I gridi di Bastia

I gridi di Bastia hè una puesia di Petru Lucciana, dettu Vattelapesca (1832-1909).

I gridi di Bastia

Quandu pur' centu mill'anime

Averà a nostra Bastia,

Serà, temu, inabitabile

Per l'orribile armunia

Ch'è ind'e piazze, strade è viculi

Capu è orechje intrunerà.

Oh, guerdate! di criàmpuli,

Di straccioni ell'hè ripiena,

Ch'è frà e gambe à ghjente correnu,

Dendu mughji à tutta lena;

È di gnere ogni spettaculu

È di fischii ùn pò mancà.

Pur', di mezu à quelle ch'ùrlanu,

Ci sò voce ancu suave:

Elle ùn dicenu, ma cantanu,

Quandu acute è quandu grave,

« Torta, latte, pesci ed ostrice,

È panizze è carcinè. »

E so donne : — O latte! — cantanu,

Sente parmi tanti ucelli

In fiuritu è verde pasculu

Duve saltanu l'agnelli,

È e funtane vive schizzanu,

Cume argentu, qua è là.

Da vede dinù

• Petru Lucciana