Gengis Khan

Pseudoritrattu di l'imperatore Gengis Khan situatu à u Museu Naziunale di Taipei

Gengis Khān (o Gengis Khanⓘ, o Chinggis; in mongolu Чингис хаан, Čingis khaan; natu cum’è Temüjin Borjigin, in mongolu: ᠲᠡᠮᠦᠵᠢᠨ, in cirillicu: Тэмүжин; altu corsu di l'Onon, 16 d’aprile 1162 – Yinchuan, 18 d'aostu 1227) fù un cunduttore è suvranu mongolu. Dopu à avè unificatu e tribù mongole è turche, creò l’Imperu mòngolu, unu di l’imperi i più maiò di u mondu chì, sottu ad ellu, ghjunse da a zona sittintriunale di a Cina finu à a Persia nordurientale. Cù i so succissori ghjunse à a cuncquista di a maiò parte di l’Asia cintrale, di a Cina sana, di a Rus’ di Kiev, di a Persia, di u Mediu Oriente è d’una parte di l’Europa orientale, dendu vita, ancu s'ellu hè statu per pocu tempu, à l’imperu terrestru u più vastu, per cuntinuità territuriale, di a storia umana. Fù sipoltu in Mongolia, in un locu scunnisciutu.

Gengis Khan è u so imperu anu una reputazione tremenda: infatti fù assai temutu, in e storie lucale di i paesi induv'elle passonu e so truppe. Parechji cronisti medievali è storichi muderni discrivenu e cuncquiste di Gengis Khan cum’è distruzzione à scala senza precedente, tantu da caghjunà una calata drastica di a pupulazione per via di sterminii di massa è caristie. Una stima prudente parla di circa quattru milioni di civili (mentre altre cifre vanu da quaranta à sessanta milioni) chì persenu a vita per via di e so campagne militare. À l’incontru, i buddisti Uiguri di u regnu di Qocho, chì lascionu vulinteri l’imperu di i Kara Khitay per diventà vassallu di i Mongoli, u vidianu cum’è un liberatore. Gengis Khan fù ancu ritrattatu in manera pusitiva da e prime fonte di u Rinascimentu in segnu di rispettu per a larga diffusione di a cultura, di a tecnulugia è di l’idee sottu à l’imperu mongolu, ma dinù per avè afflittu u mondu islamicu. À a fine di a vita di u Gran Khan, l’imperu mongolu occupava una parte impurtante di l’Asia cintrale è di a Cina. Grazie à i so successi militari eccezziunali, Gengis Khan hè cunsideratu cum’è unu di i più grandi cuncquistadori di tutti i tempi (inseme à altre grande persunalità storiche cum’è Alessandru Maghju, Saladinu, Ghjuliu Cesaru, Attila, Carulu Magnu è Napoleone).

Aldilà di i so successi militari, Gengis Khan fece prugressà l’imperu mongolu ancu d’altre manere. Dicretò l’aduzzione di a scrittura uigura cum’è sistema di scrittura di l’imperu mongolu. Praticò a meritucrazia è incuraghjì a tulleranza religiosa in l’imperu mongolu, unifichendu e tribù nomade di u nordestu asiaticu. L’attuali Mongoli u cunsidereghjanu u babbu fundatore di a Mongulia. Hè dinù ricunnisciutu per avè custituitu un’ambiente puliticu omogeneu per tutta a via di a seta. Quessa hà facilitatu e cumunicazione è i scambii cummirciali trà l’Asia nordorientale, l’Asia sudoccidentale musulmana è l’Europa cristiana, allarghendu l’orizonti culturali di e trè zone.

Biugrafia

A nascita

U fiume Onon, vicinu à u locu di nascita di Gengis Khan

I primi anni di vita di Gengis Khan sò pocu cunnisciuti è cuntruversi parchì discritti solu dopu a so morte.

