Un muntagnolu

Un muntagnolu hè una puesia di Petru Lucciana, dettu Vattelapesca (1832-1909). Hè stata publicata in l'Annu Corsu in u 1923.

Un muntagnolu corsu, ind'u pilone

Più fieru assai ch'è un rè dentr'u so mantu,

Volse scende in cità, ch'è tantu tantu

Millantaghjà sentia. Ma quandu pone

U pede ind'è rastelli, passa accantu

Di sbarrazzini un nulu, che un vechjone

Si pigliavanu à guaia; ed e persone

Ridianu, è omi è donne. — Hè questu u vantu

Di a vostra cusì fiera civiltà ?

U muntagnolu grida. À l'indigente

Sta razza di succorsi quì si dà ?

Dunque i vechji frà voi s'anu à burlà ?

Eo ritornu à e mio teppe, induve sente

Pietate ognunu di a povara ghjente.

Da vede dinù