Wikipedia:Articulu18

À prupositu di Wikipedia

Anassimandru di Miletu (in grecu anticu Ἀναξίμανδρος (610 AC – versu 546 AC) hè un filosofu grecu presocraticu. Hà succidutu à Tales com'è maestru di a scola milesiana, è hè avutu Anassimenu è Pitagoru frà i so allevi. Anassimandru hè cunsidaratu com'è u prima filosofu à avè nutatu i so travagli par iscrittu. Solu un frammentu hè statu cunsirvatu, ma cuncerna a filusufia, l'astronomia, a fisica, a giumitria è ancu a giugrafia. U crateriu lunariu Anassimandru fù numinatu in l'anori di u filosofu.

Anassimandru era u figliolu di Praxiadès. Hè natu in Miletu durenti a terza annata di a 42esima ulimpiata (610 AC). Sionti Apollodoru d'Atene, t'avia sissanta quattri anni in a siconda annata di a 58esima ulimpiata (547-546 AC) è morsi pocu dopu. In i so Discorsi, Temistiu mintuveghja chì Anassimandru saria statu « u prima di i Grechi cunnisciuti à publicà un opara scritta annantu à a natura ». I so documenti sariani dunqua stati frà i primi scritti grechi publicati in prosa. À l'ebbica di Platonu, a so filusufia era stata sminticata, è i frammenti chì ci fermani avali si trovani ind'è Aristoteli o Tiufrastu.

In i Viti, duttrini è sintenzi di i filosofi illustri di Diogene Laërce, hè mintuvatu un fattu ridiculu chì cuncerna Anassimandru : avendu amparatu chì i ziteddi u biffavani quand'eddu cantava, è avaria rispostu tandu chì li ci vulia à amparà à cantà megliu par i ziteddi.