Farraghju (Dumenicantone Versini)

Farraghju hè una puesia scritta da Dumenicantone Versini (1872-1950) di Marignana, dettu "Maistrale". 'Ssa puesia fù publicata in A Muvra (1923).

Farraghju[mudificà | edità a fonte]

Farraghju hè u misachjolu^[1] cortu è fieru

Chì porta, in la brisacca, baccalà.

Face ride ad ognunu in Carnavà,

È, par sfrancà sudore à u cantuneru,

Di l'annu porta pocu lu fangottu:

Apress'à le Cennare, le so prove

È d'ùn purtà cà ghjorni vintinove

O, quand'ella li salta, ancu vintottu.

Cumencia à cilibrà la Ciriola,

Chì ne ride in latinu lu curatu,

Cumanda grassu o magru lu stantatu

Dicendu: a vita hè una cummidiola.

Ellu di la stagione, hà pochi guai,

Ma eu la mascara è i so falsi nasi,

Di l'invernu, quessu pratende guasi

Di fà pocu travagliu è gode assai.