St'Almanaccu

St'Almanaccu hè una puesia scritta da Dumenicantone Versini (1872-1950) di Marignana, dettu "Maistrale". 'Ssa puesia fù publicata in A Muvra (1923).

St'Almanaccu

Suminatu di bugie,

Eccu allora st'almanaccu.

Di pazzie in 'sse pagine

Ne aghju coltu pienu un saccu

Di i scrivani tutti matti:

Dunque chì nimu l'accati !

Ùn cumprate stu librettu

Ch'hè lu rè di li bugiardi ;

Piuttostu cumprate un casgiu,

Fighi secchi, pruni o cardi;

Questu è un di 'ssi salteri

Par fà runcà li sumeri.

Nanzu di spende i to soldi,

Dì ti vurria una cosa :

E stagione, in st'almanaccu,

Deven'esse à la ritrosa;

Cù le lune vechje o nove,

In più bellu, deve piove.

Ùn n'aprite 'ssu scarsellu,

State mi à sente, o figlioli !

Quandu punarete pomi,

Nasciarà forse fasgioli ;

Si vo suminate granu,

Surtarà topi à viranu.

C'un simule chiaravalle,

Mancu più ghjanda à lu valdu,

Nè lustincu, nè filetta,

È senza vede lu caldu,

Cumu a pudarete pate?

Nivarà tuttu l'istate.

Di traversu s'ellu vene

Ancu u mese di sittembre,

Cumu pudaranu nasce

L'agnelli cù le so vembre ?

Sparisciaria da veru

U sudore à u cantuneru.

D'invernu sarà lu seccu

È talmente lu calore

Chì s'intanarà lu fiume.

È tandu u tintu pastore

Allora duva hà da sbatte

Par battizzà lu so latte ?

Dunque di li to quattrini,

Sì tù voli fà ne contu,

Lascia corre st'almanaccu

È sii piuttostu prontu

À mandà mi unu spurtellu

Di brocciu e di figatellu.

Riferimenti

• L'almanaccu di A Muvra per 1923 Archiviu 2023-12-03 at the Wayback Machine