E Notte di u Pianò d’Erbalonga

E Notte di u Pianò d’Erbalonga, creatu in u 2012 per iniziativa di Patriziu Moracchini, hè un festivale internaziunale di pianò chì si svolghje, ogni statina, in Capicorsu. Stu festivale s’impreme di fà vene pianisti di livellu internaziunale in Corsica. S’hè imprimuratu, dinù, di presentà artisti di a nova generazione muntante.

E Notte di u Pianò d’Erbalonga - 2014

Intèrpreti

Dipoi a so creazione, u festivale hà accoltu pianisti cum’è Andreï Gavrilov, Andreï Korobeinikov, Iddo Bar Shaï, Plamena Mangova, Guigla Katsarava, Ilya Rachkovsky, Rémi Geniet, Vardan Mamikonian, Shani Diluka, Edna Stern, Victoria Kogan, Claire Désert, Kotaro Fukuma, Sofja Gülbadamova, Sergio Tiempo, Momo Kodama, Claire Huangci, Adam Laloum, David Kadouch, Louis Schwizgebel, Roger Muraro. In mùsica di càmera, Philippe Bianconi, è Tedi Papavrami, è dinù, u terzettu “Les Esprits” cumpostu da Mi-Sa-Yang, Adam Laloum è Victor Julien-Laferrière.

Lochi di i cuncerti

I cuncerti si svòlghjenu à l’aria aperta ind’è l’embiu di un teatru verde, chjassu di u Cunventu, in a cumuna d’Erbalonga, à ottu chilòmetri da Bastia. U teatru conta 1 400 posti à pusà. Ci hè un bellìssimu ribombu acùsticu.

Frequentazione

In trè anni, u festivale si hè sviluppatu per raghjunghje un livellu di primura ind’è a prugramazione corsa grazie à un successu di stima è à u pùbblicu, corsu per l’ottanta per centu. Durante a stagione 2014, u festivale hè crisciutu di più di u cinquanta per centu in nùmaru d’uditori. Appughjèndusi nant’à una prugressione nutèvule di a frequentazione dipoi u 2015, finora, u festivale s’appronta à lancià a settèsima edizione.

Prugettu generale “E notte di u Pianò”

L’andamentu artìsticu di E Notte di u Pianò prusegue per mezu di un festivale novu, “ E notte di u Pianò – Parigi” chì vene à diffusà è mette in valore u prugettu d’Erbalonga. “E Notte di u Pianò – Parigi” sò nate in u 2014 è presèntanu, in associu cù a Scola Nurmale di Mùsica di Parigi, giòvani pianisti esciuti da i gradi più alti di a Scola. Stu prugettu cumplementare pariginu hà dinù per ambizione di presentà dipoi st’annu u Premiu Cortot chì ricumpensa da u 2014 u vincitore primu numinatu à l’unanimità di u Diplomu Superiore di Cuncertistu di pianò di a Scola.

Durante l’annu 2016, “E Notte di u Pianò – Parigi” hanu realizatu un primu dischettu cù u cuncorsu di u pianistu, Ilya Rashkovsky. Arregistratu in Corsica ind’è u magnìficu uditoriu di Pigna, in Balagna, stu discu hè cunsacratu à Schumann è Chopin.

Liami

• Situ Web “E Notte di u Pianò d’Erbalonga” Archiviu 2018-02-04 at the Wayback Machine
• Situ Web “E Notte di u Pianò – Parigi”

Fonte

'Ss'articulu pruvene in parte da l'articulu currispundente di a wikipedia in francesu.