Sebastianu Dalzeto

Sébastien Nicolai, dettu Sebastianu Dalzeto hè un giurnalistu è scrivanu corsu natu in Bastia u 1u di dicembre 1875 è mortu in A Vulpaiola (in Barchetta) u 1u di marzu 1963. Hè cunnisciutu per esse statu l'autore di u primu rumanzu in lingua corsa, Pesciu Anguilla, publicatu in u 1930.

Biografia

Nasce in Bastia, rue de la Banque (oghje corsu Pierangeli) Sébastien Nicolai. A so famiglia hè mudesta. U so babbu Antoine-Joseph hè militare. Più tardi vanu à stallassi in u paisolu d'Alzetu, nant'à a cumuna di E Ville di Petrabugnu.

À 18 anni, Sébastien Nicolai s'ingagia in l'armata. Si ne và di Corsica per travaglià in l'amministrazione culuniale. Custì giranduleghja u mondu (Madagascar, Algeria, Cochinchine, Africa occidentale...) è piglia cuscenza di l'inegualità. Leghje assai, è principia à scrive pè a stampa. Hà cullaburatu cusì per u giurnale « L’Opinion de Saïgon ».

In u 1919 hè smubilizatu è si stalla in Parigi. Tandu principia una vita di militante di manca. Travaglia per « L’Echo de la Corse ». Scrive dinù pè riviste corse cum'è « L’Annu Corsu », « A Muvra », è più tardi « U Muntese ».

Omu indiatu, di manca è anti culunialistu, fonda u giurnale « La Corse Rouge » (1921-1922), chì ùn dura tantu. In Parigi publicheghja parechje puesie di rivolta : « Les virulentes » (1917), o « Poèmes d’amour et de révolte » (1919). Piglia partitu di i poveri è di l'inghjuliati. In i so rumanzi in francese face parte di e so idee, contr'à a guerra, contr'à l'ipucrisia suciale. Chjama dinù i Corsi à a rivolta è à una presa di cuscenza. Ci si trova dinù i prublemi di a Corsica di l'epica : dinunzia u clanisimu, u sottu sviluppu di a Corsica, è "la décorsisation".

Ma u so capidopera ferma a publicazione in u 1930 di un rumanzu in lingua corsa, intitulatu Pesciu Anguilla. Conta l'ascensione suciale d'un zitellu di i quartieri poveri di Bastia, di U Mercà è di U Puntettu, in l'anni 1870. Hè scrittu sott'à u cugnome di "Sebastianu Dalzeto", nome ch'ellu hà sceltu per via di e so origine in Alzetu, paisolu di E Ville di Petrabugnu.

Hà scrittu dinù « Filidatu è Filimonda » (1963) è d'altri rumanzi in francese, cum'è « Notre Maquis » (1922), « Soprana, héros corse » (1923), « La Canonica » (1924), « Ponte Novo » (1926), « Gallone, ou l’honneur corse » (1928), « La Sposata » (1933).

Difensore di a lingua corsa, hà fattu parte di i fundatori di l’associu Lingua Corsa, in lu 1956.

Volta di manera definitiva in Corsica in u 1961. More in una casa di riposu in Barchetta, cumuna di A Vulpaiola, in u 1963, in l'indifferenza. Hè cù u Riacquistu chì so rumanzu Pesciu Anguilla serà di novu scupertu è ricunnisciutu.

Assai più tardi à a so morta, a municipalità di Bastia derà u nome di Sebastianu Dalzeto à un carrughju di u Mercatu di Bastia.

Pesciu Anguilla cunniscerà parechje reedizione : in u 1990 à l'edizione La Marge è in u 2021 ind'è Albiana.

Hè statu traduttu in francese sott'à u titulu di Pépé l'Anguille (ed. Fédérop, 2010). Pesciu Anguilla serà ancu adattatu à u teatru in u 2009 : Pesciu Anguilla, l'enfant de Bastia, scrittu da Orlando Furioso è Petru Bertoni.

Opere

In francese :

• Les Virulentes (1917), puesie
• Poèmes d'amour et de révolte (1919), puesie
• La Terre délivrée (1920), rumanzu
• Notre maquis (1922), rumanzu
• Soprana, héros corse (1923), rumanzu
• La Canonica (1924), rumanzu
• Ponte Novo (1926), rumanzu
• Gallone ou l'honneur corse (1928), rumanzu
• La Sposata (1933), rumanzu
• La Corse et Gênes devant l'histoire (1936, reedizione in 1950), prova

In corsu

• Pesciu Anguilla (1930), rumanzu
• Filidatu è Filimonda (1963), rumanzu

Collegamenti esterni

• Bastia : en 1930, Sebastiano Dalzeto donne vie au roman corse et au Bastia éternel
• I lochi di Bastia di Pesciu Anguilla
• 140 anni fà nascia Sebastianu Dalzeto
• Sarà mudernisimu l'opera in corsu di Dalzeto ?
• Pesciu Anguilla - Sebastianu Dalzeto
• La Sposata ou les tourments de l’identité corse