Corsica Ponte Novu

Corsica Pontenovu hè una puesia di Santu Casanova (1850-1936). Hè stata publicata in Fiori di Cirnu in u 1930.

Corsica Pontenovu

Curunata di boschi,

Bagnata da lu mare,

À i pedi d’un altare

Inghjinuchjata.

Sempre martirizata

Da Turchi è da Cristiani

In li monti, in li piani

È pà le valle.

Daret’à le to spalle,

I Vittuli imbuscati

Si sò sempre piattati

À fà ti focu.

Si spegne pocu à pocu

U to core in lu dolu,

È Ùn ci hè manc’un figliolu

Chì ti chjama !

A natura chì t’ama

Cunsola i to dulori,

Dendu ti rose, fiori

È dolce sole.

Nascenu le viole

À tutte le staghjone,

Spegne le nivaghjone

U to clima.

Ma ùn sè anc’a la cima

Di tutti li to guai

Ch’ùn finiscenu mai,

O mamma cara !

Intorn’à la to bara

Ùn ci hè cà rinigati

Cù l’ochji spalancati

D’impustura.

Bella la to statura,

Celeste lu to visu,

Ma ancu in Paradisu

Sarè trista.

Ùn si sarà mai vista

Sorte cusì turbata,

Povara, tribulata

Man’è sera !

Torna la primavera

Cù tutti li so fiori,

Rinascenu l’amori

Di u passatu.

U cuccu s’hè spartatu,

Cantanu i rusignoli,

Ma piegnenu li doli

È la sciagura.

Finchì lu mondu dura,

Rinasce ogni billezza

È torna l’aligrezza

In tutti i cori.

Ma par tè li duttori

Ùn hanu medicine,

Chì sè ghjunt’à la fine

Di e to noie.

Sò finite le gioie

Di li tempi passati,

I to figlioli ingrati

Sò à la festa.

Fà scuppià la timpesta

Di u ventu pupulare,

Ch’ella li port’in mare,

È cusì sìa !

Eccu ci à Pontenovu

Pien’ di sol’è di rose,

Ma par noi sò cose

Inaudite.

Sgottanu le firite

D’i veri patriotti

Ch’hanu li membri rotti

Da lu piombu.

Hè mutu lu culombu,

È dipoi stamane

Sò sciolte le campane

In lu dulore.

S’hè scuratu lu sole,

Mughja l’onda di Golu,

Ùn ci hè più un corsu solu

In tutt’a valle !

Tazzati da le palle,

Trascinati da u fiume,

Falanu trà lu fume

Di a rivolta.

Copre la nebbia folta

Sta lutta cusì atroce

Marcata d’una croce

Senza nome.

Finita hè la funzione,

Sentu cantà lu Requie,

È sonanu l’esequie

Di a nostra libertà.