Grandi Muraglia Chinesa
A Grandi Muraglia Chinesa (o Grande Muraglia Chinese) (in chinesu tradiziunali 長城 in chinesu simplificatu 长城 in pinyin Wànlǐ Chángchéng), nota in China com'è Wanli changcheng (Grandi muraglia di 10.000 Lǐ), cunsisti in una lunghissima seria di mura edificati in l'oghjinca China. A so custruzzioni cuminciò in u III seculu a.C. (circa 215 a.C.) par vulè di l'impiratori Qin Shi Huangdi, u stessu à u quali si devi u cusiddittu Asercitu di terracotta di Xi'an è u sempri inviulatu tumulu sipulcrali. Divia serva à cuntena l'incursioni di i populi cunfinanti, in particulari di i Mongoli, ma ùn si svilò micca moltu efficaci, parchì l'invasori riisciani à spessu à sfruttà i punti debuli rapprisintati da i porti chì, assulutamenti, a muraglia divia avè. Nonostanti u nomu chinesu (u Lǐ hè una misura chì currispondi à circa 500 metri) a lunghezza di a muraglia hè stata, finu à pocu tempu fà, cunsidarata di 6 350 chilomitri incù altezzi variabili. In u 2009, da i misurazioni uttinuti incù più ricenti strumintazioni tecnulogichi (raghji infrarossi, GPS) a Grandi Muraglia saria longa 8 851,8 chilomitri, veni à dì circa 2 500 chilomitri in più di quiddi stimati innanzi. St'ultimu datu saria smintitu da più ricenti misurazioni chì stimani in 21.196,18 km a lunghezza tutali di a Grandi Muraglia Chinesa. Hè stata dichjarata da l'UNESCO patrimoniu di l'umanità in u 1987. Hè stata insirita in u 2007 frà i setti maraviglii di u mondu mudernu. A visibilità da a Luna fù spessu indicata com'è l'unica opara umana visibili da u spaziu (o tuttu à fattu da a Luna), un'affirmazioni chì, bench'è sughjistiva, hè priva d'ogni fundamentu. U mutivu hè moltu simplici: ancu s'edda hè longa 21.000 chilomitri circa, una misura tiuricamenti distinguibili da u spaziu, a Grandi Muraglia hè parò larga menu di 10 metri, par via di cunsiquenza ghjà à una cintunara di chilomitri d'altezza, è à maiò raghjoni da migliaia o cintunara di migliaia di chilomitri, saria cumplittamenti à u di fora di u puteri risulutivu di l'ochji umanu. Effettivamente, molti astrunauti ani rifiritu à u quartieri generali di a NASA di ùn avè mai nutatu a sarpighjanti custruzzioni, s'eddi ùn usavani micca u telescopiu. Si pudaria distingua forsi da u paisaghju à ochji nudu in cundizioni eccezziunali di visibilità. In ogni casu, da a Luna hè assulutamenti impussibili di veda la, apposta ch'è à quidda distanza a Terra apparisci com'è una "maravigliosa sferula, principalamenti bianca, incù un pocu di turchinu è calchì zona giadda è uccasiunalamenti un pocu di vegetazioni verdi".
Influenza culturali
[mudificà | edità a fonte]
A sprissioni "Grandi Muraglia" fù à spessu imprudata par simbulizà calcosa d'enormu chì pò impidiscia l'accessu à calcosa. Par analugia, una grandi struttura astrunomica hè stata chjamata in stu modu.
Una lighjenda vularia chì i schiavi morti duranti a custruzzioni fussini sippidditi à l'internu di a muraglia. In rialità resti umani sò stati truvati in i circonda di i mura ma mai à l'internu. Di u restu i corpi, dicumpunendu si, avariani pussutu distabilizà ni a struttura.
In i primi anni di u duimilla hè divintata l'opara architittonica più vutata in un sundaghju effittuatu, incù mitudulogii piuttostu cuntruversi, à fini di stabiliscia un insemu d'opari chì pudissini essa cunsidarati i Setti maraviglii di u mondu mudernu.
U ghjocu da tola di u Mahjong, invintatu in u XIX seculu, cilibreghja a custruzzioni di a Grandi Muraglia grazia à tisseri particulari in avoriu è bambù simili à mattuncini (i stessi usati in u sulitariu). I primi fasi di u ghjocu sò a custruzzioni di a muraglia è l'apartura di a breccia.
U scrittori praghesu Franz Kafka s'hè ispiratu di a Grandi Muraglia in u so frammentu in prosa intitulatu da Max Brod Duranti a custruzzioni di a muraglia chinesa (Beim Bau der chinisischen Mauer).