Voceru di una ghjovana veduva
(Reindirizzamentu da Vociaru di una ghjovana veduva)
U Voceru di una ghjovana veduva (o Vociaru di una ghjovana veduva) per l'umicidiu di u maritu hè un voceru anticu di Corsica. Issu voceru hè mintuvatu in i Canti populari corsi di Salvatore Viale (1855). Una veduva canta per u so maritu assassinatu.
U voceru
[mudificà | edità a fonte]- O caru di la surella,
- Cosa vecu quì stamane?
- Lu mio cervu pelibrunu
- Lu mio falcu senza l'ale!
- Vi vecu cù li me ochji
- Vi toccu cù le mio mane;
- O caru di la surella
- Basgiu le vostre funtane.
- Pussibile ch'ellu sia?
- Non la credu mancu avà ne.
- Lu mio marmaru piantatu
- Lu vapore à mezu mare
- Lu mio fattu à lu pinnellu
- Ghjuntu quì da le cità ne!
- Tantu vidi ch'è à Maria
- Ella non pudia durà ne.
- Lu mio scortu per fughji
- Lu mio bravu per parà ne!
- S'ellu si fusse truvatu
- Cù le so arme à le mane
- Non lasciava fà si tortu
- Non l'avianu fattu male.
- O più dolce di lu mele!
- O più mansu di lu pane!
- Paria Diu l'avesse fattu
- O Maria, cù le so mane.
- Quantu vi fecenu onore
- Quandu cullaste à Livia!
- Surtinu tutti i signori
- Fecenu tanta allegria
- La mattina di lu Vescu
- Nun ci funu tante evvive.
- S'ella l'avessi saputu
- Vostra surella Maria!...
- Perchè tuttu lu mio sangue
- Per voi datu l'averia
- E parsone quant'è mosche
- Mandà quì eiu vulia
- Eppoi mette mi à la testa
- Vostra surella Maria.
- Ghjunta sù la vostra porta
- Voi cun mè trattaste male:
- Non usciste mancu fora
- À vulè mi scavalcà ne.
- Ci sò entrata à trecce stese
- O fratellu, in queste sale;
- Eppoi ci aghju trovu à voi
- Spanzatu cum' un maghjale.
- È per me lu mio babbà
- Quantu avia vulutu fanne
- Da la cima di la pieve
- Tesu avia lu cannuchjale;
- E pò avia sceltu à voi
- O pegnu particulare!
- O altu quantu lu sole!
- O largu quantu lu mare!
- Bastava chì fuste statu
- Man' di voi la medità ne.
- Le richezze in questu locu
- Fussin' elle state rare
- È cun voi vostra surella
- Ne fusse andata à zappare
- Perchì nun avesse pientu
- Fratellu, di questu male!
- S'ella fussi per la robba
- Per impegni o per dinari
- O caru di la surella
- Nun vi lasciavamu andari;
- Perchì in sù ci era lu fiumi
- Ed inghjò ci era lu mari.
À a socera.
- O Mamma, site la meia:
- M'era infurmata di tuttu:
- Era l'arburu frundutu
- Era carcu d'ogni fruttu:
- Ma per mè la sventurata
- Nun ci hè statu altru ch'è luttu.
- Eiu nun aghju fattu lettu
- Nè impastatu mancu pane:
- Eri sera ci sò entrata;
- Devu andà mi ne stamane.
- Cum'è mè la sventurata
- Mai si ne possu truvà ne.
- Stamattina mi sò messa
- Tutta bisgiù, gioie è fiora
- Ma mi l'aghju da levà,
- Fratellu, s'appressa l'ora;
- Aghju da pone mi indossu
- La tinta di vitriola,
- Fin' tantu ch'a vita dura
- Vestita da capu à coda.
- Fin' da mercuri mattina
- Eiu v'aspettava quì ni
- Sempre guardendu la strada
- S'eiu vi vidia venini
- Nun pensendu ch'è voi fuste
- In bocca di l'assassini.
- Ah chì mi l'avesse detta
- La mattina di Natale
- Quandu in chjesa di Levia
- Voi muntaste cun babbà ne
- Eppoi d'un occhjata sola
- Voi ci vuleste cascà ne!
- S'è nun vi fussi piaciuta,
- Quantu ne daria stamane!
- Bestemmià vogliu lu Rè
- Maladì lu Tribunale!
- Perchè lu disarmamentu
- Nun l'avianu da fà ne;
- Lu tempu di l'assassini
- Appunt'è quistu d'avale!
- Più temutu di lu focu
- Più stimatu di lu mare!
- S'ella avia le so arme
- U me caru ùn t' avia male...
- Ahi! ch'avà nun mi n'importa;
- Fate pur' cum'è vi pare.
- Ciò chì s'hè fattu in Tallanu
- Nun l'hà fattu mai nissunu.
- Perchè l'avete ammazzatu
- Senz'er fattu male alcunu?
- L'avete tombu innucente
- Cum'è Cristu onniputente.
Ligami
[mudificà | edità a fonte]
'Ssu artìculu hè in custruzzione. Pudete cuntribuisce à a so redazzione.