Punta di a Vacca Morta

A cima di a Punta 'lla Vacca Morta incù a cruci cimaghja

A Punta 'lla Vacca Morta (o Punta di a Vacca Morta) hè un vertici muntosu di 1314 metri d'altitudina situata in Pumonti, vicinu à u paesu di Cartalavonu, un paisolu di l'Uspidali annantu à a cumuna di Portivechju).

Tupunimia

U nomu Punta 'lla Vacca Morta faci chjaramenti rifarenza à a prisenza à tempi antichi in 'ssu locu di una vacca morta.

U terminu di massicciu di a Tasciana hè dinò usatu par discriva a seguita di vertici vicinanti menu alti situati à punenti.

Giugrafia

Situazioni

A Punta 'lla Vacca Morta si drizza trà a furesta è u lavu di l'Uspidali à livanti, a cumuna di Carbini à u nordu, a pianura di Portivechju à u sudestu è a muntagna di Cagna incù a vaddi di l'Urtolu à u sudupunenti.

A Punta 'lla Vacca Morta hè situata in cunghjunzioni à l'insù di trè bacini virsanti : l'Osu à livanti, l'Urtolu à punenti è u Rizzanesu à u nordu. Delimitighja cussì trè rigioni di u Sudu di a Corsica : l'Avretu, a Rocca è l'Alta Rocca. Duminendu i circonda di l'Uspidali, 'ssa vetta offri un panurama beddu sgaghjatu annantu à i ribbi di u Mar' Tirrenu è annantu à i muntagni maestri di u Sudu di a Corsica, è ancu annantu à i rilevi di u Nordu di a Sardegna.

Idrugrafia

U fiumu Urtolu pidda a so fonti annantu à a Punta 'lla Vacca Morta.

Storia

U casteddu di l'Accintu, da u punenti

À uni pochi d'ettomitri di a Punta 'lla Vacca Morta, appena più in ghjò annantu à u spiculu nordupunenti, si trovani i ruvini di u Casteddu di l'Accintu.

Casteddu di l'Accintu

I mura à u nordu

S'agisci quì di l'accinta di u casteddu di a Tasciana, u nomu di 'ssu massicciu sopra à Oronu è Carbini.

A superficia di l'edifiziu, abbastanza bè cunsirvatu, hè supiriori à 2000 metri quatrati. A so lucalizazioni hè atipica par una piazza forti medievali chì ancu s'è l'isulamentu è l'altitudina erani dissuasivi, si pò nutà l'assenza di riali difficultà naturali. U panurama annantu à i vaddi di l'Urtolu è di u Rizzanesu hè tantu cumplettu, da i costi insin'à u Monti Alcudina, ch'iddu ni facia, incù a vicinanti Punta 'lla Vacca Morta annantu à a piana d'Avretu, un puntu di surviglianza strategica maghjori in l'Alta Rocca.

Da veda dinò

• l'Avretu
• Portivechju