Calanche di Piana

E calanche di Piana

E Calanche di Piana (o calanchi di Piana) sò calanche situate annantu à a costa punente di a Corsica, in u paese di Piana, trà Aiacciu è Calvi, annantu à u stradone di u cantu di u mare.

Geugrafia

Geolugia

U stradone in e calanche

E Calanche sò una furmazione geologica di rocce plutoniche chì facenu parte di l'inseme chjamatu "Corsica cristallina" à rocce magmatiche, à u punente di a linia partendu da Calvi è ghjunghjendu sin' à Sulinzara.

Rilievu

U fiumicellu u Dardu in e calanche

E calanche si prisentanu sottu à a forma d'una piccula catena muntosa à forma di "V" orientata versu a dritta di e Rocce Turchine, chì smarra à u nordu sopra à a cala di Dardu situatu annantu à a sponda sudu di u golfu di Portu è si termineghja à u sudu à u ponte di Cavallaghju. U puntu più altu si stabilisce à 698 metri. À mezu si trova un scogliu, duminatu da u Capu Ghjineparu (515 metri).

E calanche sò percorse da u fiumicellu di Dardu chì nasce sottu à u Capu di u Vitullu (1311 m). E so acque eranu in tempi di una volta usate per fà voglie un mulinu à u locu dettu U Mulinu sottu à u ponte di Cavallaghju.

Accessu

Hè impussibile d'accede à u mare dapoi a strada in e calanche di Piana.

Patrimoniu mundiale

Incù u golfu di Portu, u golfu di Girulata è a riserva di Scandula più à u nordu, e calanche di Piana sò iscritti dapoi u 1983 annantu à u Patrimoniu mundiale di l'Unesco.

Girandulate

U scogliu chjamatu u core

E calanche di Piana sò percorse da parechji stradelli :

• u stradellu bassu versu u "Castellu" : hè un stradellu chì principia in u locu dettu "a Testa di u Cane" è chì porta sin'à u scogliu dettu "Castellu" (332 metri). U stradellu hè una longa falata atturchjata versu l'orlu di e scugliere chì strapiombanu u golfu di Portu, à mezu à un ciambugliu di petre. 'Ssu percorsu, d'una durata d'un'ora, ùn hè micca d'una grande difficultà ma ci sò e petricaghje.
• u stradellu altu : un stradellu chì principia à menu di 200 metri à punente di "a Testa di u Cane", vicinu à a barra "e Rocce turchine", chì righjugne à u sudu a D81 trà u ponte di Cavallaghju è u ponte di Mezzanu passendu in e Rocce Turchine è u puntu più altu di e Calanche.
• "l'anzianu stradellu da Piana à Ota" : stradellu partendu da l'oratoriu Santa Maritò situatu annantu à u stradone D81, pocu dopu à a barra di e Rocce turchine cullendu da Portu, per mezu à a travirsata di e Calanche, è chì righjugne u stradellu precedente.

I dui ultimi stradelli permettenu ancu di ghjunghje in a furesta territuriale di Piana situata à livante di u paese.

Ligami esterni

• Situ officiale di e calanche di Piana