A mamma Hoelun, di a tribù di i Merkit, da pocu maritata cù Yeke-Ciledu, fratellu minore di u capu di a tribù di i Merkit, era stata rapita in una scurreria urganizata da Yesugei cù l’aiutu di i so fratelli, Nekun-taiji è Daritai. Yesugei era u capu di u clan Borjigin di a tribù di i Kereiti, Mongoli praticanti di u cristianesimu nesturianu. I dui ebbenu un primu figliolu (ne ebbenu altri quattru: i trè masci Qasar, Qachiun è Temüge è a femina Tamülün), à u quale detenu u nome di Temüjin, in onore d’un valurosu capitanu tartaru chì u babbu avia appena catturatu in battaglia. Sicondu certi, u nome vene da tomor ("ferro").

L’annu di nascita di Gengis Khan hè incertu: certi storichi pruponenu u 1155 è d'altri u 1167, mentre e crònache chinesi indicheghjanu u 1162.

Temüjin seria natu trà e muntagne di a pruvincia di Hėntij, precisamente nant’à u Deluun Boldog ("cullina di a malincunia"), chì si trova vicinu à u monte sacru Burhan Haldun, longu e rive di u fiume Onon è vicinu à u fiume Hėrlėn, vicinu à Lamyn Uhaa (à pocu pressu l’attuale sum di Bindėr, micca luntanu da Ulaan Baataar); altri pensanu chì Gengis Khan fussi natu vicinu à Dadal. Sicondu a tradizione mongola, Gengis Khan nasci "u ghjornu chjaru di u primu mese di l’estate di l’annu di u cavallu d’acqua di u terzu ciculu" (ognunu ciculu di u calendariu mongolu durava 60 anni) è vinse à a luce stringhjendu in u picculu pugnu un pocu di sangue, segnu chì u so distinu seria statu quellu d’un grande guerriere.

Zitellina

Quandu Gengis Khan avia nove anni, u so babbu Yesugei dicise ch’ellu era ghjuntu u tempu d’urganizà u futuru matrimoniu di u so figliolu: cunvintu chì trà i parenti di a moglia averia trovu una degna cunsorte, partì versu l'oriente è, durante u viaghju, scuntrò un coppiu di genitori di u so stessu clanu (l’Ungrat), a figliola di i quali, Börte, era appena più maiò di Temüjin. Dopu à un breve discorsu cù u babbu Dai Seshen, dispostu à dà li a figliola in sposa, Yesugei si cunvinse di lascià Temüjin vicinu à a so famiglia. Nant’à a via di ritornu, Yesugei scuntrò in u monte Chekcher un gruppu di tartari, cù i quali fistighjò suvitendu l’usanze lucale; trè ghjorni dopu morse avvelenatu. Hoelun duvia curà, in più di i so cinque figlioli, ancu i dui avuti da u maritu cun un’altra donna (Bekter è Belgutai) senza a prutezzione di i parenti, chì ùn li detinu a minima assistenza. A donna insignò à i so figlioli à circà da manghjà custruiscendu rete è altri arnesi per piscà.

Temüjin s'amicò cù un zitellu di nome Jamuka, figliolu d’un capu di clanu, cù u quale cuminciò l’usu di scambià si rigali diventendu cum’è fratelli di sangue. Intantu a rivalità cù Bekter purtò quessu à arrubà a preda (una luduletta) di Temüjin, chì avia tandu tredici anni, è à quale ùn servì di lagnà si cù a mamma. Decise tandu di vindicà si cù l’aiutu di u so fratellu, Khasar, di ondici anni, tumbendu u mezu fratellu chì stava à guardà u bestiame.

In seguitu i Taciuti intervensenu à a ricerca di Temüjin, guidati da Targutai: u zitellu fughjì in u boscu vicinu inseme à i so fratelli, per nove ghjorni è nove notti i suvitonu finu à a cattura, accaduta parchì si resi per fame. U prighjuneru fù sottumessu à a kanga, un pilastru di legnu chì l’averia immubilizatu finu à novu ordine. Temüjin prufittò d’una distrazione generale per culpisce l’omu messu di guardia cù a kanga, è fughjì cusì da l’accampamentu. In u so girandulà fù aiutatu da Sorqan-shira, unu di l’omi chì u stavanu suvitendu, è da i so figlioli, i quali li tolsenu l’arnese ch'ellu purtava.

