulu, per mutivi micca bè chjari (forse un statu di salute precariu ch’è avaria impiditu à a moglia d’avè figlioli), ripudiò è rimandò à u babbu a cunsorte, rumpendu di fattu i boni rapporti cù i Longubardi. St’attu fù interpritatu sia da i Longubardi sia da a Chjesa com’è una dichjarazione di guerra. Fù però ancu un attu ch’è liberò Carulu di u pesu di l’allianza trà Chjesa, Franchi è Longubardi, ch’è inghjennava in una situazione puliticamente cumplessa è in cuntrastu cù l’interessi di tutte e parte in causa.
U 4 di dicembre di u 771, à l’età di solu 20 anni, Carlumannu murì à l’impruvisu per causa di una malatia inguaribile chì suscitò chjachere è suspetti. Carulu si spicciò per fà si dichjarà rè di tutti i Franchi, anticipendu cusì eventuali prublemi duvuti à i diritti di successione chì pudianu esse avanzati da i figlioli di u fratellu, chì, cù a mamma è certi nobili fideli, si rifughjetinu in Italia.
Prime campagne militare
[mudificà | edità a fonte]A prima fase di u regnu di Carulu Magnu hè stata marcata da campagne militare continue, intraprese per affermà a so autorità in primu locu in u regnu stessu, trà i so parenti è e voce dissidenti. Dopu à avè stabilitu u fronte internu, Carulu iniziò una seria di campagne fora di e cunfine di u regnu, per sottumette i populi vicini è aiutà a Ghjesa di Roma, rinfurzendu cun ella un legame ancu più strettu di quellu ch’ellu avia avutu u so babbu Pipinu. Da u rapportu cù u papa è a Ghjesa, cunsiderata oramai cum’è l’erede direttu di l’Imperu rumanu d’Occidente, Carulu ottene a ratifica di un putere chì superava oramai quellu di l’Imperatore di Custantinopuli, luntanu è incapace di fà valè i so dritti, soprattuttu in un periodu di debulezza è di legittimità dubbia sottu l’imperatrice Irene.
Campagna in Italia contru à i Longubardi
[mudificà | edità a fonte]Guasi à listessu tempu chì Carlomannu, morse ancu u papa Stefanu III. À u zogliu pontificiu fù elettu papa Adrianu I, chì hà invucatu l’aiutu di Carulu contra a minaccia tradiziunale longubarda. Desideriu, preoccupatu da u periculu di una nova alleanza trà i Franchi è u Papatu, hà mandatu un’ambasciata da u novu pontefice, ma senza successu, perchè Adrianu I l’accusò publicamente di tradimentu per ùn avè rispettatu i patti di cunsegnà à a Chjesa i territorii prima prummessi.
Tandu Desideriu passò à l’offensiva, invadendu a Pentapoli. Carulu, chì à quellu mumentu stava urganizendu a campagna contra i Sassoni, hà pruvatu à calmà a situazione cunsigliendu à u papa di dunà una grande quantità d’oru à Desideriu per riottene i territorii cuntesi. Ma i neguziati fallinu, è Carulu, davanti à l’insistenza di u Papatu, si trovò custrettu à dichjarà guerra à i Longubardi. In u 773, entrò in Italia.
U gruppu principale di l’armata, cunduttu da u stessu rè, passò per a bocca di Moncenisio è, dopu à esse si riunitu cù l’altre truppe chì avianu pigliatu un’altra strada, misse in fughjita l’armate di Desideriu à e Chiuse di San Michele, dopu à avè pruvatu un ultimu approcciu diplomaticu. E numerose diserzione è l’ustilità di a nubiltà longubarda contra a pulitica di u so rè, custrinsinu Desideriu à evità a battaglia è à rinchjude si in a so capitale, Pavia. I Franchi ghjunsenu quà in settembre 773 senza incontrà resistenza è cumincionu l’assediu.
