Stella tramuntana

À prupositu di Wikipedia
A stella tramuntana: "Polaris"

A Stella tramuntana (o stedda tramuntana) o Alpha Ursae Minoris (α Ursae Minoris / α UMi) hè a più stella luccichente di a custellazione di U Carrittellu (Ursae Minoris). Da tempi antichi antichi si sà chì a stella tramuntana currisponde incù una bona pricisione à a direzzione di u polu nordu cilestu. A so distanza angulare cù u polu cilestu hè, à i ghjorni d'oghje, circa 0°45'. Per via di 'ssa pruprietà essenziale per a lucalisazione, in particulare in u cuntestu di a navigazione, quasi i tutti e civilisazione avianu adupratu a stella tramuntana.

Per via di a so pusizione chì si cunfonde guasi incù a direzzione di l'assu di rotazione di a Terra, si diceria chì l'altre stelle di u celu li giranu intornu. È a stella tramuntana ùn sparisce mai di l'emisferu nordusi è si vede sempre.

Scrisse Shakespeare: « Socu custante quant'è à stella tramuntana », ma difatti u polu nordu cilestu cambia di pusizione seculi è seculi dopu, per via di a pricessione di l'equinoziu, vene à dì un cambiamentu lentu di a direzzione di l'assu di i poli di a Terra. L'assu di i poli di a Terra hà da evuluà sin'à parvene à una direzzione chì serà vicinissima di quella di a stella tramuntana u 24 marzu di u 2100, eppo dopu s'hà da alluntanà mentre parechji millenii, è à la fine serà distante di circa 45 gradi.

Cassiupea ("W"), U Carru è a stella tramuntana

Quattru milla anni fà, a stella tramuntana era Thuban (α Draconis) ; in u futuru, diventerà Véga (α Lyrae) à u so tornu a stella tramuntana.

Hè stata usata da sempre a stella tramuntana da i marinari cum'è un aiutu à a navigazione. Hè attistatu 'ssu fattu da i più scritture antiche assiriane. Hè faciule à truvà a stella tramuntana à parte da U Carru (Ursae Majoris). suvitendu a linia tracciata da β Ursae Majoris (Merak) à traversu α Ursae Majoris (Dubhe), e dui stelle da u latu drittu di U carru. Si pò ancu suvità a parte dritta di a punta centrale di u « W » di Cassiupea, per ghjunghje à a stella tramuntana.

À i ghjorni d'oghje, ùn esiste micca l'equivalente di a stella tramuntana in a vicinanza di u polu sudu cilestu. Chì a più stella vicina da u polu sudu cilestu hè σ Octantis, una stella moltu poca luminosa. Eppuru σ Octantis indetta u polu sudu ed hè aduprata difatti per truvà lu, ma incù una precisione inferiore à quella di a stella tramuntana, per ciò chì cuncerna u polu nordu.

A stella tramuntana si trova à circa 430 anniluce di a Terra. Hè una stella variabile cefeide supragigante, incù dui cumpagne più chjuche vicinu vicinu. Difatti a stella tramuntana hè un sistemu stellare triplice.

In Corsica[mudificà | edità a fonte]

Si vede bè tuttu l'annu a stella tramuntana, cum'è in tuttu l'emisferu nordu. U nome corsu "Stella Tramuntana" face referenza à a tramuntana, u ventu chì soffia in Corsica da u nordu. Di manera simile, a stella tramuntana hè stata aduprata per insignà ci a direzzione di u nordu.

Referenze[mudificà | edità a fonte]

  • Ciavatti, Petru (dir. redazzione) Dizziunariu U Muntese, 1984, Albiana

Da vede dinù[mudificà | edità a fonte]