Un annu dopu e ricchezze di a famiglia eranu cresciute appena: pussedianu nove cavalli è qualchì bestiame; ma quasi tutti i cavalli fubbenu arrubati, salvu ne unu nantu à quale era cullatu per a caccia Belgutai. Temüjin dicise di suvità i latri, è dopu trè ghjorni scuntrò un zitellu di nome Bogorchu, di a stirpe di l’Arulati, chì dicise di parte cun ellu. Dopu altri trè ghjorni ricuperonu u butinu senza tumbà i culpevuli, oramai fughjiti. Riturnati in a tenda di Bogorchu, quessu ricusò ogni ricumpensa per l’aiutu datu.

À l’età di sedici anni Temüjin dicise di piglià in moglia a zitella cunnisciuta anni nanzu, Börte, maritata cù u ritu di u cerimuniale mongolu in 1181-1182. Ebbe in rigalu una pelliccia di zibellinu neru; subitu circò alleati, è i truvò trà i so fratelli è Bogorchu, ch’ellu cunvocò.

A cuncquista di u tronu

Ritrattu di Gengis Khan, Brooklyn Museum

Sapendu chì Toghril, à a testa d’una armata, era amicu di u so babbu, Temujin decise di scuntrà lu, per unisce e forze. A nunda valse i vechji ricordi, ma fù eppuru cunvintu da u rigalu di u zibellinu. Pocu dopu, quandu Temujin stava vicinu à u vangarone di Burgi-ergi, à e surghjente di u Kerulen, un stazzunaghju chjamatu Jardchiudai vense à rende li omaghju offrendu li i servizii di u so figliolu, Jelme.

Prubabilemente in u 1184 i Merkit, cuscenti di u rapimentu di a moglia di Ciledu, fecenu incursione in e terre di Temujin; una donna anziana si n’accorse di u so arrivu, è avvisò tutta a tribù di l’attaccu imminente: Houlun è Temujin fughjitinu à cavallu, mentre Borte fù piattata in un carrettu induve fù trovu da l’omi è purtata da u fratellu di Ciledu, Cilger, chì a volse in sposa, incù a mamma di Belgutai, Sucigil. I ghjorni dopu, e tribù capitanate da Togtoga (Uduid), Dair-usun (Uwas) è Qaatai-darmala (Qaad) pruvonu in vanu à truvà à Temujin, u maritu di Borte, sin’à ch’elli decisenu d’abbandunà l’idea. Temujin, incù quasi tutta a tribù, avia passatu trè notti à a stella, truvendu rifughju in capanne custruite cù i salici in u Kaldun.

Temujin andò dopu vicinu à Toghril, chì li cunferì duie divisioni di cavalieri, à e quale si aghjunsenu altre duie mandate da Jamuka, u so fratellu di sangue, intervenutu à a so dumanda. Dopu, Temujin, percurrendu i fiumi Tunggelig è Tana, si unì à Toghril chì cù e so truppe s’era accampatu à Ail-qaragol, ghjunghjendu à Jamuka in una valle, per un tutale di circa 12.000 omi. Suvitò tandu l’attaccu: vincenu prima a sterpa di l’Uduid, attaccata mentre ella durmia, ancu sì u so capu Togtoga riescì à fughje, dopu attraversonu, ancu cun difficultà, u fiume Hilok di notte. Ancu s'è privi di l’effettu di surpresa, i nemichi fughjitinu, abbandunendu Borte è altre donne chì diventonu a ricumpensa di l’appoghju militare. Eppuru, Borte, dopu à una furzatura da parte di i Merkiti, era incinta di u primu figliolu di Temujin, Djuci, di quale a paternità ùn era senza dubbiti. U coppiu averà altri trè figlioli: Jagatai, Ögödei è Tolui. Sucigil, l’altra moglia di Yesugei, preferì inveci a fuga, assaltata da a vergogna.

Dopu una prighera per ringrazià u celu di a vittoria, a famiglia di Temüjin campò cù quella di Jamuka cum’ella era una sola, sin’à chì in un ghjornu d’aprile, quandu i dui eranu cavalchendu cù e famiglie è i membri di u clanu à u seguitu, Jamuka prupose d’accampà si per a notte mentre Temujin decise di cuntinuà u viaghju, separendu si. In quella stessa notte attacconu un accampamentu disarmatu è quì u zitellu sopravvivente Kokochu, lasciatu senza famiglia, fù aduttatu da Hoelun cum’è un antru figliolu.

