Mansa Musa

Musa I del Mali raffiguratu annantu à l'Atlante catalanu di Abraham Cresques di Maiorca di u 1375

Musa I di u Mali, cunnisciutu megliu cum'è Mansa Musa (1280 – 1337), fù u novu imperatore di l'Imperu di u Mali è u primu di a dinastia Laye. Incurunatu in u 1312, un annu dopu a partenza di u so fratellu Mansa Abu-Bakr, si stima ch'ellu sia statu l'omu u più riccu di a storia. Sicondu u situ americanu Celebrity Net Worth, chì hà analizatu e furtune di l'omi i più ricchi di a storia armunizendu li à u tassu d'inflazione attuale, Mansa Musa saria statu l'omu u più riccu di sempre cù un patrimoniu chì andava da 400–500 miliardi di dollari per i più prudenti, sin'à circa 750–800 miliardi per l’altri.

Biugrafia

Mansa musa ripprisintatu annantu à u tronu, tinendu una pezza d'oru: dittagliu

Mansa Musa fù unu di i primi musulmani à a testa di Tekiu di l'Imperu, è cum'è tale pruvò à sparghje l'Islam, istituendu ancu una festa naziunale per a fine di u ramadanu. Sapia scrive in arabicu è fù affascinatu da Timbuktu, impurtante centru culturale di l'epica, annessu pacificamente à l’Imperu ghjustu durante u so regnu (inseme à Gao) in u 1324. Fundò dinù parechje università islamiche.

Particularmente celebre fù u so pelegrinaghju versu A Mecca trà u 1324 è u 1326, discrittu frà altri da u storicu arabu Ibn Khaldun è traduttu si in una enorme "mustrazione di ricchezza": Musa partì cù un seguitu impressiunante di 60.000 omi, 12.000 schjavi caricati ognunu di quattru libre d'oru in barre, araldi vistuti di seta cù cavalli cù staffe d’oru è ottanta camelli, ognunu cun una somma da cinquanta à trè centu libre d'oru in polvera dunata à ogni puvarettu ch’ellu scuntrava nant'à u so camminu. Longu u traghjettu, chì u purtò à traversà U Cairu (induv'ellu scuntrò u sultanu mamelucchu al-Nasir Muhammad) è Medina, distribuì à varii tituli una quantità d'oru tamanta, è feci custruisce ogni vennari una moschea nova induv'ellu pudia pregà; si dice chì l'oru spartutu fù tale da causà in Egittu un periodu d’inflazione chì durò dodici anni.

Fù per via di stu viaghju straurdinariu chì u nome di l'Imperu di u Mali principiò à fà si cunnosce è à cumparisce nant'à e carte geugrafiche, tantu di u mondu arabicu ch’è di quellu europeu; sempre durante u viaghju, Musa cunniscì u pueta è architettu di al-Andalus, Abū Isḥāq al-Sāhilī, chì à u ritornu u seguitò è ricevite l’incaricu di custruisce parechji di l’edifizii i più impurtanti di l'imperu, soprattuttu in Timbuktu, frà i quali spicca in particulare a moschea Djinguereber, chì hè ancu oghje una di e più grande di u mondu. Sott’à Musa, l’imperu acquistò dinù u cuntrollu di Taghazza, regione ecunomicamente impurtante per a pruduzzione di sale. U so imperu pruducia difatti a mità di u sale è di l’oru in usu in u mondu.

U successore di Mansa Musa, vale à dì u so figliolu Maghan I, fù l'imperatore u più dissulutu dopu à Mansa Khalifa, ma in issu periodu l’imperu era troppu riccu per esse indebulitu da u so mal guvernu.