Tuttu hè per sta maladetta trippa
Tuttu hè per sta maladetta trippa hè una puesia di Anton' Battisti Paoli (1858-1931) dettu Paoli di Tagliu. Hè stata publicata in a Barretta Misgia in u 1929.
Tuttu hè per sta maladetta trippa
[mudificà | edità a fonte]- Avà si ch'aghju zingatu
- Tuttu in pienu lu vespaghju !
- Sò già stancu è fatigatu,
- Nun so più cum'è feraghju,
- Quante visite signore !…
- Ghjornu, notte à tutte l'ore.
- Ti parlai d'un matrimoniu
- Di due putenze Corse,
- Di Miseria cun Bisognu ;
- Prestu la nutizia corse
- Pè lu monte è pè la piana
- Da la fresca Tramuntana.
- Or s'eo m'era statu zittu
- Giacchì lu silenziu hè d'oru
- Sempre in pedi, sempre rittu
- Nun saria per mio martoru
- À riceve questu è quellu
- Ch'aghju biotu lu cerbellu.
- Induvinu quale sia
- Di sta ghjente la primura.
- Ne scala da ogni via
- È di tutta infurcatura,
- Longhi, gialli, sfusulati,
- Barbi zifferi è sbarbati.
- Ci ne ghjunghje zampi corti,
- Bocchi larghi è spalli stretti,
- Ci ne ghjunghje grossi è forti
- Vechjaconi è giovanetti,
- Barbi neri è musculati
- Ben disposti è preparati.
- Per sapè la data esatta
- Di la grossa scurpacciata,
- Ma chì ghjente tonta è matta
- Pe lu tondu pare nata !
- À la fin', cosa cridete ?
- Certe cose ùn sò secrete.
- Voi per lettere d'invitu
- Sareti tutti chjamati,
- Ognunu sarà avvertitu,
- Tutti bene rinsegnati
- Di lu ghjornu, ùn dubitate,
- Cari, nun vi strapazzate.
- Cessate lu muvimentu,
- Riturnate à lu travagliu,
- Ognunu sarà cuntentu,
- Nun si farà nisun' sbagliu ;
- L'ordini aspettate, infine,
- Una di ste trè matine.
- In quaresima ùn si face
- Festini di sta natura ;
- Dunque riturnate in pace
- Chì fate trista figura,
- Siate ùn pocu riservati
- Nun fate li scrianzati.
- Pincu hè statu prevenutu
- Per furnì lu bestiame
- Perchè hà scrittu è cumbattutu
- Per smercià moltu pullame,
- È si pigliarà primura
- Di fà ne la furnitura.
- Matteolu hà già prumessu
- Sacchi è balle di farina ;
- Tuttu marchja cun prugressu,
- Lu mumentu s'avvicina
- Di fà focu à li tiani
- È stinzà li nostri zani.
- Natalellu s'è ingagiatu
- Di furnì brocciu è furmagliu ;
- Tuttu hè statu cummandatu
- À l'ingrossu è à lu detagliu
- Ind'è boni furniscitori
- Per nun fà lu corri corri.
- L'oliu per fà le fritelle
- Venerà da Capi-Corsu ;
- Appruntate le manselle
- Ziu Bisognu hè un can' di morsu,
- Corre, cerca, è hè omu di core,
- Si sbroglia per fà si onore.
- Li pastizzi variati,
- Le carotte, o cari amici !
- State allegri è spenserati,
- Ghjunghjeranu da Parigi,
- La cummanda hè digià fatta,
- Longa, dettagliata, esatta.
- Dunque arrutate li denti
- Chì la roba hè ordinata,
- State sani è ben' purtenti,
- La cucina hè ben' muntata ;
- À l' avisu siate pronti,
- È femu ch'ella si conti.