Dopu à sta scelta parechji clani minori decisenu di suvità à Temüjin: simu intornu à u 1190.

Toghril Khan è Temujin si dichjaronu ufficialmente babbu è figliolu; essendu aduttatu da u Khan di i putenti Kereiti, à quellu mumentu forse u capu mongolu u più putente, vassallu di l’imperatore Chin, Temujin acquistò a credibilità necessaria per un capifila.

Grazie à u matrimoniu cù Börte, a figliola di u capu ongirratu Seichen-Dei, è à u carisma ch'ellu trasmittia à e tribù vicine, ch’elle fussinu maiò o minori, Temüjin diventò unu di i pussibuli candidati à u titulu di Khagan o "Gran Khan", carica firmata vacante dopu à e scunfitte patute da parte di i Chin. Si riuntinu in cunsigliu, un grande kuriltai (u cunsigliu di i capi tribù), induve varii elementi impurtanti, frà i quali Altan (figliolu di Kutula), Sacha-beki (prununipote di Kabul) è Quchar (o Kuchar), l’elessenu Cinggis Khan o, cum’è dice a storia secreta, Cinggis Khagan: a data di l’elezzione hè incerta frà i resuconti di i storichi, da u 1185, à l’estate di u 1189, ma più verusimilmente duverebbe esse intornu à u 1200. Da tandu fù chjamatu Gengis Khan.

A criazione di l’Imperu

Organizazione pulitica

Gengis Khan è Börte, da a a Chingiznama (u libru di Gengis Khan)

Gengis Khan si dete à cuncquistà è urganizà i populi, sicondu un’impustazione puliticomilitare basata nant’à a mubilità è fortemente ierarchizata: ogni tribù (ulus, chì indicava ancu u patrimoniu cullettivu) era indipendente, ma tutte eranu sottumesse à a famiglia imperiale (vale à dì à a famiglia di Gengis Khan), a cusì detta "discindenza di a sterpa aurea", sacru postu chì mitulogicamente derivava da u Diu di u celu, Tengri, divinità suprana di i Mongoli. L’imperu in u so inseme era l’ulus di a famiglia imperiale. Tutti i khan prupunianu fidelità è rispettu à u Gran Khan, chì i survigliava cù un sistema rapidu è urganizatu d’intendenti è currieri. Creò figure nove è riurganizò quelle chì esistianu.

Si dedicò à un’amministrazione basata nant’à a scrittura, grazia à Tata Tonga, prighjuneru chì era à capu di l’amministrazione Naiman, à u quale si dumandò dinù d’insegnà a scrittura à i varii principi. L’amministrazione sana era posta sottu u cuntrollu di Sigikan.

Muneta

Marcu Polu in u Milione discrive u modu cù u quale Gengis Khan finanziava e so spese militare è u splendore di a corte di l’imperu mongolu. U Gran Khan avia intraduttu una muneta à corsu furzatu, chì pudia esse acquistata cunferendu à l’imperatore ogetti d’oru, d’argentu è di petre preziose. À l’incontru, a muneta ùn era micca rimbursabile cù un contruvalore metallicu. Sottu pena di morte, a muneta duvia esse l’unicu mezu di pagamentu per cumprà bè è servizii in tuttu u regnu, è u barattu era pruibitu. Periudicamente, l’imperatore pruibia u pussessu privatu d'oru è d’altri ogetti de valore, è urdinava ch’elli fussinu cunferiti à u rè in scambiu di biglietti di banca.

Organizazione militare

L’aspettu u più straordinariu di a persunalità di Gengis Khan fù u so geniu in u campu militare, cù una tattica furmidevule: l’armate mongole, forte d’archeri à cavallu, attaccavanu in u più cumpletu silenziu, guidate solu da bandere di culori sfarenti, fendumanovre cumplesse in simmetria è cullaburazione perfetta, ciò chì caghjunava una paura sopranaturale in u nemicu.

