Storia di a Terra
A storia di a Terra descrive l'inseme di l'evenimenti principali chì anu marcatu u sviluppu è l'evoluzione di u nostru pianeta dapoi a so furmazione, circa 4,54 miliardi d'anni fà. 'Ssa cronologia si basa nantu à teurie scentifiche è à i cuntributi di e scenze naturale.
A Terra si hè furmata à parte si da una nebulosa di polvera interstellare, à tempu à u Sole è à u restu di u sistema sulare. À l'iniziu, u pianeta era in statu fusu; dopu un raffreddamentu, si sò furmati a crosta, u mantellu è u core. Un impattu gigante cù un planetoide hà datu origine à a Luna. L'attività vulcanica è l'arrivu di comete d'acqua anu creatu l'oceani è l'atmosfera primitiva.
Per mezu di reazzione chimiche, si sò furmate molecule organiche capace di riproduce si, dendu origine à a vita. E prime forme eranu organismi unicellulari; dopu hè apparsa a pluricellularità, a fotosintesi è l'ossigenu in l'atmosfera, furmendu u stratu d'ozonu. A vita hà cunquistatu a terra ferma è s'hè diversificata in numerose spezie, malgradu estinzione di massa inghjennate da aghjacciamenti, eruzione è impatti meteoritichi.
L'evoluzione umana hà avutu iniziu circa 6 milioni d'anni fà, incù u sviluppu di a bipedia è di u cervellu. L'omu anatumicamente mudernu (Homo sapiens) hè apparsu circa 200 000 anni fà in Africa. L'agricultura, nata circa 10 000 anni fà, hà permessu a nascita di e prime civiltà. Da tandu, l'omu hà trasfurmatu prufundamente u pianeta, influenzendu u clima, a biodiversità è e risorze naturale.