Acula codibianca
| |||||
|---|---|---|---|---|---|
| |||||
| Haliaeetus albicilla | |||||
| Classificazioni scentifica | |||||
| Regnu | Animalia | ||||
| Divisioni | Chordata | ||||
| Classa | Aves | ||||
| Ordini | Falconiformes | ||||
| Famiglia | Accipitridae | ||||
| Genaru | Haliaeetus | ||||
| Nomu binuminali | |||||
| Haliaeetus albicilla Linnaeus, 1753 | |||||
| |||||
L' Acula codibianca (Haliaeetus albicilla) hè un rapaci chì faci parti di a famiglia di l'Accipitridae.
Discrizzioni
[mudificà | edità a fonte]L'acula codibianca hè un aceddu maiori è alilargu. A coda hè corta. L'impiumatura hè bruna bughja, fora di u capu è a parti suttana di u coddu chì sò più chjari. A coda hè bianca ind'è l'adultu. L'aculi codibianchi annosi t'ani a testa è u coddu bianchi. A testa hè larga è u bizzicu hè forti. I patti è u bizzicu sò giaddi. U ghjovanu hè più scuru, incù a coda è u bizzicu più bughji.
Ripartizioni
[mudificà | edità a fonte]
L'acula codibianca stà accantu à l'acqua, in i grandi fiumi, i lava o ancu in i facciati maritimi. Stà piuttostu à u cantu di u mari, ma accadi ch'edda stessi in piaghja, o in i furesti. L'acula codibianca si scontra in Siberia (Russia), in u nordu di l'Auropa, in u nordu di a China, in u Giapponu. Ci sò i pupulazioni impurtanti in i paesi di l'exi-URSS, in Nurveghja, in Pulogna è in Alimagna (in particulari in l'exi-Alimagna di l'Estu).
In Corsica
[mudificà | edità a fonte]
L'acula codibianca era prisenti in Corsica in i tempi, ma hè sparita, dipoi 1939. Ci hè pochi rinsignamenti annantu à prisenza di l'acula codibianca in Corsica, ma pari ch'edda fussi piuttostu arrighjunata in a costa uriintali, in u stagnu di Palu, o in u stagnu di Chjurlinu (Thibault 1983). Duranti u seculu XIX, l'aculi codibianchi pudiani stà dinò in Bonifaziu è versu Aiacciu. Ci hè parechji ussirvazioni chì facini pinsà ch'eddi si tramutavani di tantu in tantu in muntagna. Dopu à a sparizioni di l'acula codibianca di Corsica, ci hè statu calchì ussirvazioni, par asempiu in a bocca di Verdi in 1966, è da un piscadori in u stagnu di Chjurlinu di frivaghju 1968 (Thibault 1983). L'acula codibianca pudaria essa introdutta torra in a Riserva di Scandula. Ma ci hè quantunqua u pinseri di a prisenza di l'alpana in a riserva.
Biulugia
[mudificà | edità a fonte]
L'acula codibianca hè un pridatori uppurtunistu, cibendu si par u più di pesci ch'edda cattura piumbendu. Eppuri, u so rigimu alimintari pò dinò inchjuda mammiferi marini, aceddi acquatichi, carogni è ancu volpi. U so nidu hè una impunenti struttura custruita da u coppiu ripruduttori è riimprudata annu dopu à annu. A femina ci diponi di regula dui ova chì sbucciani à u capu di 38 ghjorna.
L'acula codibianca si nutrisci pà u più di pesci (95%). Ma accadi ch'edda chjappessi calchì aceddu o picculi mammiferi com'è u topu o ancu a volpi. Caccighjeghja sola o in coppiu.
Tassunumia
[mudificà | edità a fonte]U nomu scentificu di l'acula codibianca hè Haliaeetus albicilla. U so nomu di genaru, Haliaeetus, hè d'urighjina niulatina è significheghja acula di mari, mentri chì u so nomu di spezia, albicilla, pruveni dinò di u niulatinu è significheghja coda bianca.
Cunsirvazioni
[mudificà | edità a fonte]Com'è tutti i rapaci, l'acula codibianca hè prutetta da:
- a cunvinzioni internaziunali di Washington (CITES) chì intardisci u cummerciu di i spezii di fauna è di flora minacciati di sparizioni.
Ci hè una piccula crescita di l'effettivi di l'acula codibianca, incausata da a so prutizzioni. Ma a pupulazioni in Auropa hè di circa 600 coppii. I minacci pà l'acula codibianca so l'usu di u vilenu, a sparizioni di u so ambienti naturali, a caccia illegali, l'arrubecciu di l'ovi è di i piulacona.
Rifarenzi
[mudificà | edità a fonte]- Thibault, Jean-Claude, Aceddi di Corsica - Les oiseaux de Corse, 1983, PRNC (in francesu)
Liami
[mudificà | edità a fonte]- L'acula codibianca in Scandula Archiviu 2017-07-04 at the Wayback Machine