Carulu ùn vulia micca piglià a cità cù a forza, è infatti l’assediò finu à ch’ella ùn si rendi per fame è esaurimentu di risorse, dopu à nove mesi. In stu tempu, u rè francu preparò e linee di a so pulitica versu i Longubardi, u Papatu è i Bizantini, chì occupavanu sempre u sudu di l’Italia.
Carulu vulia ancu sfruttà stu periodu d’inattività furzata per andà à Roma à festighjà Pasqua è incuntrà à Adrianu I. Ghjuntu in cità u Santu Sabatu di u 774, fubbi accoltu da u cleru è da l'auturità cù tutti l’onori. Sicondu u biografu pontificiu, u papa stessu l’aspettava nantu à a piazza di l’antica basilica di San Petru in Vaticanu, accugliendu lu cun amicizia è cù l’onori riservati à u patriziu di i Romani. Davanti à a tomba di Petru, sigillonu cun un ghjuramentu sulenne a so “amicizia” persunale (ma soprattuttu pulitica). U papa ottense ancu a cunferma di a dunazione fatta da Pipinu u Breve à Stefanu III, di i territorii longubardi prima attribuiti à a Chjesa.
Ma eranu territorii sempre da cunquistà, è per certi (Venezia, l’Istria è i ducati di Beneventu è Spoleto), a “restituzione” à a Chjesa ùn fubbe mai seria. In realtà, l’accordu ùn fubbe mai rispettatu, è Carulu, dopu à avè cunquistatu u Regnu longubardu, evitò per anni di scuntrà u papa in persona. Adrianu I ùn aggradì micca stu cumpurtamentu è si lamentò à spessu di l’indifferenza di u rè francu à e so dumande. Cunsiderate e numerose analogie cù a dunazione di Carulu, certi storichi pensanu ch'ellu hè in stu periodu chì fubbe cumpilatu u falsu storicu cunnisciutu cum’è a “Donazione di Custantinu”, accettatu cum’è veru per seculi, è chì a Chjesa hà usatu per fundà i soi pratesi diritti timpurali.
Carulu turnò à l’accampamentu di Pavia, chì in ghjugnu 774 si resi. Ghjà parechje cità eranu state catturate da i Franchi è cunsegnate à u papa, è cù a capitale, cascò tuttu u Regnu longubardu, d’altronde digià indebulitu da i cunflitti interni è i frequenti cambii di dinastia. U rè Desideriu si arresi senza resistenza, è i Longubardi stessi si sottumissenu à i Franchi è à u so suvranu. U 10 lugliu di u 774, à Pavia, Carulu pigliò u titulu di Gratia Dei Rex Francorum et Langobardorum et Patricius Romanorum, cinghjendu a Corona ferrea. Desideriu fubbi rinchjusu in un munasteru, mentre u so figliolu Adelchi si rifugiò à a corte di l’imperatore bizantinu Custantinu V.
Eccettuatu qualchì interventu amministrativu, Carulu mantensi in Italia l'istituzione è e leghje longubarde è cunfermò i pussedimenti è i diritti à i duchi chì avianu servitu u rè precedente. U ducatu di Beneventu firmò indipendente ma tributariu à u rè francu. Solu in u ducatu di Friuli, à u principiu di u 776, Carulu duviti intervene per calmà una rivolta periculosa guidata da u duca Rotgaudu, chì avia pruvatu à implicà i duchi di Trevisu è Vicenza. Li affrontò in battaglia è ricunquistò e cità ribelli, pacifichendu l’Italia suprana. Ma in u restu di a penisula, u raffurzamentu di u so putere nantu à l’anticu Regnu longubardu si feci cun tranquillità.
