M'innamoru

À prupositu di Wikipedia
Jump to navigation Jump to search

M'innamoru hè una puesia creata da u pueta in lingua corsa Ghjacumu Santu Versini (1867-1922), dettu Buscagliolu. Hè stata publicata in A Cispra:


L'aria accarezza. Si vede stelle
Indì l'ochji di e zitelle.
U sole bellu ti face d'oru
È m'innamoru.


À mezu pratu ci hè tanti fiori !
Femu cullane cum'è i signori !
U sole bellu ti veste d'oru
È m'innamoru.


I pulloni infrondanu le rame:
Cuntemu ci tutte le nostre brame !
U sole bellu ti frisgia d'oru
È m'innamoru.


Più cà l'acqua fresca di a funtana
Sè fresca, sè limpida, sè sana ...
U sole bellu t'introscia d'oru
È m'innamoru.


Si sò carchi di sangue i chjarasgi :
Hè tempu di pindini è di basgi !
U sole bellu t'accende d'oru
È m'innamoru.

Referenze[mudificà | edità a fonte]

  • Ceccaldi, Matteiu (1976) Antulugia di a litteratura corsa - Anthologie de la littérature corse, Klincksieck: Paris