A Lingua Corsa (Ghjuvan’ Petru Lucciardi)

À prupositu di Wikipedia

A Lingua Corsa hè una puesia di Ghjuvan' Petru Lucciardi, chì face parte di u so libru entitulatu Canti Corsi.

A Lingua Corsa[mudificà | edità a fonte]

"Pensu cun gran dilettu à la ghjesola": A ghjesa di Santu Petru di Tenda
"À a mio surella Fiordispina"


Di u Corsu mi ne restu sempre in brama,
È u parlariu pertuttu, ancu in Parigi;
Perch'è 'ssa lingua a m'hà imparata mamma,
Senza tante fatighe nè artifici.


Mi rammenta i parenti, eppo l'amici;
I ghjochi di i cumpagni, è cosa s'ama
Quandu s'hè ancu zitelli - chì ùn si trama
Di fà male à nisunu - è s'hè felici .


Quandu u parlu mi vene tuttu in core:
I vechji, i genitori, i mio fratelli,
I vicini, eppo e case, eppo i stradelli,


Hè u locu ind'è si và quandu si more...
Pensu cun gran dilettu à la ghjesola,
È à la campana chì sunava a scola.

Riferimenti[mudificà | edità a fonte]

  • Ghjuvan Petru Lucciardi (1921) Canti Corsi, Castelnaudary, Sucietà d'Edizione Occitane.

Da vede dinù[mudificà | edità a fonte]