Purtone di a casa Levanto

Purtone di a casa Levanto, 1618

U purtone di a casa Levanto hè un'opera ch'ellu si pò vede à u Museu di Bastia. Hè datatu di l'annu 1618. Era situatu à l'entrata principale di a Casa di a famiglia Levanto, in u quartieru di Terravechja, vicinu di u Vechju Portu di Bastia. Sta casa hè stata distrutta durante i bumbardamenti di a seconda guerra mundiale, in u 1943.

À u 17u seculu, e ricche famiglie di Bastia custruiscenu e so case. Tandu, piglianu per mudellu e case taliane, fendu decurà l'entrate principale di i so palazzi da belli purtoni.

L'usu pè e famiglie di nutabili era di decurà l'entrate di e so case (chjamate palazzi). Si ritrovanu dui pilastri chì intornanu l'entrata. Sopra ci hè un fruntone di forma triangulare, chì pò esse interrottu. Spessu, in stu fruntone si mettia l'arme di a famiglia.

U purtone di a casa Levanto hè caratteristicu di i purtoni di st'epica. Hè fattu in cipullinu di Brandu. I pilastri sò scultati in punta di diamante.

A famiglia Levanto hè originaria di a cità di Levanto, in Liguria. Hà fattu furtuna in u cummerciu di u vinu. Sapemu chì sta casa hè stata fatta da Antonio Levanto. A data 1618 hè scritta in u soprusciu.

A casa Levanto era situata induve si trova l'attuale casale Pouillon, nant'à a Marina di Bastia.

Di settembre di u 1943, l'aviò di l'armate inglese è americane si sbaglianu. Bumbardanu a cità di Bastia, cridendu bumbardà l'armata alemana, chì era partuta da Corsica. Sò numerose e case bastiacce chì sò state distrutte tandu.

Infurmazione

Numeru d'inventariu : MEC.56.13.62.1-24