Suddivisione decimale

E tribù unificate aduttonu un sistema militare basatu nant’à u sistema numericu decimale, simile à quellu di l’Unni. L’armata era divisa in unità di 10 (arban), 100 (Yagun), 1000 (Minghaan) è infine 10 000 (Tumen) suldati. Durante i spiazzamenti, i suldati purtavanu cun elli e so famiglie è tutti i cavalli, chì spessu ghjunghjianu almenu à trè o quattru per cavaliere, avendu cusì sempre animali di trasportu freschi dispunibuli.

Gengis Khan creò a so guardia persunale di 10 000 omi induve eranu arrulati i figlioli di i cumandanti.

Meritucrazia

Un altru aspettu fundamentale di l’urganizazione militare fù l’aduzzione d’un principiu di meritu: l’unichi criterii presi in cunsiderazione da Gengis Khan per stabilì u gradu d’un ufficiale eranu a so capacità è a so fidelità, mentre i parametri tradiziunali di nascita è di sterpa eranu praticamente ignurati. Subedei, u figliolu d’un guardianu di bestiame, diventò unu di i so cumandanti i più stimati.

Prupaganda

Gengis Khan curò ancu a so fama ("l’immagine") cù azzione calculate è feroce per punisce i nemichi o d’una grande magnanimità versu l’alleati. A numata d’inflessibile è invincibile fù una prupaganda efficace contru à i so avversarii pulitichi, chì sapianu ch’ùn sottumette si equivalia à u sterminiu.

E campagne militare

Invasione di a Cina

Gengis Khan è Ong Khan, illustrazione pruvinendu da un manuscrittu di Jami al-tawarikh, XV seculu

Da tempu Gengis suppurtava male u regnu di u novu imperatore di a Cina, Wei (Wanyan Yongji), è decise dunque, di veranu di u 1211, di dichjarà li a guerra. Riunitu l’armata in e valle suttane di l’Hentej (e cifre parlanu di in tuttu 100-120 000 omi cù l’usu di 300 000 cavalli), Gengis attraversò, in parechje cavallate, u desertu di u Gobi, riescendu à cuntrullà e risorze d’acqua dispunibule; dopu andò versu u futuru passu di Huan-erh-tsui, da induv'ellu pudia puntà versu Pechinu. I chinesi pudianu cuntà nant’à u cummandante Zhi-zhong, u quale preferì mandà un so messageru, Ming-an, chì s’unì, cù serpresa, à l’armata invasora.

Sapendu chì e truppe nimiche l’aspittavanu à u passu, Gengis decise d’aduprà l’archeri per decimà a cavalleria nemica chì ùn pudia ripiegà si prestu; à l’arrivu di a fanteria chinese, Gengis rispose cù a cavalleria, sugillendu cusì a vittoria contr’à i difendidori. Questa hè cunsiderata cum’è una di e vittorie più impurtante di i Mongoli.

Forti di a vittoria, i Mongoli ùn riescitinu à prufittà ne, è l’estate dopu vide solu picculi cunflitti. Intantu, Jebe assediò l’antica capitale Mukden, a futura Shenyang, ch'ellu cunquistò u 4 di frivaghju 1212 cù u solitu stratagemma di l’abbandonu fintu. L’assalti cuntinuonu sin’à l’autunnu, quandu, durante una battaglia, Gengis fù feritu da una freccia, è decise di ritirà si per qualchì mese. D’estate, grazia à i generali Subotei è Jebe, cunquistò a furtezza situata à difesa di a Bocca di u Tasso, evitendu e numerose trappule sparse vicinu.

À u principiu, l’uperazione contr’à i Chin ebbenu u listessu andamentu di quelle contr’à a Xia. I Mongoli ottensenu numerose vittorie in campu apertu, ma fallitinu i so tentativi di cunquistà e cità principale. Tardi in u 1212, i Mongoli riescitinu à catturà ingigneri chinesi disertori, è 'ssi ingigneri aiutonu à Gengis Khan è i so ufficiali maiò à studià e tecniche d’assediu, finu à diventà specialisti in quellu campu militare. Nanti à l’attacchi, prima, i Mongoli usavanu i prighjuneri, ch'elli adunianu prima è dopu l'urdinavanu di mette si in testa à ogni assaltu, o praticavanu a tattica di a ritirata finta.

