Vai al contenuto

Antiidrugenu

À prupositu di Wikipedia

L' antiidrugenu hè l'atomu d'antimateria simetrica di quiddu di proziu (1H, idrugenu urdinariu) : hè cumpostu di un pusitonu furmendu un nivulu di tondu à un antiprutonu com'è nucleu atomicu.[1] Omu u raprisenta à spessu incù u simbulu chimicu H, chì l'usu ùn ni hè eppuri micca ricunnisciutu da l'Unioni internaziunali di chimica pura è appiicata.

Pruduzzioni[mudificà | edità a fonte]

U prima atomu d'antiidrugenu hè stata produttu in 1995 à u CERN di Geneva da u sperimentu LEAR (Low Energy Antiproton Ring) cuncipitu par pruducia è accumulà antimateria : cunsistia à bumbardà l'agrigati atomichi di xenonu incù antiprutoni, chì inghjinareghjani paghji elittronu-pusitronu in a vicinanza di i nuclei di xenonu, da induva a prubabilità (mori debuli, di circa 10-19) di pruducia atomi d'antiidrugenu. I sperimenti ATRAP è ATHENA di u CERN ani apradatu u sodiu radiuattivu com'è fonti di pusitoni annantu à antiprutoni intrappulati in un campu magneticu, ciò chì parmissi di pruducia una cintunara d'atomi d'antiidrugenu à a siconda. Quist'ultimi aviani una tampiratura di uni pochi di cintunari di kelvin, ciò chì ùn parmittia micca di cunsirvà li chì si anniintavani contru à i pareti di u dispusitivu. A pruduzzioni d'antiidrugenu bassa tampiratura visa pricisamenti à pudè cunsirvà l'antiatomi cusì prudutti. À tal' fini, s'hè publicatu sperimenti induva pusitoni è antiprutoni sòstati intrappulati in campi magnetichi. I metudi di pruduzzioni d'antiidrugenu ani fattu l'ughjettu di brivetti, ma u cunfinamentu ottinutu ùn hè mai di mori longa durata, è l'antimateria hè luntana da pudè essa dispunibili cummircialamenti. U 18 nuvembri 2010, circadori di u CERN ani annunciatu ch'eddi sò riisciuti à intrappulà pà a prima volta l'atomi d'antiidrugenu in un campu magneticu.

Prubità[mudificà | edità a fonte]

Com'è n'importa chì elementu d'antimateria, l'antiidrugenu si annienta à u cuntattu di a materia, libarendu energia sottu forma di futoni è di particuli energetichi di a famiglia di i mesoni chì a parsona chjama "pidini", i quali si disintegrani à u so tornu in muoni, neutrini, elittroni è pusitoni. In virtù di a simitria CPT (ragruppendu i simitrii di carica, di parità è di tempu), l'antiidrugenu divaria avè glubalamenti listessi prubità ch'è l'idrugenu, in particulari listessa massa, listessu mumentu magneticu è listessi liveddi d'energia, da induva par indittu una stessa firma spittrali. Eppuri, par spiigà u predominiu di a materia annantu à l'antimateria in l'universu cunnisciutu, si ricerca evintuali picculi diffarenzi di prubità, chì svilariani una viulazioni di a simitria CPT. A cullaburazioni ALPHA hà cusì misuratu l'energia di a transizioni elettronica 1s → 2s di l'antiidrugenu : hè listessa à quidda di l'idrugenu urdinariu, pigliendu in contu l'accuratezza di a misura (di circa 2 × 10). Hà dopu misuratu a friquenza di a transizioni 2s → 2p è in hà diduttu u so spustamentu di Lamb : hè listessu à quiddu di l'idrugenu, contu tinutu di l'incertezzi (di circa 11%). A quistioni di l'interazzioni gravitaziunali di l'antimateria ferma aparta: l'upinioni largamenti duminanti hè chì materia è antimateria interaghjiscini in modu gravitaziunali di manera idantica, ma i ricerchi si parsuviteghjani attivamenti pà avè ni a prova.

Noti[mudificà | edità a fonte]

  1. 'Ss'articulu pruveni in parti da a wikipedia in francesu.