Civetta

A civetta
Athene noctua
Classificazioni scentifica
Regnu	Animalia
Divisioni	Chordata
Classa	Aves
Ordini	Strigiformes
Famiglia	Tytonidae
Genaru	Athene
Nome binuminali
Athene noctua Linnaeus, 1753

A Civetta (Athene noctua) hè un aceddu nutturnu chì faci partita di a famiglia di i Strigidae. A civetta hè longa circa 21-23 cm, hà un'apartura alari di 53-59 cm è un pesu chì varieghja da 100 à pocu più di 200 grammi. Hà formi tozzi, u capu largu è sciacciatu senza i tipichi ciuffi auricolari di u gufu cumunu, ochji giaddi è zampi longhi parzialamenti rivistiti di seti. A parti supiriori hè grisgiu-brunu machjata di biancu mentri in quidda infiriori hè privalenti u biancu, machjatu di brunu.

Ripartizioni

A civetta si trova in tuttu l'Emisferu nordu, in Auropa, Asia è Africa di u nordu. In Corsica è in Sardegna hè un aceddu chì hè prisenti. Hè diffusu dinò in guasi tutta a penisula taliana fora di nantu à l'Alpi. I so ambienti priferiti sò in i vicinanzi di l'abitati civili, induva ci hè prisenza umana, in ariali cuddinari. Scansa i zoni oltri i 1000 m di altitudina postu ch'è a nevi limiteghja mori i so fonti di cibu.

Athene noctua hè prisenti in Corsica ma piuttostu schersa.

Biulugia

A civetta hè una spezia nutturna, attiva par u più mentri a notti. Si nutrisci par u più di picculi mammiferi tali i tupanchjini è i topa campagnoli. Caccighjeghja bulendu in bassu sopra à i campi è pratulini, apradendu a so arechja è a so visioni fina par sceglia i so predi. Pò dinò cunsumà mastaruculi, aceddi è rettili.

Boci

I civetti ani un ampiu repertoriu vucali. U masciu emetti un malinconicu "hu-u-ou" ripetutu à intarvalli variabili, dopu à 3-4 sicondi. Calchì volta, parò, i civette emettini versi striduli è fastidiosi com'è autudifesa.

Cibu è alimantazioni

A civetta hè carnivora. Com'è tutti i Strigiformi, hè capaci à ingodda i predi intreii. Si ciba di picculi vertebrati è di grossi insetti.

Ripruduzioni

L'ova di a civetta

A ripruduzioni di a civetta hà locu di branu. U masciu attira a femina emittendu canti è brioni carattaristichi. U coppiu custruisci dopu un nidu in una cavità naturali, com'è un arburi cavu o un bastimentu abbandunatu. A civetta nidificheghja trà marzu è ghjugnu. A femina poni 2-5 ova bianchi in picculi cavità trà i rocci, in l'arburi, in i mura di vechji edifizii, in tani abbandunati di mammiferi di media taglia è dopu i cova par circa 4 sittimani. In quiddu periodu hè aiutata da u masciu in a caccia. Dopu à un mesi o pocu più i piulacona lasciani u nidu ma sò cumplittamenti indipindenti solu à 2-3 mesa di vita.

Sistematica

A testa di a civetta

Athene noctua apparteni à u genaru Athene, chì ragruppa parechji spezii di malaceddi di piccula taglia. Hè dinò cunnisciuta sottu à i sinonimi siguenti : Strix noctua, Noctua noctua è Scops noctua.

Si cunnosci 19 sottuspezii di civetta:

A. n. bactriana A. n. cantabriensis A. n. daciae A. n. glaux A. n. grueni A. n. impasta A. n. indigena A. n. lilith A. n. ludlowi A. n. noctua

A. n. orientalis A. n. plumipes A. n. saharae A. n. salentina A. n. sarda A. n. solitudinis A. n. somaliensis A. n. spilogastra A. n. vidalii

Cunsirvazioni

A civetta hè cunsidarata com'è una spezia di priaccupazioni minori siont'è l'Unioni internaziunali par a cunsirvazioni di a natura (UICN). Bench'edda possi essa affittata da a distruzzioni di u so ambienti naturali è l'usu di pisticidii, a so pupulazioni ferma stabuli in a maiò parti di a so aria di ripartizioni. I misuri di cunsirvazioni, tali a prutizzioni di i siti di nidificazioni è a prumuzioni di pratichi agriculi durevuli, sò missi in campu par assicurà a sopravvivenza di 'ssa spezia.

Citazioni

Accadi chì a civetta fussi mintuvata in a litteratura è u cantu corsu. Par asempiu:

• in i Canti d'aceddi di Monsignori Di La Fuata:

Ziazì fà la civetta

Codizennula vizzetta.

Rifarenzi

• Thibault, Jean-Claude, Acelli di Corsica - Les oiseaux de Corse, 1983, PRNC (in francesu)
• J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999
• Mastrorilli M., 2001, Seconda nidificazione di Civetta Athene noctua, in Corsica. Riv. Ital. Orn. 70:89-91. Archiviu 2007-08-21 at the Wayback Machine
• Della Foata, Paulu Matteiu, 1973, "Poesie Giocose in lingua vernacula della pieve d'Ornano"
• BirdLife International 2004. Civetta. In: IUCN 2013. IUCN Red List of Threatened Species. Versione 2013.1

Altri prugetti

• Athene noctua annantu à Wikimedia Commons.