Campagne contru à i Sassoni
[mudificà | edità a fonte]A campagna impurtante chì Carulu intraprese dopu fù diretta contru i Sassoni, una populazione d’origine germanica stabilita in a zona à nordestu di l’Austrasia, oltre u Renu, in i bacini inferiori di u Weser è di l’Elba. Eranu populazione cù tradizione pagane arradicate è puliticamente disunita è frammentata in varie tribù bellicose. Ghjà l’Imperatori rumani avianu pruvatu in vanu à assughjettisce la cum’è "federata". Pipinu u Breve era riuscitu à cuntene ne e so incursione di saccheghju è à impone à i Sassoni un tributu annuu di centinaia di cavalli, ma in u 772, quelli rifiutonu u pagamentu, è què permisse à Carulu di ghjustificà l’invasione di a Sassonia.
Forse inizialmente pinsata cum’è una spidizione punitiva contru e minacce chì e diverse tribù sassone facianu da tempu à e cunfine di u regnu francu, è per purtà a vera fede è l’ordine in un paesi paganu, l’interventu si trasfurmò invece in un cunflittu longu è difficiule, chì cuntinuò cù ribellione ricurrente ancu dopu à l’imposizione di novi tributi è a cunversione furzata à u Cristianesimu. L’operazione fubbenu infatti cundutte à parechje riprese è cù sempre più difficiultà contru à un nimicu frammentatu in numerose piccule entità autonome chì adupravanu tecniche di guerrilla: in u 774, à a fine di a campagna d’Italia, poi in u 776 è soprattuttu in u 780, dopu à u disastru spagnolu, cù a scunfitta di Vitichindu, chì era l’anima vera di a resistenza, essendu riesciuta à riunificà e varie tribù. A rigione sana fù smembrata in cuntea è ducati.
Da u 782, a cunquista si svolse in modi sempre più repressivi, devastendu e terre sassone in manera metudica è affamendu e tribù ribelle. U stessu Carulu promulgò u "Capitulare de partibus Saxoniae", chì impunia a pena capitale à chiunque avissi offesu u Cristianesimu è i so preti, misura per a cunversione furzata di i Sassoni. Circa 4500 Sassoni fubbenu ghjustiziati in u Massacru di Verden, è u stessu Vitichindu fù battezzatu in u 785. I Sassoni mantinenu a pace finu à u 793, quandu scuppiò una nova insurrezione in a Germania sittentriunale. Carulu a supranò subitu, attuendu a deportazioni di migliaia di Sassoni è ripupulendu a rigione cù culoni franchi è slavi. Fù ancu necessariu d'intervene in u 794 è in u 796, cù nove deportazione massicce in Austrasia è a sustituzione di e populazione, rimpiazzate cù i franchi. L’ultima misura presa da Carulu fù una nova deportazione, in u 804, di i Sassoni stabiliti oltre Elba, ma oramai a Sassunia era bè integrata in u duminiu francu, è i Sassoni cumincionu à esse arruulati regularmente in l’armata imperiale.
A guerra contru i Sassoni fù interpretata da i Franchi cum’è una sorta di "guerra santa", cù e cuntinue rivolte cunsiderate (è in parte era veru) cum’è un rifiutu di u Cristianesimu. U novu credu, d’altronde, era statu impostu cù a forza fin da u principiu, senza ch’è ci fussi, almenu in i primi tempi, da parte franca, un interventu missiunariu chì, oltre à u battesimu furzatu di u più numeru pussibule di barbari, avissi pruvatu à fà capisce u Messaghju evangelicu è u significatu di a religione à a quale ste populazioni eranu custrette à sottumette si. U stessu territoriu sassone, d’altronde, fù divisu è affidatu à e cure di veschi, preti è abbati, è chjese, abbazie è munasteri, bench’elli fussinu custretti à vive in un statu d’allarma cuntinuu. L’orgogliu naziunalistu di e tribù sassone fù infine piegatu definitivamente solu in u 804, cù l’ultima deportazione di massa (u biografu Eginardu riferisce chì ci fubbenu almenu 10.000 Sassoni depurtati in tuttu).
