Luigi Varese
Luigi Varese, di u so veru nome Ignazio Giuseppe Maria Luigi Varese è chjamatu ancu in francese Ignace-Louis Varese hè un pittore è scultore corsu natu in Bastia u 25 di marzu di u 1797 è mortu l'8 marzu di u 1852 in Bastia.
Biografia
[mudificà | edità a fonte]Luigi Varese hè esciutu da una famiglia di sgiò bastiacci, chì stavanu in u quartieru di San Ghjisè. Sapemu ch'ellu facia parte d'una cunfraterna, quella di a Misericordia (l'attuale cinema Le Studio)[1].
Cum'è tutti l'artisti corsi di st'epica và à fà i so studii in Italia[2].
In u 1829 crea una scola municipale di dissegnu in Bastia. Era una scola gratisi, chì dava corsi a sera per l'operai, bancalari o muradori chì si vulianu perfezziunà[1]. Si marita cun Anna Maria Orsini è averanu un figliolu, chjamatu Ange, chì serà anch'ellu pittore.
In u 1838 hè numatu à u cullegiu di Corti.
Opere
[mudificà | edità a fonte]
Pittore rinumatu in Corsica, Luigi Varese ci hà lasciatu bellissime opere :
In a catedrale Santa Maria di Bastia si trova un grande guatru, chjamatu Intercessione di San Carlo Borromeo cù a Vergine è u bambinu pè i poveri è l'infermi.
Luigi Varese era dinù scultore ch'ellu hà amparatu cù u grande artistu fiurentinu Lorenzo Bartolini (chì hà fattu a statua di Napuleone chì si trova in Bastia). Hè ellu chì hà fattu u bustu di Pasquale Paoli chì si trova in a cità di L'Isula Rossa[1].
Varese duvia fà a scultura in bronzu chì si trova oghje Piazza Paoli, in Corti. Ma hè u scultore Vital-Dubray chì hè statu sceltu. Si dice chì l'affare l'hà cuntrariatu assai è ch'ellu hè forse quessa chì l'hà tombu. Un mudellu in ghjessu di a statua prevista in Corti si truvava in l'entrata di u teatru di Bastia. Ma hè stata distrutta durante i bumbardamenti di Bastia in u 1943[1].
Parechje di e so opere si ponu vede à u Museu di Bastia :
- Portrait du duc d'Orléans
- Le bandit corse
- Portrait de Pascal Paoli
- Portrait du juge Salvator Viale
- Portrait de jeune femme[2]
U museu Pasquale Paoli di Merusaglia cunserva un'altra di e so opere : La rencontre de Pascal Paoli et de Napoléon Bonaparte au couvent de Morosaglia, chì saria forse una prima prova fatta per diventà un'opera più grande[1].
-
Bustu di Paoli in L'Isula -
Ritrattu di Pasquale Paoli, museu di Bastia -
Ritrattu di Salvatore Viale, museu di Bastia -
Banditu corsu, museu di Bastia
