Cantu di malincunia

À prupositu di Wikipedia

Cantu di Malincunia hè una puesia di Santu Casanova (1850-1936). Hè stata publicata in Fiori di Cirnu in u 1930.

Cantu di malincunia[mudificà | edità a fonte]

Cari monti diletti,
È colli profumati,
Ricordi suspirati
Di la vita,
Dopu longa partita,
Tornu à l'amate sponde,
Ma più nimu risponde
À la me voce.
Ùn ci hè più quella noce,
In la valle fiurita ;
Si n'hè andata la vita
Cù la pace.
Hè notte, tuttu tace
Intorn'à quelli lochi :
Ùn si vede più fochi
In lu cuntornu.
Invece di lu ghjornu,
S'avvicina la sera.
Sarà l'ultima spera
D'ogni lume ?
Fala chetu lu fiume,
Sò tristi l'arbuscelli,
Ch'ùn canta più acelli
In le so rame.
Piegnenu le campane,
Sò sculuriti i fiori
Cù l'ultimi splendori
Di a to vita.
È tù, gemma gradita,
Cascata in primavera,
Prima di vede a sera
Cume a rosa.
Si rinnova ogni cosa
Drentu lu to giardinu,
Ma u to voltu divinu
Hè in Paradisu.
Risplende lu to visu
Cume quellu di prima,
Ch'ùn'eri anc'à la cima
Di a billezza.
Tutta quella dulcezza,
Quelli tratti ridenti,
Parchè sò stati spenti
À l'aurora ?
A sepe si rinfiora,
È torna u rusignolu
À piegne lu to dolu
Tant'amaru.
O mondu cusì avaru,
M'hai spizzatu lu core,
Cugliendu quellu fiore
Senza spine !
Passu le siratine
Sottu l'amatu tettu,
Ma u to visu dilettu
Hè senza velu.
Si n'è cullatu in celu
Tra li canti è la gloria.
Manda qualchì mimoria
À chì suspira.
Pietosa hè la me lira,
A notte s'avvicina,
Dentru l'onda turchina
Ciotta lu sole.
Sò nate le viole
Da incurunà ti a testa
U ghjornu di a to festa
Ch'hè vicinu.
O perfidu distinu,
O notte senza stele,
O cose tantu belle,
Duva site !
O petre chì cuprite
Quelle riliquie care,
Alzate li un'altare
Sacrusantu !
Ch'ella senti u me cantu
Pien' di malincunia,
Chì ti chiama, o Maria,
In tutti i lati.
Quelli patti sacrati,
Dicisi in casa è fora,
Ormai hè ghjunta l'ora
D'osservà li.
S'e tengu à ramintà li
Ùn hè cà par mimoria,
Ch'hè troppu dura a storia
Di u passatu.
Addiu, o pegnu amatu,
Un'altra volt'addiu !
Ti lasciu trà l'ubliu
Di la notte.

Da vede dinù[mudificà | edità a fonte]