Cum’è risultatu di e vittorie in campu apertu è di qualchì cunquista di fortificazione, in u 1213 i Mongoli avanzonu à u sudu di a Grande Muraglia chinese. Tului cunquistò qualchì roccaforte cum’è Huailai, mentre Jebe fecia massacri in a gola di Ningwu. Avanzonu cun trè armate sin’à u core di u territoriu di a Cina, trà a Grande Muraglia è u Fiume Giallu. U generale Heshilie Zhizhong, cunnisciutu dinù cum’è Hushahu, tumbò l’imperatore, dopu si pruclamò regente per cuntrullà u novu imperatore Xuanzong, nipote di Yongji; mandò dunque un so tinente, Kaoshi (o Kao-ch’i), cù 6 000 omi, minaccendu lu di morte in casu di fiascu. Kaoshi fù scunfittu, ma anticipò e mosse di u regente decapitendu lu, è purtò a testa mozza à u novu imperatore chì u numinò vicecumandante di l’imperu.

Di vaghjimu, Gengis decise di divide a so armata in trè parte: a prima, cummandata da Gengis è Tului, si dirighjite versu u sudu; a seconda andò à Joci, Jagatai è Ogodei, i trè figli principali di Gengis; è a terza, chì avia da ghjunghje è fighjà u mare Giallu per poi attaccà a Manciuria, fù affidata à Joci-Kasar è Temuge. Si riunisciaranu più tardi, stanchi di u caldu è di l’epidemie in u 1214, vicinu à Pechinu (chjamata tandu Zhongdu).

A cità era difesa da quattru furtezze vicine induve si rifughjitinu i varii capi pulitichi è militari, ognunu di i quali guidava una piccula armata di 4 000 omi. A capitale stessa era da pocu afflitta da una tremenda epidemia di pesta, chì aggravò a situazione ghjà tremenda chì a dinastia Jin patia, cum’è s’ella ùn bastava micca l’estrema curruzzione di a corte è di l’ufficiali, è poi e numerose vittorie di i Mongoli chì, frà altru, avianu ancu caghjunatu diserzione di i Chinesi Han (una di l’etnie chì cumpunianu a plebe di a dinastia) da a parte di i Mongoli è e rivultate di i Khitai (frà elle, quella di Lu-ke, chì fundò u novu imperu Liao in Manciuria).

L’unificazione di e steppe

Gengis Khan, monumentu in Hulunbuir, Mongulia Interna, China

Gengis aiutò Toghril à ripiglià l’anticu titulu è u tronu, suttratu da u so fratellu, Erke-Kara, ristabilendu l’anticu splendore di u so patrinu. L’aiutò in u cunflittu contru à i Tatari, furmendu una cualizione senza u sustegnu di i Giurkini, assediendu vitturiosamente i dui furtini à Naratu-sitigen è Qusutu-sitigen è tumbendu u so capu, Megugin-segultu. Gengis tense per ellu un viculu d’argentu è altre cose, è dete à a so mamma un altru zitellu firmatu senza parenti, chjamatu dopu Sigikan-Quduqu. Cumbattì dunque contru à i Giurkini, tumbendu à Sacha-beki è Taichu, chì eranu trà quelli chì l’avianu elettu Temujin Khan, mentre un antru zitellu, Boroqul, fù datu à Hoelun. Buri-boko, unu di i pritendenti à u tronu, accittò di participà à u turneu di lotta induv'ellu affruntò u fratellu di Gengis, Belgutai, è fù da ellu tombu com’è richiestu da u suvranu stessu.

Gengis si truvava però à affruntà u prublema d’un vechju amicu, Jamuka. Dopu l’omicidiu di u so fratellu Taichar, tombu cù una lancia dopu à avè pruvatu à arrubà u bestiame di pruprietà di l’ordu khanale, usò quellu gestu cum’è pretestu per urganizà un attaccu contru à u vechju amicu. Durante l’ultimu decenniu di u XII seculu, riescì à riunisce una armata di 20 000-30 000 omi. Temujin, sapendu di l’attaccu ancu s'è in ritardu, affruntò i Jadirat (o Jadaran) di Jamukha in a battaglia di Dalan Balzhat; scunfittu di ghjustu, si ritirò in i meandri di l’Onon, in a gola di Jerene.

