Anna Maria Cristina Rivarola
Anna Maria Cristina Rivarola, detta A Mònaca è chì pigliò u nome Maria Domenica quand'ella entra in religione, hè un persunagiu storicu di a Corsica à i tempi di Pasquale Paoli.
Nasce in u 1715 in Bastia. Hè a figliola di Domenico Rivarola è di Paola Maria Verdoni d'Omessa. Entre cum'è sora à u cunventu Sant'Orsula, in Bastia è ne diventa madre superiore.
Hè cunnisciuta in a storia per esse stata una partigiana è amica fida di Pasquale Paoli, cun quale era assai ligata.
E sore ursuline di Bastia
[mudificà | edità a fonte]
Anna Maria Cristina Rivarola piglia u nome di Maria Domenica quand'ella entre à u cunventu Sant'Orsula, in Bastia.
E sore ursuline eranu incaricate di a furmazione di e zitelle. Parechje famiglie mandavanu e so figliole in pensione à u cunventu (situatu oghje carrughju Sainte-Ursule). A mamma di Pasquale Paoli, Dionisia Valentina, hè stata in pensione in stu cunventu.
Amicizia cun Pasquale Paoli
[mudificà | edità a fonte]A Mònaca Rivarola s'hè fatta cunnosce in a storia di a Corsica pè a so relazione d'amicizia cun Pasquale Paoli. Trà i Rivarola è Pasquale Paoli ci hè una leia forte.
Patriotta attiva, a Mònaca facia parte di i so rinsignamenti à Pasquale Paoli di i tempi di u so guvernu (1755-1769). Paoli a stava à sente è si si scrivianu assai. Di sta relazione ci ferma una quantità impurtante di lettere. Cusì, Geniu Gherardi scrive in u so libru Casa Rivarola[1] chì cun Maria Cosway, A Mònaca Rivarola era a donna cun quale Pasquale Paoli hà u più scrittu. Per esempiu, si ritrova in a so currispundenza a so gioia quandu a marina di Pasquale Paoli piglia u forte ghjenuvese nant'à l'isula di Capraia, in u 1767. A Mònaca hè andata in persona in Capraia dop'à u successu di l'armata paulina.
In ste lettere trà Paoli è A Mònaca, u generale a tene à capu di a situazione militare è d'infurmazione nant'à u statu di u guvernu di a Corsica. Cosa più strana è più legera : Pasquale Paoli spartia a so passione pè a lutteria cun A Mònaca. Paoli li dicia di ghjucà à a so piazza, li dava i numeri da ghjucà è dumandava i risultati. Sta lutteria era stabilita in Tuscana.
Attività in Livornu
[mudificà | edità a fonte]Paoli li avia dinù datu a missione à A Mònaca è à u so fratellu Antonio di rileghje una versione arricchita di a Giustificazione delle rivoluzione di Corsica di Don Gregorio Salvini. Hè stata incaricata dinù di fà stampà stu libru in Livornu, impurtantissimu per Paoli, ma dinù di a so diffusione è a so cummercializazione[1].
Si dice chì A Mònaca hè stata l'agente secreta di Paoli[2]. Quand'ella stava in Livornu, era ella chì era incaricata di trasmette e lettere di Paoli in persona, di seguità e cumande d'arme, di mubilizà l'opinione à prò di l'indipendenza di a Corsica[1].
Era una patriotta accanita. in e so lettere à Paoli scrive ch'ella hè pronta à more pè a Corsica. Scrive Gherardi[1] : "La Monaca était une sorte d'ovni dans le ciel du XVIIIe siècle corse. Pour l'immense majorité d'entre elles, les femmes de son temps étaient confinées dans l'univers domestique et intime, privées de la sphère publique."
Dop'à a cunquista militare di a Francia è a battaglia di Pontenovu, A Mònaca è u so fratellu Antonio si trovanu in Livornu, occupati à riceve è aiutà i patriotti corsi cundannati à l'esiliu. A Tuscana è in particulare a cità di Livornu eranu un locu di rifugiu pè i Corsi.
Ritornu in Corsica
[mudificà | edità a fonte]Volta in Corsica durante u reame anglo corsu (1794-1796) chì serà una dillusione per Pasquale Paoli chì si n'anderà definitivamente da l'isula. Una pagina di a storia si gira. Avà a Corsica hè diventata francese. A Mònaca more in a so casa di Bastia in a notte di u 20 à u 21 d'aprile di u 1799, à l'età di 84 anni.
Lochi
[mudificà | edità a fonte]U cunventu di l'ursuline (o Sant'Orsula)
[mudificà | edità a fonte]U cunventu di l'Ursuline si trova rue Sainte-Ursule, chì hè statu trasfurmatu in caserna di gendarmeria quandu e sore sò partute. Oghje accoglie "la maison des syndicats".
A casa Barbaggi-Rivarola
[mudificà | edità a fonte]A Casa Barbaggi-Rivarola Si trova à u numeru 7 di u carrughju Carbuccia (antica rue des jésuites, è dopu rue du lycée). Hè a casa storica di e famiglie Barbaggi è dopu Rivarola.
Una lastra rammenta ch'ellu hè quì chì Pasquale Paoli stava quand'ellu venia in Bastia.
