Pittura di Pasquale Paoli da Luigi Varese

A pittura di Luigi Varese

Pittura di Pasquale Paoli da Luigi Varese hè un'opera d'arte sposta à u Museu di Bastia. Hè stata fatta in u 1851 da u pittore bastiacciu Luigi Varese (1797-1852). Hè unu di i pittori corsi i più famosi.

Luigi Varese hè esciutu da una famiglia di sgiò bastiacci, chì stavanu in u quartieru di San Ghjisè. Hà fattu i so studii in Italia è era dinù scultore. Hè ellu chì hà fattu u bustu di Pasquale Paoli chì si trova in a cità di L'Isula Rossa. Hà fattu dinù a scultura munumentale di Paoli chì si truvava in l'entrata di u Teatru di Bastia, ma chì hè stata distrutta durante i bumbardamenti di u 1943, durante a segonda guerra mundiale.

In u 1829 Luigi Verese crea una scola municipale di dissegnu in Bastia. Era una scola gratisi, chì dava corsi a sera per l'operai, bancalari o muradori chì si vulianu perfezziunà.

L'opera

Hè stata fatta dopu à a morte di Pasquale Paoli. Hè unu di i ritratti i più famosi d'ellu. Tandu, Paoli diventa un'eroe pè tutti i Corsi. A Corsica hè diventata francese, ma parechji artisti volenu difende l'identità corsa è tene e leie cun l'Italia. Per quessa, s'interessanu à a storia è i grandi persunagi cum'è Paoli.

Varese face una pittura di l'omu puliticu, micca u capimachja guerrieru.

Paoli hè rapresentatu in traccia di fidighjà versu a diritta, vale à dì versu l'avvene, o forse versu l'orizonte. Simbulizeghja a cunfidenza in l'avvene, a sperenza, a riflessione. Paoli pare determinatu, cunvintu. U fondu hè scuru, ci dà un'impressione di calma. Ma u so visu chjaru. U sguardu di u spettatore si porta nant'à u visu di Paoli.

Ci hè una pagina bianca : rapresenta l'avvene da scrive.

Luigi Varese hà vulsutu rende omagiu à un omu ch'ellu ammirava. Hè un ritrattu cummemurativu, sulennu, è ottimistu, cunfidente in l'avvene.

Infurmazione

Numeru d'inventariu : MEC.84.2.2

Dimensione : 118.5 cm x 95.2 cm