Cascatu Toghrul, Gengis strinse amicizia cù i Naiman, dopu cù i Jurdecai (Uruguti), i Quyldar (Manguti) è i Mongliq, mentre assai altri (frà i quali i Taciuti, o Taichiti, antichi nemichi di Temujin) si alleanonu cù u vincidore Jamuka, chì fù elettu Gur-Khan (suvranu universale). In u scontru dopu, accadutu prubabilmente in u 1202, Temujin risicò di more per duie volte: una freccia culpì a so cavalcatura, chì cascò morta in terra, mentre un’altra sfiurò u so collu, ma a punta era avvelenata è u velenu entrò in u sangue; Jelme li suchjò u velenu è u survegliò finu à a sera, quandu u so Khan si riprese.

U ghjornu dopu, Temujin vinse a battaglia è misse u so avversariu in fuga. Durante i cuntrolli nant’à u campu dopu à a vittoria ottenuta, Sorqan-shira si unì à Gengis, mentre u so cumpagnu, l’archeru Jirqo, cunfessò d’esse statu ellu à culpisce à morte u destrieru di Gengis è d’avè culpitu u Khan di i Mongoli cù a freccia avvelenata. Temujin, però, u pardunò, u pigliò à u so serviziu è li dete un novu nome, Jebe (vale à dì punta di freccia). Kiriltuk, capu di i Taciuti chì in passatu avia tenutu prighjuneru per pocu tempu Temujin, fù catturatu da un tradittore d’un clanu sottu à ellu è da i so figlioli, ma decisenu d’abbandunà longu à a strada è di cunsignà si à Gengis chì li arrulò.

A morte

U principale Tempiu di Gengis Khan, situatu in Ordos, Mongulia Interna, Regione Autonoma di a China

Ùn sò micca chjare e cause di a so morte, scunnisciute ancu da i stessi Mongoli cum’ellu rimarca Marcu Polu. Sicondu a Storia Sicreta, morse dopu à una longa angunia, incausata da un traumatismu avutu in seguitu à una caduta da cavallu durante una battuta di caccia.

A mutivazione hè certamente ligata à un scontru cù i Tanguti; si suppone ch’ellu sia mortu per e fatiche suppurtate in battaglia à a so venerabile età o per via di e ferite purtate in quest’ultima; certi imputanu u scontru à una rapresaglia per u rapimentu d’una principessa tanguta chì era stata cunsegnata à Gengis Khan cum’è butinu di guerra.

In ogni casu, à a mità di u 1227 Gengis Khan, in angunia, si resi contu ch’ella s’avvicinava a so fine. Dopu à avè cunfirmatu Ögödei cum’è successore (u primugenitu sceltu Djuci era dighjà mortu di ghjennaghju di listessu annu), dittò da u so lettu di morte à Tolui, u figliolu u più ghjovanu, l’istruzzione per compie a distruzzione di l’imperu Chin.

Morse lascendu un imperu chì si stendia da a Siberia à u Kashmir, à u Tibet, à u Mare Caspiu, à u Mare di u Giappone. Malgradu i genucidii, e depurtazione di massa è e distruzzione di e cità arrasate è ricustruite da zeru, l’Imperu mongolu era solidu, pacificu, cù ghjente diversa per via di a sterpa, a lingua è a religione chì campavanu inseme in manera armuniosa sottu à a ghjusta (è inflessibile) pax mongolica.

U so corpu fù purtatu torna in Mongolia è sipoltu in un locu sicretu, prubabilmente à tempu à parechji servi tombi per l’occasione. Tutta a zona circundante, per centinara di chilometri quadrati, fù dichjarata interdetta à l’accessu è survegliata da e guardie Urianhai (u gruppu tribale fidu di Subedei), oltre à esse vuluntariamente calpestata da centinara di cavalli per cancellà ogni traccia di a sepultura.

Per decennii, varie spedizione americane è giappunese anu pruvatu invanu à ritruvà a tomba di u grande suvranu, finu à a spedizione di u National Geographic chì hà trovu tracce d’una tomba ricullendu à u periodu di Gengis Khan.

Dopu a so morte, per dui anni Tolui (fratellu di Ogodei) firmò regente ad interim in attesa di u cunciliu di u Kuriltai di u 1229.