Paul-Mathieu Novellini

Paul-Mathieu Novellini, di u so nome di nascita Paolo Matteo Novellini hè un pittore corsu, natu u 29 di ghjugnu di u 1831 in u paese di Lentu è mortu in Aiacciu u 12 ghjennaghju 1918. Era di naziunalità taliana per via di u so babbu. Piglia a naziunalità francese in u 1887.

U spezialistu Michel-Edouard Nigaglioni scrive ch'ellu hè "u pittore principale di a scola corsa di u XIXu seculu".

Biugrafia

Paul-Mathieu Novellini hè natu in Lentu, d'induve hè a so mamma, chjamata Divota Panzani. U so babbu Michele hè uriginariu di Napuli. Paul-Mathieu hè statu attiratu da l'arte. Duvia l'elevu di u pittore bastiacciu Luigi Varese ma a morte precipitata di questu quì in u 1852 l'hà impedita.

Diventa cusì l'elevu di u pittore talianu Luigi Brunetti, uriginariu d'Urbino è attivu in Corsica trà 1843 è 1851. In u 1855 face una pittura pè a chjesa di a Santissima Annunziata di u paisolu di Purettu, in Brandu.

Intornu à l'anni 1860, parte in Parigi per furmassi. Diventa l'elevu di u famosu pittore accademicu Charles Gleyre. Face tandu una serie di picculi guatri pè a chjesa di u so paese, in Lentu. Hè un viacruci di 14 pitture di dimensione chjuca.

Volta in Corsica in u 1866 è si stalla in Aiacciu in u 1869. Hè quì ch'ellu si marita cù Marie-Aurélie Bartoli è ùn anu avutu figlioli.

Tandu, pinghje una quantità impressiunante di tele pè e chjese corse :

• A dunazione di u Rusariu à Santu Dumenicu, in Brandu (1855)
• San Ghjiseppu, in Mursiglia
• A Natività di a Madonna, in Penta Acquatella (1873)
• San Ghjiseppu è Sant'Antone abate à i pedi di a Madonna, in Barrettali

Hà fattu dinù parechji ritratti, pitture murale è di suffitti, cum'è quellu di a chjesa di Piana, fattu in u 1879.

Hà dinù fattu risturazione d'opere, cum'è l'altare di a cappella induve ci sò e cennere di Pasquale Paoli, in Merusaglia. L'hà fatta pè u ritornu di e cennere di Paoli in u 1888.

A so rinomina ùn si face micca solu in Corsica. Spone à cinque riprese à u Salon des Artistes Français (1866, 1868, 1870, 1877, 1879). Hè ricunnisciutu da u Statu cum'è "peintre officiel".

In u 1866, u catalogu di u Salon des Artistes Français ammenta una pittura di Novellini chjamata : La Corse au XVIIIe, allégorie. Ne face una litugrafia chì cunnosce un gran successu è chì si diffusa in a Corsica sana. Sta fiura serà spessu ripigliata è diventerà ancu una publicità per l'intrapresa di i vini è licori Mattei (almanaccu, etichetta di buttiglia, scultura per a facciata di l'intrapresa...)

Face dinù parechje litugrafie. Certe sò tracunnisciute, cum'è a so seria di i grandi omi di a storia di a Corsica. Hè ellu chì hà fattu i ritratti di Napuleone, Sambucucciu d'Alandu, Sampieru Corsu è Pasquale Paoli chì sò cunnisciute assai.

Diventa unu di i più grandi pittori corsi di a so epica. Spone in Bastia, in a casa cumuna in u 1900 à l'Exposition artistique bastiaise.

Si ponu vede e so opere in parechje chjese di Bunifaziu, in Ota, Rennu, Olmeta di Capicorsu, Tavera, U Pedorezza, Santa Maria Poghju, Letia, Calcatoghju, Santa Lucia di Tallà, Barrettali, Sartè, Scolca.

Duie di e so opere sò à u museu Fesch d'Aiacciu.

Infine, hà dinù scrittu parechji testi nant'à a pittura corsa. U più impurtante hè statu un Catalogue des œuvres remarquables de peinture, sculpture etc. qui se trouvent dans les églises et autres monuments publics ainsi que dans les maisons particulières de la Corse, suivi par des notices sur la vie et les œuvres des artistes corses ayant un titre officiel.