Vichjaia è Morte
[mudificà | edità a fonte]L’ultimi anni di vita di Carulu sò stati cunsiderati cum’è un periodu di declinu, per via di u peghjuramentu di e so condizione fisiche. U suvranu, chì avia oramai persu u vigore di a ghjuvantù, è stancu tantu in u corpu ch’è in l’anima, si era dedicatu più ch’è mai à e pratiche religiose è à l’emissione di capitulari dedicati à quistioni duttrinali di grande impurtanza: una svolta chì paria marcà a sperienza di guvernu di u so figliolu Ludovicu, chjamatu dopu "u Piu". Carulu cunsiderava a diffusione di a dottrina cristiana curretta cum’è un duvere è una rispunsabilità altissima, necessaria per cuntrollà a rettitudine murale micca solu di u cleru, ma dinù di u populu francu sanu.
À u principiu di l’811, u vechju imperatore dettò u so testamentu dettagliatu, ma ch’ellu riguardava solu a divisione di i so bè mobili (un patrimoniu in ogni casu enormu), una parte impurtante di i quali, divisa in 21 parti, duvia esse destinata à e lemosine per certe sedi arcivescovili. Hè un documentu ch’è ripiglia e caratteristiche di a “Divisio regnorum”, u testamentu puliticu redattu in l’806 in u quale Carulu, bench’ellu cuntinissi dispusizione precise, lasciava puru una certa margine per eventuale mudifiche o integrazione future. U testamentu privedia legati micca solu per i figlioli (legittimi o micca), ma ancu per i nipoti, un casu abbastanza raru in a legislazione franca. U documentu si cunclude cù a lista di i nomi di trenta testimoni, scelti frà i più stretti amichi è cunsiglieri di l’imperatore, chì avianu da garantisce u rispettu è l’esecuzione curretta di e so ultime vuluntà.
U sarcofagu di Proserpina, sicondu a tradizione, fù in a cattedrale di Aquisgrana u sarcofagu di Carulu Magnu da u 28 di ghjennaghju di l’814 finu à u 1165, quandu Federicu Barbarossa fece caccià l’ossi da a tomba per mette li in un reliquiariu.
Quasi in u stessu tempu di a redazzione di u testamentu, durante l’assemblea generale annuale di i grandi in Aquisgrana, hè stata emessa una seria di capitolari (seguiti da altri, nant’à temi simili, versu a fine di l’annu). Da u so cuntenutu si capisce chì ci era a cuscenza di una crisi generalizata di l’imperu: crisi religiosa, morale, civile è suciale. In una forma abbastanza insolita (una racolta di osservazioni fatti da persunaghji di altu rangu in i diversi settori), Carulu pari vulè spende l’ultime energie per rimette nant’à a strada dritta un Statu chì paria vacillà da drentu, malgradu l'istituzione è e leghje chì u guvernavanu è chì duvianu indirizzà lu bè: da a curruzzione sparta frà i nobili, i chjerichi è quelli chì avianu da amministrà a ghjustizia, à l’evasione fiscale, da e motivazioni vere di quelli chì sceglianu a vita ecclesiale à a diserzione è rinnegu di a cuscrizzione (in un periodu, per di più, minacciatu da l’incursione di l’omini di u nordu). Fù una spezia d’inchiesta ch’è Carulu volse promove nant’à i prublemi più maiori di l’Imperu, ma ch’è difficilmente arricò risultati cuncreti è pussitivi.
Mentre paria ch’è l’imperu avissi da cascà per causa di a debulezza centrale è di l’arruganza di l’aristucrazia franca, Carulu murì u 28 di ghjennaghju di l’814, in u so palazzu di Aquisgrana, è fù subitu seppellitu in l’atriu di a so cattedrale. Sicondu u biografu Eginardu, in l’iscrizzione in latinu nant’à a so tomba, Carulu era qualificatu “magnus”, un aggettivu chì dopu fece parte di u so nome.