Ashoka u Grande

Aśoka u Grande

Aśoka Maurya u Grande (da u sanscritu "senza suffrenza", devanagari अशोक), incù i caratteri latini Ashoka (Pataliputra, 304 a.C. – Pataliputra, 232 a.C.) fù rè di l'imperu Maurya.

Dopu parechje cunquiste militare, Aśoka regnò annantu à un territoriu chì cumprendia a maiò parte di u subcontinente indianu, l'Afganistanu oghjincu, una parte di a Persia (oghjincu Iranu), u Bengala (oghje spartutu trà l'India è u Bangladesh) è l'Assam. In l'iscrizzione chì ci sò pervenute, si rifirisce generalmente à sè stessu cù u so titulu imperiale in pracritu Devanampiya Piyadassi (देवानांप्रिय प्रियदर्शी, in sanscritu Devānāmpriya Priyadarśi), vale à dì "amatu da i dei" è "cù sguardu dolce".

Cunnisciutu per a so cunversione à u Buddismu è per avè sustenutu a so aduzzione è diffusione, a so storia ci hè ghjunta attraversu e cronache di u II seculu Aśokavadana ("storie di Aśoka") è Divyavadana ("atti divini"), in più di duie cronache pāli di u Sri Lanka, u Dipavamsa è u Mahavamsa; tutte e fonte sò d'origine buddista è dunque accolte cun suspettu da certi storiografi. Qualchidunu hà prupostu chì a cunversione di Aśoka ùn si sia mai veramente fatta, è ch'ellu hà sustenutu u Buddismu solu per a so capacità d'amalgamà e prufonde differenze religiose chì scumpartianu u so imperu à quell'epica. Sta tesa si cunfronta però cù u carattare prufondamente piu di tutti l'editti famosi di Ashoka, i ducumenti epigrafichi à i quali u rè affidò a so missione di legisladore è di muralizatore di i populi sottumessi.

Sò famosi dinù i so pilastri, colonne in petra alte trà 12 è 15 metri, cù o senza scrizzione è dicurazione: ne fece cullà in tutta l'India.

Storia è legenda

Scena di u "donu di a polvera", Gandhāra, II seculu.

Sicondu una tradizione buddista discritta in l'Aśokavadana, a nascita di Aśoka saria stata predita da Gautama Buddha, in a storia cunnisciuta cum'è "u donu di a polvera". Sicondu sta prufezia, in a so vita precedente Aśoka si chjamava Jaya, è da zitellu, mentre ghjucava in u fangu, vide passà u Buddha. Presu tandu da u disideriu d’offre li qualcosa da manghjà, lampò in a so scudella a polvera cù a quale ghjucava. Capiscendu l’anima pura chì avia mutivatu u gestu, u Buddha predisse u so distinu:

«Centu anni dopu a mo morte ci serà un imperatore chjamatu Aśoka in Pataliputra. Regnerà annantu à unu di i quattru cuntinenti è ornarà u Jambudvipa cù e mo reliquie, custruiscendu ottanta quattru mila stupa per u benistà di a ghjente. Ferà chì i dei è l’omi l’onorinu. A so fama serà vastissima. U so donu meritoriu fù solu quessu: Jaya lampò una manciata di polvera in a scudella di u Tathāgata.»

Aśoka si reincarnò dunque cum'è figliolu di Dharma, una di e moglie di l'imperatore Maurya Bindusāra; Dharma ùn era micca di sangue reale, ma fù accettata in l’arem perchè u so babbu, un povaru brahminu, avia preditu chì u so figliolu diventeria un grande rè. Malgradu ch’ellu fussi figliolu di a moglia di più bassu rangu è u più ghjovanu di i principi (eccettuatu Vitthaśoka, altru figliolu di Dharma), Aśoka guadagnò u rispettu di i so fratelli per e so qualità in e discipline militare è accademiche, ancu s'è Susima, u principe ereditariu, ùn era micca menu capace nè cum'è guerrieru nè cum'è amministratore.

Quand'ellu ghjunse à a maghjurità, Aśoka fù messu à u capu di parechji regimenti di l'armata Maurya è i fratelli cumincionu à teme a so pupularità crescente. Nantu à u so cunsigliu, Bindusāra l’inviò in a cità di Takṣaśilā, di pupulazione greco-battriana chì s'era dighjà arribellata in parechje occasioni. Grazia à a so pupularità, Aśoka poti entre in cità senza cumbattimentu è, quandu una rivolta scuppiò, ùn esitò micca à supprime la cù l'armata. Pruvendu di a so luntananza, i fratelli cunvinsenu Bindusāra chì Aśoka tramava contru à ellu, è Aśoka fù esiliatu.

Aśoka passò dui anni in esiliu in a regione di Kalinga, induv'ellu spusò una donna chjamata Kaurwaki, chì fà chì appartinia à una famiglia di pescadori; fù richjamatu da u babbu quandu a cità di Ujjain si rivultò, è cumbattì contr'à ella, purtendu ferite. Fù curatu da monaci buddisti è da una donna chjamata Devi, di una famiglia di mercanti, ch'ellu spusò (forse avia dighjà spusatu Asandhimitra, chì però ùn lasciò mai Pataliputra).

