Anatolia

Anatolia (in turcu Anadolu, sorghja di lu soli), chjamata da li Rumani è da li Grechi Asia Minori, hè un rughjoni giugraficu di l'Asia suduccidintali è currispondi à l'ughjinca Turchia asiatica.

Grazii à la so pusizioni strateghjca di cumunicazioni trà Asia è Auropa, l'Anatolia hè stata la culla di numarosi pupulazioni è civiltà finu da l'età priistorica: siti niulitichi si truvani à Çatal Hüyük, Cayönü, Nevali Cori, Hacilar, Göbekli Tepe è Mersin. Listessu situ di Troia risali à lu Niuliticu, è cuntinuighja finu à l'età di lu farru.

Trà li civiltà chì si sò succiduti in lu cuntrollu di la zona, ammintemu li Ittiti, li Frigi, li Lidi, li Persiani, li Celti, li Grechi, l'Armeni, li Rumani, li Goti, li Curdi, li Bizantini, li Turchi selgiuchidi è li Turchi ottumani.

À causa di quista misculanza di pupulazioni, in lu rughjoni si sò sparti numarosi Lingui è stampi linguistichi: parichji studiosi iputizzani chì l'Anatolia sia stata lu centru di diffusioni di li lingui Indoauropeani versu l'Auropa.

Oghji l'Anatolia faci parti interamenti di la Turchia è li so abitanti parlanu lu turcu, à causa di l'islamizzazioni cunsiguenti à la cunquista di lu rughjoni da parti di li Turchi Selgiuchidi è Ottumani finu da lu tardu Medievu. Nonustanti quistu, in la zona sudu-uriintali, vicinu li confini cù Iraq è Iran, ferma una forti minuranza di Curdi è lingua curda.