Quand'u rè Bindusāra si ammalò gravamente, un gruppu di ministri ostili à Susima cunvinse Aśoka di piglià a curona, è u ghjovanu principe attaccò Pataliputra, tumbendu tutti i so fratelli. E cronache buddiste insistenu assai annantu à l’atrocità da ellu cummesse, probabilmente per mette in risaltu i meriti di u Buddismu dopu a so cunversione. Avendu eliminatu ogni opposizione, Aśoka rivindicò per ellu u titulu d'imperatore di Maurya.

Cunquiste

Massima estinsione di l’Imperu Maurya durante u regnu di Aśoka.

A prima fase di u regnu di Aśoka fù in qualchì modu illeghjittima, postu ch’ellu ùn fù incuronatu ch'è dopu à quattru anni (certi datanu l'incurunazione à u 268 a.C.); u so guvernu fù aggressivu è crudu, è stu periodu u visse impegnatu in innumerevule battaglie à e fruntiere, grazia à e quale in ottu anni annessò à u so imperu a maiò parte di u subcontinente indianu.

L'imperu Maurya sottu à Aśoka in u 260 a.C.

A guerra sanguinosa di Kalinga (oghjinca Orissa), ch'hè scuppiata versu u 264 a.C., sarà un puntu di svolta. U pretestu ùn hè chjaru, ma certe fonte dicenu chì unu di i fratelli di Aśoka s'erai rifugiatu in Kalinga, cum’è Aśoka durante u so esiliu, è chì Kalinga avia ricusatu di cunsegnà lu à u novu imperatore. E tensione trà i dui regni eranu dighjà antiche è l'imperu Maurya avia parechje volte pruvatu à cunquistà lu. U picculu Statu di Kalinga era infatti una terra ricca è fertile, è i so porti eranu cruciale per i traffichi trà u Sri Lanka, a Birmania è a Malaysia, induve si truvavanu e so culunie. U regnu di Kalinga ebbi inizialmente a suprana, vincendu u generale Maurya. Decisu à compie l’impresa, Aśoka scese in campu cù tutta a so armata. U scontru fù viulente; circa 10.000 suldati di i Maurya è 100.000 trà suldati è civili di Kalinga morsinu, è a terra è i fiumi si tinseru di rossu vermigliu.

Sicondu e legende buddiste, u ghjornu dopu à a vittoria, u ghjovanu imperatore, marchjendu trà i cadaveri, sentì u pesu di e so colpe è ancu dopu esse vultatu à Pataliputra ùn riescì più à dorme, perseguitatu da e memorie di u cunflittu; à quessa, si aghjunse u fattu chì a regina Devi, inurdita da u cunflittu, lasciò u palazzu cù i so dui figlioli, Mahindra è Sanghamitra, chì più tardi diventeranu monachi è purteranu u Buddismu in Sri Lanka. In ogni casu, i ritruvamenti archeologichi (editti di Aśoka) cunfermanu chì l’atrocità di u cunflittu ghjucò un rollu fundamentale in a so decisione d’appughjà a fede (di scola Vibhajyavāda), di rinnegà a viulenza (Ahimsā) è di sparghje u Dhamma (Dhamma-Vijaya).

Pulitica

Aśoka diventò un fervente sustenidore di u Buddismu, ma u so sustegnu esplicitu à sta fede ùn si tradusse mai in una pulitica discriminatoria versu l’altre religioni. Sicondu certi storichi muderni, a scelta d’aduttà a fede buddista era mutivata da a so capacità di cunvivisce cù l’altre tradizioni religiose sparte in u subcontinente, furmendu un amalgama capace di risolve e tensione dighjà forte in un imperu cusì vastu.

U dharmachakra à 24 raghji, riprisentazione di a Rota di u Dharma introdutta da Aśoka è diventata simbulu di l’unità di l'India, di a quale face parte oghje a bandera naziunale.

E leghje chì Aśoka introdusse riprisentavanu una vera rivuluzione culturale; a caccia è ancu u ferimentu di l’animali eranu pruibiti, si prumuvia u vegetarianisimu, si riducia a gravità di e pene (soprattuttu corpurale), è cuncesse almenu 25 volte l'amnistia (25 anni nantu à i primi 26 dopu à l'incurunazione) à prighjuneri è cundannati à morte. Fubbenu custruitu spidali per l'omi è l'animali, università, ostellerie gratuite per i pellegrini, sistemi d’irrigazione è di trasportu fluviale, è strade nove.

E leghje ùn discriminuavanu micca i citadini per casta, fede o appartenenza pulitica; i principii murali di u Dharma ch’elle cercavanu d’applicà eranu a nonviulenza, a tolleranza di tutte l’opinione, l'ubbidienza à i genitori è u rispettu per tutti i maestri religiosi, a generosità versu l'amichi, è u trattamentu umanu di i servitori. In generale, e leghje introducianu nove restrizzione, ma ùn rinnegavanu nisunu di i principi murali preesistenti di e varie religione chì cumpunianu l'imperu.

In pulitica estera, dopu à a prima fase imperialista, hà pruvatu à rimpiazzà l'aggressione militare incù accordi pulitichi, creendu Stati satelliti è riducendu a necessità di surviglià e fruntiere.